شمال مشرقی خطہ (این ای آر) کی معدنیات اور کوئلے کی صلاحیت کو دریافت کرنے  کی سمت ایک بڑے قدم کے طورپر، کانوں اور کوئلے کی وزارت  ، آسام حکومت کے ساتھ مل کر، 27-28 جون 2025 کو گوہاٹی میں شمال مشرقی ارضیات اور کان کنی کے وزراء کا دوسرا اجلاس منعقد کر رہی ہے۔ حکومت ہند کے وژن ‘وکست بھارت’ کے تحت منعقد ہونے والے اجلاس میں شمال مشرقی ریاستوں کی تمام آٹھ ریاستوں سے شرکت کی جائے گی۔ آسام کے وزیر اعلیٰ پورے خطے کے کان کنی اور ارضیات کے وزراء کے ساتھ اس موقع پر بطور مہمان خصوصی شرکت کریں گے۔

اس تقریب کا مقصد پائیدار اور سائنسی کان کنی کو فروغ دینا، وسائل کے شعبے میں کاروبار کرنے میں آسانی کو بہتر بنانا اور متوازن علاقائی ترقی کے لیے مرکز ریاستی ہم آہنگی کو مضبوط بنانا ہے۔ ناگالینڈ میں منعقد ہونے والے پہلے کانکلیو کی کامیابی کی بنیاد پر، اس سال کے ایڈیشن میں اثر انگیز سیشنز اور ریلیز کا ایک سلسلہ پیش کیا جائے گا۔ کانوں کی وزارت کے تحت جیولوجیکل سروے آف انڈیا (جی ایس آئی) معدنیات کی تلاش کے بارے میں تازہ ترین نتائج پیش کرے گا اور خطے کے ارضیات اور وسائل کے پروفائل کے لیے وقف کلیدی اشاعتوں کی نقاب کشائی کرے گا۔ معدنیات کی تلاش کو تیز کرنے کے لیے مرکزی ایجنسیوں اور ریاستی حکومتوں کے درمیان کئی یادداشتوں پر دستخط کیے جائیں گے۔ کانوں کی وزارت نیشنل منرل ایکسپلوریشن ٹرسٹ (این ایم ای ٹی) کے تحت ہونے والی پیشرفت کو بھی اجاگر کرے گی، جو خطے میں کئی جاری تلاشی منصوبوں کی حمایت کر رہی ہے۔

ہندوستان کے معدنی نیلامی کے فریم ورک نے حالیہ مہینوں میں مضبوط رفتار حاصل کی ہے۔ مالی سال 2024-25 سے، ریاستی اور مرکزی حکومتوں کے ذریعہ کل 283 معدنی بلاکس نیلامی کے لیے رکھے گئے ہیں۔ ان میں سے، 161 معدنیات کے بلاکس کو کامیابی کے ساتھ نیلام کیا گیا ہے، جس سے مجموعی تعداد 515 ہو گئی ہے۔ اس میں آسام کے پانچ معدنی بلاکس اور اروناچل پردیش کے چار اہم معدنی بلاکس شامل ہیں، جو خطے میں صنعتی ترقی اور روزگار کے نئے راستے کھول رہے ہیں۔ یہ نیلامی ہندوستان کی اہم معدنی حکمت عملی میں مرکزی کردار ادا کرنے کے لیے شمال مشرق کی تیاری پر زور دیتی ہے، جبکہ وسائل کی تقسیم میں شفافیت اور مسابقت کے لیے حکومت کے عزم کی بھی عکاسی کرتی ہے۔

اس کے متوازی طور پر، وزارت کوئلہ کانکلیو کے دوران دو اہم اشاعتوں کا آغاز کرے گی – ‘‘شمال مشرقی خطے میں کوئلے کے وسائل اور تلاش سے متعلق رپورٹ’’ اور شمال مشرقی ریاستوں میں تجارتی کوئلے کی کان کنی پر ایک وقف شدہ کتابچہ۔ یہ دستاویزات حالیہ برسوں میں ہونے والی خاطر خواہ پیش رفت کی عکاسی کرتی ہیں، بشمول شمال مشرقی خطے میں کوئلے کے پانچ بلاکس کی کامیاب نیلامی، جس کی مشترکہ چوٹی کی درجہ بندی کی صلاحیت 1.234 ملین ٹن سالانہ ہے۔ 3.9 لاکھ میٹر سے زیادہ ڈرلنگ کی منصوبہ بندی اورآر اینڈ ڈی فنڈز کے 100فیصد استعمال کے ساتھ، وزارت خطے میں پائیدار اور اسمارٹ کوئلے کی کان کنی کے طریقوں کو فعال طور پر فروغ دے رہی ہے۔ اس کانکلیو میں این ایل سی  انڈیا لمیٹڈ کے آسام میں 1,000 میگاواٹ شمسی توانائی کی صلاحیت قائم کرنے کے کثیر جہتی  منصوبوں کو بھی پیش کیا جائے گا، جس سے 2030 تک 500 گیگا واٹ فوسل توانائی حاصل کرنے کے قومی ہدف میں تعاون دیا جائے گا۔

دو روزہ کانکلیو کانوں اور کوئلے کی وزارت کے درمیان کوششوں کے مضبوط اتحاد کی نشاندہی کرتا ہے، جو توانائی کی سلامتی کو علاقائی ترقی اور ماحولیاتی استحکام کے ساتھ ہم آہنگ کرتا ہے۔ توقع ہے کہ یہ تقریب شمال مشرقی خطے میں مستقبل کی سرمایہ کاری، اختراعات اور جامع ترقی کے لیے ایک تحریک  کے طور پر کام کرے گی۔

***

ش ح ۔ ا م ۔خ م

UN-2182