ଆନ୍ଧ୍ର ପ୍ରଦେଶର ବିଶାଖାପାଟଣାରୁ ସାରା ଦେଶ ଲାଗି ଅନ୍ତର୍ଜାତୀୟ ଯୋଗ ଦିବସ ୨୦୨୫କୁ ପ୍ରଧାନମନ୍ତ୍ରୀ ଶୁଭାରମ୍ଭ କରିଥିଲେ । ନିଜ ଅଭିଭାଷଣରେ ସାରା ଦେଶକୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ସାରା ବିଶ୍ୱକୁ ଯୋଗ ହିଁ ଯୋଡୁଛି ବୋଲି ମନ୍ତବ୍ୟ ଦେଇଥିଲେ । ଜାତି ବର୍ଣ୍ଣ ଧର୍ମ ନିର୍ବିଶେଷରେ ଏହା ସମସ୍ତେ କରିଥାନ୍ତି ଓ ନିଜକୁ ସୁସ୍ଥତା ଆଡକୁ ବାଟ କଢେଇ ନେଇଥାନ୍ତି ।

ପ୍ରଧାନମନ୍ତ୍ରୀଙ୍କ ଆଭିମୁଖ୍ୟକୁ ଆଗକୁ ନେଇ ନୂଆଦିଲ୍ଲୀସ୍ଥିତ ଇନ୍ଦିରା ଗାନ୍ଧୀ ଷ୍ଟାଡିୟମରେ କେନ୍ଦ୍ର କ୍ରୀଡା ଓ ଯୁବ ବ୍ୟାପାର ମନ୍ତ୍ରୀ ଡ. ମନସୁଖ ମାଣ୍ଡଭିୟ ଯୋଗାଭ୍ୟାସ କରିଥିଲେ । ଆୟୂଷ ମନ୍ତ୍ରଣାଳୟ ପକ୍ଷରୁ ପ୍ରାୟ ଦେଢ ହଜାର ଯୋଗାଭ୍ୟାସୀଙ୍କ ସହ ମାଣ୍ଡଭିୟ ସୂର୍ଯ୍ୟ ନମସ୍କାର କରିବା ସହ ବିଭିନ୍ନ ଯୋଗାଭ୍ୟାସ କରିଥିଲେ । ଏହି ଯୋଗାଥନରେ ମାଇଁ ଭାରତ ସଂସ୍ଥା ପକ୍ଷରୁ ପ୍ରାୟ ୪୦୦ ସ୍ୱେଚ୍ଛାସେବୀ ଯୋଗାସନ କରିଥିଲେ ।

ଏକ ବିଶ୍ୱ, ଏକ ସ୍ୱାସ୍ଥ୍ୟ ଅଭିଯାନରେ କେନ୍ଦ୍ର ପକ୍ଷରୁ ଆରମ୍ଭ ହୋଇଥିବା ଯୋଗ ସଙ୍ଗମ ଥିମ ଅନୁଯାୟୀ ସ୍ପୋର୍ଟସ ଅଥରିଟି ଅଫ ଇଣ୍ଡିଆ ପକ୍ଷରୁ ବିଭିନ୍ନ କେନ୍ଦ୍ରରେ ଯୋଗ କରାଯାଇଥିଲା । ଆଂଚଳିକ କେନ୍ଦ୍ର, ଏକ୍ସେଲେନ୍ସର ଜାତୀୟ କେନ୍ଦ୍ର, ସାଇ ଟ୍ରେନିଂ କେନ୍ଦ୍ର, ଖେଲୋ ଇଣ୍ଡିଆ କେନ୍ଦ୍ର, ଖେଲୋ ଇଣ୍ଡିଆ ରାଜ୍ୟ ଏକ୍ସେଲେନ୍ସ କେନ୍ଦ୍ରରେ ଯୋଗାଭ୍ୟାସ କରାଯାଇଥିଲା ।

