جہاز رانی اور آبی گزر گاہوں کےمرکزی وزیر جناب سربانند سونووال نے بہار میں اندرون ملک آبی گزر گاہوں کو فروغ دینے کے لیے بڑے انفراسٹرکچر پیکج کا اعلان کیا۔ یہ اعلانات آج پٹنہ میں قومی آبی شاہراہ-1 (دریائے گنگا) پر اندرون ملک آبی گزر گاہوں کی ترقی کے حوالے سے منعقدہ مشاورتی ورکشاپ کے افتتاحی اجلاس کے دوران کیے گئے۔ یہ اپنی نوعیت کی پہلی ورکشاپ تھی جو پٹنہ میں منعقد ہوئی۔

اس مشاورتی ورکشاپ کی صدارت مرکزی وزیر جناب سربانند سونووال نے کی، جبکہ اس میں مرکزی وزیر برائے ٹیکسٹائلز جناب گری راج سنگھ، بہار کے نائب وزرائے اعلیٰ جناب سمرات چودھری اور جناب وجے کمار سنہا، بہار کے وزیر آبی وسائل  جناب وجے کمار چودھری، بہار کی وزیر ٹرانسپورٹ محترمہ شیلا کماری، اتر پردیش کے وزیر ٹرانسپورٹ جناب دیا شنکر سنگھ، مغربی بنگال کے وزیر آبپاشی و آبی گزرگاہیں  جناب انس رنجن بھونیا، رکن پارلیمان  جناب روی شنکر پرساد (پٹنہ صاحب ایل ایس سی) اورجناب سُداما پرساد (آرہ ایل ایس سی) شریک تھے۔

اس کے علاوہ بہار کے چیف سیکریٹری جناب امِرت لال مینا، ان لینڈ واٹر ویز اتھارٹی آف انڈیا (آئی ڈبلیو اے آئی )کے چیئرمین  جناب وجے کمار اور ریاستی و مرکزی حکومت کے اعلیٰ افسران بھی اس موقع پر موجود تھے۔

ورکشاپ سے خطاب کرتے ہوئے جناب سربانند سونووال نے کہاکہ ‘‘آج اس مشاورتی ورکشاپ کے ذریعے ہم اپنے اجتماعی عزم کا اعادہ کرتے ہیں کہ ہم اپنی ندیوں، خاص طور پر نیشنل واٹرویز کو مستقبل کی ترقی کے انجن کے طور پر ازسرنو زندہ کریں گے، نہ کہ صرف ماضی کی باقیات کے طور پر۔ ان لینڈ واٹر ٹرانسپورٹ(آئی ڈبلیو ٹی )سب سے صاف، کم خرچ اور ماحول دوست نقل و حمل کا ذریعہ ہے۔‘‘

گنگا ندی کی بحالی کے سیاق و سباق کو بیان کرتے ہوئے مرکزی وزیر جناب سربانند سونووال نے کہاکہ ’’میں مقدس ندی گنگا کو سجدہ تعظیم پیش کرتا ہوں  جو اس دھرتی پر زندگی، تہذیب اور روحانی توانائی کا دائمی سرچشمہ ہے۔ اس کی روانی میں صدیوں کی ثقافت، حکمت، روزگار اور تسلسل پوشیدہ ہے۔ گنگا صرف ایک ندی نہیں بلکہ برصغیر کی دھڑکن ہےاور آج، جب ہم پٹنہ میں جمع ہیں  جو اس کی آغوش میں پروان چڑھی ایک تاریخی سرزمین ہے ۔ ہم یہ عہد کرتے ہیں کہ ہم اس مقدس ندی کو قوم کی جدید ترقی و تبدیلی کے سفر سے ہم آہنگ کریں گے۔’’

