زراعت، کسانوں کی بہبود اور دیہی ترقی کے مرکزی وزیرجناب شیوراج سنگھ چوہان 3 اور 4 جولائی 2025 کو جموں و کشمیر کے دو روزہ دورے پر ہوں گے۔ اپنے دورے کے دوران وہ اعلیٰ سطحی میٹنگوں کی صدارت کریں گے اور زراعت، دیہی ترقی اور تعلیمی شعبے سے متعلق اہم پروگراموں میں شرکت کریں گے۔

3 جولائی کی صبح جناب شیوراج سنگھ چوہان سری نگر کے سول سیکرٹریٹ میں زراعت اور کسانوں کی بہبود کی وزارت اور دیہی ترقی کے محکمے کے سینئر عہدیداروں کے ساتھ ایک جائزہ میٹنگ کریں گے ۔ دوپہر میں وہ قدرتی کاشتکاری سے متعلق زراعت اور کسانوں کی بہبود کی وزارت  کی مشاورتی کمیٹی اور قومی تلہن مشن کی میٹنگ میں شرکت کریں گے ۔ شام کو وہ راج بھون میں جموں و کشمیر کے لیفٹیننٹ گورنر جناب منوج سنہا کے ذریعے ان کے اعزاز میں منعقدہ ایک شکریہ کی میٹنگ میں شرکت کریں گے ۔

دورے کے دوسرے دن ، جناب شیوراج سنگھ چوہان شیر کشمیر یونیورسٹی آف ایگریکلچرل سائنسز اینڈ ٹیکنالوجی (ایس کے یو اے ایس ٹی-کے) سری نگر کی چھٹی کنووکیشن تقریب میں مہمان خصوصی ہوں گے ۔ یہ تقریب یونیورسٹی کے شالیمار کنونشن سینٹر میں منعقد ہوگی ۔  اس تقریب میں جموں و کشمیر کے لیفٹیننٹ گورنر اور یونیورسٹی کے چانسلر جناب منوج سنہا، وزیر اعلیٰ اور ایس کے یو اے ایس ٹی-کے، کے پرو چانسلر جناب عمر عبداللہ بھی شرکت کریں گے ۔

کنووکیشن کے دوران 5,250 طلباء کو انڈر گریجویٹ، پوسٹ گریجویٹ اور پی ایچ ڈی کی ڈگریاں دی جائیں گی۔ اس کے علاوہ 150 گولڈ میڈل اور 445 میرٹ سرٹیفکیٹس ممتاز طلباء کو ان کی تعلیمی مہارت کے اعتراف میں دیئے جائیں گے۔

کنووکیشن تقریب کے بعد ، جناب شیوراج سنگھ چوہان ایس کے یو اے ایس ٹی-کے کیمپس میں زعفران اور سیب کے باغات کا دورہ کریں گے اور باغبانی کے سائنسدانوں اور کسانوں کے ساتھ بات چیت کریں گے ۔  اس کے بعد ، مرکزی وزیر زراعت کھونموہ گاؤں میں 'لکھپتی دیدیوں' سے ملاقات کریں گے،جو خواتین کو بااختیار بنانے اور دیہی خوشحالی کی علامت ہیں ۔

جناب شیوراج سنگھ کے دورے کو جموں و کشمیر میں پائیدار زراعت، قدرتی کاشتکاری اور دیہی ترقی کو فروغ دینے کی جانب ایک اہم قدم سمجھا جارہاہے۔ اس سے قبل’ وکست کرشی سنکلپ ابھیان‘ کے ایک حصے کے طور پر، انہوں نے جموں کا دورہ کیا تھا اور کسانوں کے ساتھ براہ راست بات چیت کی تھی۔ اس مشغولیت کو جاری رکھتے ہوئے جناب چوہان کاشتکار برادری سے براہ راست رابطہ قائم کرنے کے لیے مختلف ریاستوں اور دیہی علاقوں کا باقاعدگی سے دورہ کر رہے ہیں۔

-------------------------

ش ح۔ م م۔ص ج

UN-NO-2375