ଡ. ମାଣ୍ଡଭିୟଙ୍କ ଏହି କାର୍ଯ୍ୟକ୍ରମରେ ପୂର୍ବତନ ହକି କ୍ୟାପଟେନ ରାଣୀ ରାମପାଲ, କମନବେଲଥ ରୌପ୍ୟ ପଦକ ବିଜେତା ପ୍ରିୟଙ୍କା ଗୋସ୍ୱାମୀ, ବିଶିଷ୍ଟ କଳାକାର ଜାକ୍କି ଭାଗନାନି, ରକୁଲ ପ୍ରୀତ ସିଂ, ମଧୁରିମା ତୂଲୀ ପ୍ରମୁଖ ଯୋଗାଭ୍ୟାସ କରିଥିଲେ । ପରେ ଫିଟ ଇଣ୍ଡିଆ ଆଇକନ ହିସାବରେ ବିଶିଷ୍ଟ କଳାକାର ଜାକ୍କି ଭାଗନାନି, ରକୁଲ ପ୍ରୀତ ସିଂଙ୍କୁ କେନ୍ଦ୍ର ମନ୍ତ୍ରୀ ପୁରସ୍କୃତ ଓ ସମ୍ବର୍ଦ୍ଧିତ କରିଥିଲେ । ଜଲଗାଓଁରେ ମହାରାଷ୍ଟ୍ର ଜଳ ସମ୍ପଦ ବିଭାଗ ମନ୍ତ୍ରୀ ଗିରିଶ ମହାଜନ ଓ ଟେକ୍ସଟାଇଲ ମନ୍ତ୍ରୀ ସଞ୍ଜୟ ସବକରେଙ୍କ ଉପସ୍ଥିତିରେ ୩୦୦୦ ଯୋଗାଭ୍ୟାସୀଙ୍କ ସହ କେନ୍ଦ୍ର ରାଷ୍ଟ୍ରମନ୍ତ୍ରୀ ରକ୍ଷା ନିଖିଲ ଖାଦସେ ଯୋଗାଭ୍ୟାସ କରିଥିଲେ ।

ଅନ୍ତର୍ଜାତୀୟ ଯୋଗ ଦିବସ ଓ ଯୋଗ ସଙ୍ଗମ ସମ୍ପର୍କରେ ମନ୍ତବ୍‌୍ୟ ଦେଇ କେନ୍ଦ୍ର ମନ୍ତ୍ରୀ ଡ. ମାଣ୍ଡଭିୟ କହିଥିଲେ ଯେ, ଯୋଗ ଆମ ସଂସ୍କୃତି ସହ ଓତଃପ୍ରୋତ ଭାବେ ଜଡିତ ଏବଂ ଆମେ ଆମ ଦୈନନ୍ଦିନ ଜୀବନଚର୍ଯାରେ ଆପଣେଇବା ଉଚିତ । ଏକ ବିଶ୍ୱ, ଏକ ସ୍ୱାସ୍ଥ୍ୟ ଭାବଧାରାରେ ସାରା ଦେଶରେ ଯୋଗ ଦିବସ ପାଳନ କରାଯାଉଛି । ଫିଟ ଇଣ୍ଡିଆ କଲଟ ଯୋଗାଥନ, କ୍ରୀଡା ମନ୍ତ୍ରଣାଳୟ ପକ୍ଷରୁ ବି ଯୋଗ ଦିବସ ପାଳନ କରାଯାଉଛି । ଫିଟନେଓ ଓ ଉତମ ସ୍ୱାସ୍ଥ୍ୟ ଲାଗି ଯୋଗର ନିତାନ୍ତ ଆବଶ୍ୟକତା ରହିଛି ଯାହାକୁ ଆମେ ପ୍ରତିଦିନ ଅଭ୍ୟାସ କରିବା ଉଚିତ ।

ଯୋଗ ସଙ୍ଗମ କାର୍ଯ୍ୟକ୍ରମ ଯଶସ୍ୱୀ ପ୍ରଧାନମନ୍ତ୍ରୀ ମୋଦୀ ଓ କେନ୍ଦ୍ର କ୍ରୀଡା ମନ୍ତ୍ରୀ ମାଣ୍ଡଭିୟଙ୍କ ଯୋଗୁଁ ସଫଳ ହୋଇପାରିଛି ବୋଲି ଫିଟ ଇଣ୍ଡିଆ ଆଇକନ ହିସାବରେ ସମ୍ବର୍ଦ୍ଧିତ ହେବା ପରେ କଳାକାର-ନିର୍ମାତା ଜାକ୍କି ଭାଗନାନି କହିଥିଲେ । ଫିଟ ରହିବାକୁ ହେଲେ ପ୍ରତିଦିନ ଯୋଗାଭ୍ୟାସ ଗୁରୁତ୍ୱ ରହିଛି । ଜଣେ ଶାରୀରିକ ଭାବରେ ସୁସ୍ଥ ରହିଲେ ମାନସିକ ଭାବେ ବି ସୁସ୍ଥ ରହିପାରିବ । ମେଦବହୁଳତା ଓ ବାୟୁ ପ୍ରଦୂଷଣକୁ ପ୍ରତିହତ କରିବା ଲାଗି ରବିବାରରେ ସାଇକେଲ ଚଢି ଖୋଦ କ୍ରୀଡାମନ୍ତ୍ରୀ ସଚେତନତା ସୃଷ୍ଟି କରୁଥିବାରୁ ତାଙ୍କୁ ଏହି ଅବସରରେ ଜାକ୍କି ବି ଧନ୍ୟବାଦ ଜ୍ଞାପନ କରିଥିଲେ । ମନ୍ତ୍ରୀଙ୍କ ଭାବଧାରାରେ ଦୀକ୍ଷିତ ହୋଇ ପ୍ରତିଦିନ ଯୋଗାଭ୍ୟାସ କରି ନିଜ ଓଜନ ଦେଢ ଶହରୁ ୭୫କୁ ଖସାଇ ପାରିଥିବା କଳାକାର-ନିର୍ମାତା ଭାଗନାନି କହିଥିଲେ ।