جناب سونووال نے بہار میں اندرون ملک آبی شاہراہوںکو فروغ دینے کے لیے بڑے انفراسٹرکچر منصوبوں کا اعلان کیا۔انہوں نے کہاکہ ‘‘پٹنہ میں کوچی واٹر میٹرو ماڈل کی طرز پر واٹر میٹرو شروع کرنے پر غور کیا جا رہا ہے، مکمل یا جزوی طور پر، جو مقامی جغرافیہ پر منحصر ہوگا۔ یہ نظام دریائے گنگا کے دونوں کناروں کو جوڑنے اور دارالحکومت کے لیے صاف، مؤثر اور جدید شہری آمد و رفت کا حل فراہم کرے گا۔’’

انہوں نے مزید اعلان کیا کہ پٹنہ میں ایک شپ ریپئر (جہاز مرمت) سہولت قائم کی جائے گی جو اندرون ملک جہازرانی کے ایک مضبوط نظام کی معاونت کرے گی۔ یہ مرکز صرف مرمت ہی نہیں بلکہ نئے جہازوں کے بنانے کا اہل بھی ہوگا۔ یہ اقدامات دریائے گنگا کو پائیدار شہری ٹرانسپورٹ کی لائف لائن کے طور پر زندہ کرنے کی سمت ایک اہم قدم ہیں اور ماحول دوست و دریا پر مرکوز ترقی کو فروغ دینے کی قومی کوششوں کے عین مطابق ہیں۔

جناب سونووال نے مزید کہاکہ بہار حکومت وزارت برائے بندرگاہیں، جہازرانی و آبی گزرگاہیں اورآئی ڈبلیو اے آئی کے درمیان ایک مشترکہ ٹاسک فورس قائم کی جائے گی، جو بہار میں دریائے گنگا (قومی آبی گزر گاہ-1) پر پائیدار ترقی کے امکانات کو تلاش کرے گی۔

پٹنہ میں واقع نیشنل ان لینڈ نیویگیشن انسٹی ٹیوٹ این آئی این آئی کو ‘‘سینٹر آف ایکسی لینس’’ میں اپ گریڈ کیا جا رہا ہے، جس کے لیے نئی سرمایہ کاری کی جائے گی تاکہ موجودہ سہولیات کو بہتر بنایا جا سکے اور نئی سہولیات شامل کی جا سکیں۔این آئی این آئی ان لینڈ واٹر نیویگیشن کے میدان میں ملک کا سرکردہ ادارہ ہے۔ قومی آبی گزر گاہ-1 (دریائے گنگا) پر مسافروں کی نقل و حرکت کو فروغ دینے کے لیے، مرکزی وزیر  جناب سربانند سونووال نے اعلان کیاکہ‘‘نریندر مودی حکومت بہار کے عوام کے لیے اندرونِ ملک آبی نقل و حمل کو ایک قابلِ اعتماد، مؤثر، اور ماحول دوست ذریعہ بنانے کے لیے پرعزم ہے۔ ریاست کے مختلف اضلاع میں موجودہ 21 کمیونٹی جیٹیوں کے علاوہ مزید 16 نئی کمیونٹی جیٹیاں تیار کی جا رہی ہیں، جن سے مقامی کسانوں، تاجروں اور چھوٹے کاروباری افراد کو براہِ راست دریائی منڈیوں تک رسائی حاصل ہوگی۔’’

انہوں نے کہاکہ‘‘پٹنہ شمالی بہار کے لیے لاجسٹکس ہب بننے جا رہا ہے، جبکہ کلوگھاٹ ٹرمینل نیپال کی سمت سے ہونے والی تجارت کے لیے کلیدی مرکز ہوگا، جو سڑک اور ریل نیٹ ورکس سے مربوط ہوگا۔’’

چار مقامات پرفوری فانٹون اوپننگ میکانزم (کیو پی او ایم) کی تنصیب، دو آر او-پی اے ایکس ٹرمینلز، اور دو ہائبرڈ الیکٹرک کیٹامران ویسلس کی تعیناتی کے ذریعے، مسافروں کے لیے ایک ہموار، ماحول دوست اور سستی سفری سہولت یقینی بنائی جا رہی ہے۔

