કેન્દ્રીય ગૃહમંત્રી અને સહકારિતા મંત્રી શ્રી અમિત શાહે આજે રાયપુરમાં છત્તીસગઢ, આંધ્રપ્રદેશ, તેલંગાણા, મધ્યપ્રદેશ, મહારાષ્ટ્ર, ઝારખંડ અને ઓડિશાના ડીજીપી, એડીજીપી અને વરિષ્ઠ અધિકારીઓ સાથે નક્સલવાદ પર સમીક્ષા બેઠકની અધ્યક્ષતા કરી હતી.

કેન્દ્રીય ગૃહમંત્રીએ જણાવ્યું હતું કે છેલ્લા દોઢ વર્ષમાં શ્રી વિષ્ણુ દેવ સાઈની સરકાર અને નાયબ મુખ્યમંત્રી અને ગૃહમંત્રી શ્રી વિજય શર્માની સૌથી મોટી સિદ્ધિ એ છે કે તેમણે અગાઉ અટકેલા નક્સલ વિરોધી અભિયાનને વેગ આપ્યો અને રાજ્યને નક્સલવાદથી મુક્ત કરવાની દિશામાં આગળ વધ્યા. તેમણે ઉમેર્યું હતું કે શ્રી વિષ્ણુ દેવ સાઈ અને શ્રી વિજય શર્માએ નક્સલ વિરોધી કામગીરીને નવી ગતિ જ આપી નથી, પરંતુ વારંવાર અભિયાનને માર્ગદર્શન પણ આપ્યું, સુરક્ષા દળોનું મનોબળ વધાર્યું અને સંપૂર્ણ સમર્પણ સાથે આ લડાઈમાં મહત્વપૂર્ણ યોગદાન આપ્યું હતું.

કેન્દ્રીય ગૃહમંત્રી અને સહકારિતા મંત્રીએ વિશ્વાસપૂર્વક પુનરોચ્ચાર કર્યો કે 31 માર્ચ, 2026 સુધીમાં દેશ સંપૂર્ણપણે નક્સલવાદથી મુક્ત થઈ જશે. તેમણે કહ્યું કે આપણા સુરક્ષા દળો દ્વારા દર્શાવવામાં આવેલી બહાદુરી અને ગુપ્તચર એજન્સીઓ દ્વારા ઘડવામાં આવેલી ચોક્કસ વ્યૂહરચનાના આધારે, આપણે ચોક્કસપણે આ લક્ષ્ય પ્રાપ્ત કરીશું. તેમણે ઉમેર્યું હતું કે દર વર્ષે વરસાદની ઋતુમાં આરામ કરતા નક્સલીઓ આ ચોમાસામાં શાંતિથી સૂઈ શકશે નહીં કારણ કે આપણા સુરક્ષા દળો તેમની કામગીરી ચાલુ રાખશે.

શ્રી અમિત શાહે નક્સલવાદના માર્ગે ભટકી ગયેલા તમામ યુવાનોને હથિયારો મૂકીને છત્તીસગઢ સરકારની શરણાગતિ નીતિનો લાભ લેવા અપીલ કરી છે. યુવાનોને સંબોધતા તેમણે કહ્યું કે નવા છત્તીસગઢની વિકાસ યાત્રામાં જોડાવા માટે તેમને આનાથી સારી તક નહીં મળે. શ્રી શાહે હિંસાના માર્ગે ચાલતા યુવાનોને સરકાર પર વિશ્વાસ રાખવા અને સમાજના મુખ્ય પ્રવાહમાં જોડાવા વિનંતી કરી. આમ કરવાથી, તેઓ આપમેળે છત્તીસગઢની વિકાસ યાત્રા સાથે જોડાઈ જશે. શ્રી શાહે કહ્યું કે કેન્દ્ર અને છત્તીસગઢ સરકારો શરણાગતિ પામેલા નક્સલવાદીઓને આપેલા તમામ વચનો પૂર્ણ કરશે અને વધુ સહાય પૂરી પાડવાનો પણ પ્રયાસ કરશે.

AP/IJ/GP/JD