ସେହିପରି କ୍ରୀଡା ମନ୍ତ୍ରଣାଳୟ ଓ ଭାରତ ସରକାର ପକ୍ଷରୁ ଆରମ୍ଭ କରାଯାଇଥିବା ଏହି ଯୋଗାଥନରେ ଅଂଶଗ୍ରହଣ କରି ଫିଟ ଇଣ୍ଡିିଆ କପଲ ଆଇକନ ଭାବରେ ପୁରସ୍କୃତ ହୋଇଥିବାରୁ ରକୁଲପ୍ରୀତ କ୍ରୀଡା ମନ୍ତ୍ରୀଙ୍କୁ ଧନ୍ୟବାଦ ଜ୍ଞାପନ କରିଥିଲେ । ଫିଟ ଫଣ୍ଡାକୁ ଲୋକଙ୍କ ପାଖରେ ପହଂଚାଇବାକୁ ଉଭୟ ଜାକ୍କି ଓ ସେ ଚେଷ୍ଟା ଜାରି ରଖିବେ ବୋଲି ରକୁଲ କହିଛନ୍ତି । ଯୋଗ କରିବା ଲାଗି କୌଣସି ଫ୍ୟାନ୍ସି ଜିମର ଆବଶ୍ୟକତା ନାହିଁ ବରଂ ଘରେ ରହି ବି ଜଣେ ଯୋଗାଭ୍ୟାସ କରିପାରିବ ବୋଲି ରକୁଲ କହିଛନ୍ତି ।

ଉଭୟ କଲଟ ଫିଟ ଓ ଫିଟ ଇଣ୍ଡିଆ ପକ୍ଷରୁ ଆରମ୍ଭ କରାଯାଇଥିବା ଏହି ଅଭିଯାନ ଲୋକଙ୍କ ଭିତରେ ଜାଗରୁକତା ସୃଷ୍ଟି କରି ଏକତ୍ୱ ଭାବ ପ୍ରତିଷ୍ଠା କରୁଛି । କଲଟ ଫିଟର ପ୍ରାୟ ଶହେଟି କେନ୍ଦ୍ରରେ ପ୍ରାୟ ଏକ କୋଟି ସୂର୍ଯ୍ୟ ନମସ୍କାର କରାଯାଇଥିଲା । ଫିଟ ଇଣ୍ଡିଆ କଲଟ ଯୋଗାଥନ ଓ ଯୋଗ ସଙ୍ଗମ ପରି ବିଭିନ୍ନ କାର୍ଯ୍ୟକ୍ରମ ମାଧ୍ୟମରେ ଆୟୂଷ ଓ କ୍ରୀଡା ମନ୍ତ୍ରଣାଳୟ ପକ୍ଷରୁ ଲୋକଙ୍କ ପାଖରେ ଯୋଗକୁ ପହଂଚାଇବାକୁ ଉଦ୍ୟମ କରାଯାଇଥିବାରୁ ପଦ୍ମଶ୍ରୀ ବିଜେତା ରାଣୀ ରାମପାଲ ସରକାରଙ୍କୁ ଧନ୍ୟବାଦ ଜଣାଇଥିଲେ । ପ୍ରକାଶ ଥାଉ କି, ୨୦୧୮ରେ ଜାକର୍ତାଠାରେ ଭାରତୀୟ ହକି ଟିମକୁ ରୌପ୍ୟ ପଦକ ଦେବାରେ ଓ ୨୦୧୬ ଏସିଆନ ଚାମ୍ପିଆନ୍ସ ଟ୍ରଫିରେ ସ୍ୱର୍ଣ୍ଣ ପଦକ ଦେବାରେ ରାଣୀ ରାମପାଲ ଅଗ୍ରଣୀ ଭୂମିକା ନିଭାଇଥିଲେ ।