جناب سونووال نے کہاکہ’’یہ اعلانات محض پالیسی بیانات نہیں ہیں بلکہ ہمارے ارادے کا اعلان ہیں  کہ گنگا سے فیض یافتہ بہار، اندرونِ ملک آبی تجارت، سیاحت اور اختراع کا ایک نمایاں مرکز بنے گا۔ ان بنیادی ڈھانچوں کی بدولت پٹنہ دریائے گنگا (قومی آبی گزر گاہ-1) پر واٹر ٹرانسپورٹ کا مرکز ابھر کر سامنے آئے گا۔’’

وزیر موصوف نے 2014 سے اب تک وزیر اعظم جناب نریندر مودی کی متحرک قیادت میں اندرون ملک آبی گزر گاہوں کے شعبے میں ہونے والی ترقی کو اجاگر کرتے ہوئے کہاکہ‘‘وزیر اعظم نریندر مودی کی بصیرت افروز قیادت میں ان لینڈ واٹر ویز نے حیران کن ترقی کی ہے۔ کارگو کی نقل و حرکت میں 700 فیصد سے زائد اضافہ ہوا ہے، جب کہ فعال واٹرویز کی تعداد تقریباً 800 فیصد بڑھی ہے۔ سرمایہ کاری میں بھی پانچ گنا (510فیصد) اضافہ ہوا ہے۔ یہ شعبہ اب ہماری ملٹی ماڈل لاجسٹکس حکمت عملی کا ایک اہم ستون بن چکا ہے  جو بھاری اور بڑی مقدار میں سامان کی ترسیل کے لیے سڑک اور ریل کا ایک صاف ستھرا، سستا متبادل فراہم کرتا ہے۔‘‘

انہوں نے مزید کہا’’نیشنل واٹرویز پر ریور کروز روٹس کی تعداد میں بھی 2013 کے بعد سے 333 فیصد کا شاندار اضافہ ہوا ہے، جو ہمارے آبی راستوں میں بڑھتی ہوئی سیاحت کی صلاحیت کو ظاہر کرتا ہے۔’’

جَل مارگ وکاس پروجیکٹ (جے ایم وی پی)، جو جنوری 2018 میں 5,061.15 کروڑ روپے کی لاگت سے منظور  کیا گیا تھا ، اس  کا مقصد قومی آبی راستہ-1 (ہلدیا سے وارانسی تک) کی 1,390 کلومیٹر لمبی لکیر کو معین گہرائی اور چوڑائی کے ساتھ تیار کرنا ہے تاکہ آسان اور محفوظ نیویگیشن ممکن ہو سکے۔مئی 2025 تک، اس منصوبے کی 68.86فیصدتکمیل ہو چکی ہے اور ٹریفک میں 220 فیصداضافہ ہوا ہے، جو 15-2014میں 5.05 ملین میٹرک ٹن (ایم ایم ٹی) سے بڑھ کر 25-2024 میں 16.38 ملین میٹرک ٹن ہو گیا ہے۔

ماحولیاتی تحفظ کے لیے اس منصوبے میں زیرو لیکوئڈ ڈسچارج، بایو ٹوائلٹس اور گنگی ڈولفن کی حفاظت کے لیے پنگرز جیسی سہولیات بھی شامل کی گئی ہیں۔ جے ایم وی پی کے کلیدی اجزاء میں کارگو ٹرمینلز کی ترقی، این ڈبلیو-1کے وارانسی سے ہلدیہ تک کے ساتھ ساتھ فیئر وے کی دیکھ بھال، اور بحری تالے شامل ہیں جو جہاز کے ٹرانزٹ ٹائم کو کم کرتے ہیں۔ اس پروجیکٹ میں کمیونٹی جیٹیز بھی شامل ہیں جو روزانہ 1.22 لاکھ مسافروں کی آمدورفت میں مدد کرتی ہیں، کم لاجسٹکس لاگت کے لیے کارگو ایگریگیشن ہب، اور تاخیر کو کم کرنے کے لیے کوئیک پونٹون اوپننگ میکانزم۔ اس میں مزید سہولیات جیسے جہاز کی مرمت کا مرکز، کروز ٹرمینل، اور تربیتی انفراسٹرکچر شامل ہیں تاکہ بڑھتے ہوئے اندرون ملک آبی گزرگاہوں کے ماحولیاتی نظام کو سپورٹ کیا جا سکے۔

