امور داخلہ اور باہمی تعاون کے مرکزی وزیر جناب امت شاہ نے آج رائے پور میں چھتیس گڑھ، آندھرا پردیش، تلنگانہ، مدھیہ پردیش، مہاراشٹر، جھارکھنڈ اور اڈیشہ کے ڈی جی پی، اے ڈی جی پی اور سینئر افسران کے ساتھ نکسل ازم پر ایک جائزہ میٹنگ کی صدارت کی۔

مرکزی وزیر داخلہ نے کہا کہ جناب وشنو دیو سائی کی حکومت اور نائب وزیر اعلیٰ اور وزیر داخلہ جناب وجے شرما کی گزشتہ ڈیڑھ سال میں سب سے بڑی کامیابی یہ ہے کہ انہوں نے پہلے سے رکے ہوئے ماؤنواز مخالف آپریشن کو رفتار دی اور ریاست کو نکسل ازم سے پاک بنانے کی طرف آگے بڑھا۔ انہوں نے کہا کہ جناب وشنو دیو سائی اور جناب وجے شرما نے نہ صرف ماؤنواز مخالف آپریشنوں کو نئی رفتار دی بلکہ آپریشن کی بار بار رہنمائی کی، سیکورٹی فورسز کے حوصلے بلند کئے اور پوری لگن کے ساتھ اس لڑائی میں اپنا اہم حصہ ڈالا۔

امور داخلہ اور باہمی تعاون کے مرکزی وزیر  نے پورے اعتماد کے ساتھ اس بات کا اعادہ کیا کہ 31 مارچ 2026 تک ملک نکسل ازم سے مکمل طور پر آزاد ہو جائے گا۔انھوں نے کہا کہ ہماری سیکورٹی فورسز کی طرف سے دکھائی گئی بہادری اور انٹیلی جنس ایجنسیوں کی طرف سے بنائی گئی درست حکمت عملی کی بنیاد پر ہم یقینی طور پر اس مقصد کو حاصل کریں گے۔ انہوں نے کہا کہ ماؤنواز جو ہر سال برسات کے موسم میں آرام کرتے ہیں اس مانسون میں سکون سے نہیں سو پائیں گے کیونکہ ہماری سیکورٹی فورسز اپنا آپریشن جاری رکھیں گی۔

جناب امت شاہ نے ان تمام نوجوانوں سے اپیل کی جو نکسل ازم کے راستے پر بھٹک گئے ہیں اور اپنے ہتھیار ڈال دیں اور چھتیس گڑھ حکومت کی ہتھیار ڈالنے کی پالیسی کا فائدہ اٹھائیں۔ نوجوانوں کو مخاطب کرتے ہوئے انہوں نے کہا کہ انہیں نئی ​​چھتیس گڑھ کی ترقی کے سفر میں شامل ہونے کا اس سے بہتر موقع نہیں ملے گا۔ جناب شاہ نے تشدد کی راہ پر چلنے والے نوجوانوں پر زور دیا کہ وہ حکومت پر بھروسہ کریں اور سماج کے مرکزی دھارے میں شامل ہوں۔ ایسا کرنے سے وہ خود بخود چھتیس گڑھ کی ترقی کے سفر میں شامل ہو جائیں گے۔ جناب شاہ نے کہا کہ مرکزی اور چھتیس گڑھ حکومت ہتھیار ڈالنے والے نکسلیوں سے کئے گئے تمام وعدوں کو پورا کرے گی اور انہیں مزید مدد دینے کی کوشش کرے گی۔

*****

U.No:2024

ش ح۔ح ن۔س ا