କେବଳ କ୍ରୀଡା ପ୍ରେମୀ କାହିଁକି ସମସ୍ତେ ନିଜ ଦୈନନ୍ଦିନ ଜୀବନରେ ଯୋଗାଭ୍ୟାସ କରିବା ଉଚିତ । ଏକ ସୁସ୍ଥ ଭାରତ ହିଁ ଏକ ବିକଶିତ ଭାରତ ନିର୍ମାଣ କରିପାରିବ ବୋଲି ପ୍ରଧାନମନ୍ତ୍ରୀ ମୋଦୀ ଏକଦା କହିଥିଲେ । ଯେତେ ବେଳେ ନିଜ ବ୍ୟସ୍ତତା ଭିତରୁ ସମୟ ବାହାର କରି ଖୋଦ ମନ୍ତ୍ରୀ ସାଇକେଲ ଚଢି ସଚେତନତାର ବାର୍ତୀ ବାଂଟୁଛନ୍ତି ସେତେ ବେଳେ ଦେଶର ପ୍ରତି ନାଗରିକ ତାହା ବି କରିବା ଉଚିତ । ଏକ ବିଶ୍ୱ, ଏକ ସ୍ୱାସ୍ଥ୍ୟ ଚଳିତ ଯୋଗାଥନର ବାର୍ତା ଓ ମନ୍ତ୍ର । ଆମ ସମସ୍ତଙ୍କର ସ୍ୱାସ୍ଥ୍ୟ ହିଁ ଆମର ମୂଲ୍ୟ ସମ୍ପଦ ବୋଲି ହକି ଖେଳାଳି ରାଣୀ ରାମପାଲ ବର୍ଣ୍ଣନା କରିଥିଲେ ।

ସେହିପରି ଅଲିମ୍ପିକରେ ରେସ ବାକିଂରେ ଚର୍ଚ୍ଚାରେ ରହିଥିବା ପ୍ରିୟଙ୍କା ଗୋସ୍ୱାମୀ ସମସ୍ତେ ଯୋଗ କରି ଫିଟ ରହିବାକୁ ପରାମର୍ଶ ଦେଇଥିଲେ । ଏଗାରତମ ଆନ୍ତର୍ଜାତିକ ଯୋଗ ଦିବସରେ ଉଭୟ ଶାରୀରିକ ଓ ମାନସିକ ସୁସ୍ଥତା ଲାଗି ଯୋଗ ହିଁ ଏକମାତ୍ର ମାଧ୍ୟମ ବୋଲି ସେ ଅବତାରଣା କରିଥିଲେ । ୩୦-୩୫ କିଲୋମିଟର ଚାଲିବା କୌଣସି କ୍ରୀଡା ପ୍ରେମୀ ପାଇଁ ସହଜ କଥା ନୁହେଁ । କିଲୋମିଟରଟିଏ ଚାଲିବା ପରେ ମନ ଅସ୍ଥିର ହୁଏ । ସେହି ମନରେ ସ୍ଥିରତା ଆଣିବା ଲାଗି ଯୋଗର ପ୍ରମୁଖ ଭୂମିକା ରହିଛି ବୋଲି ପ୍ରିୟଙ୍କା ବର୍ଣ୍ଣନା କରି କହିଥିଲେ । ତେଣୁ ମୁଁ ପ୍ରତିଦିନ ଯୋଗାଭ୍ୟାସ କରି ମନକୁ ନିୟନ୍ତ୍ରିତ କରିଥାଏ ବୋଲି ସେ କହିଥିଲେ । ଶାରୀରିକ ବ୍ୟାୟାମ, ସୁସ୍ଥ ଖାଦ୍ୟ, ନିଶା ବାରଣ ପରି କିଛି ପଦକ୍ଷେପ ନିଆଗଲେ ଆମ ଭାରବ୍ର୍ ଏକ ସବଳ ଓ ସଶକ୍ତ ଦେଶ ଭାବରେ ଦଣ୍ଡାୟମାନ ହୋଇପାରିବ ।

PBD