نریندر مودی حکومت کے تحت ہندوستان کے اندرون ملک آبی گزرگاہوں کے شعبے میں ایک قابل ذکر تبدیلی آئی ہے ، جو 2014 میں صرف تین (03) آپریشنل نیشنل واٹر ویز (این ڈبلیو) سے بڑھ کر آج 11 ریاستوں میں 29 آپریشنل این ڈبلیو ہو گئی ہے ۔ کل 111 این ڈبلیو کا اعلان کیا گیا ہے ، جو 23 ریاستوں اور 4 مرکز کے زیر انتظام علاقوں میں پھیلے ہوئے ہیں ، جن کی مجموعی بحری لمبائی 20,187 کلومیٹر ہے ۔ اس بڑھتے ہوئے نیٹ ورک کی مدد کے لیے ، 124 ٹرمینلز-جن میں 27 مستقل اور 97 فلوٹنگ ٹرمینلز شامل ہیں-اب کام کر رہے ہیں ۔ مالی سال 25-2024 میں قومی آبی گزرگاہوں پر کارگو کی نقل و حرکت 145.84 ملین ٹن تک پہنچ گئی ، جو 2014 سے 20.89 فیصد کی سی اے جی آر سے بڑھ رہی ہے ۔ مالی سال 25 میں  85فیصد کارگو کوئلہ ، خام لوہا ، کوک ، یت ، فلائی ایش ، گاڑیاں ، مسافر ، چونا پتھر ، کلینکر اور سیمنٹ پر مشتمل تھا ، جس سے اندرون ملک آبی گزرگاہوں کو بلک اور بھاری مال برداری کے لیے ایک اہم ذریعہ کے طور پر اجاگر کیا گیا ۔

آئی ڈبلیو اے آئی فی الحال کم سے کم دستیاب گہرائی (ایل اے ڈی) کا جائزہ لینے کے لیے ہر ماہ 10,000 کلومیٹر طول البلد سروے کر رہا ہے جس میں مالی سال 24 میں 11 ریاستوں سے مالی سال 27 تک 22 ریاستوں اور 4 مرکز کے زیر انتظام علاقوں تک توسیع کی جائے گی ۔ اس شعبے کی بڑھتی ہوئی اہمیت کی عکاسی کرتے ہوئے ، 35,000 کروڑ روپے کے پروجیکٹ پائپ لائن-بشمول پی پی پی اقدامات-اگلے پانچ سالوں کے لیے تیار کیے گئے ہیں ۔ حکومت کے عزم کو سالانہ بجٹ میں 48فیصد اضافے سے مزید واضح کیا گیا ہے ، جو مالی سال 24 میں 1,203 کروڑ روپے سے بڑھ کر مالی سال 25 میں 1,752 کروڑ روپے ہو گیا ہے ۔مشاورتی ورکشاپ کے افتتاحی اجلاس میں بندرگاہوں ، جہاز رانی اور آبی گزرگاہوں کی وزارت ، ان لینڈ واٹر ویز اتھارٹی آف انڈیا (آئی ڈبلیو اے آئی) کی بہار ، مغربی بنگال ، اتر پردیش اور جھارکھنڈ کی حکومتوں کے اعلیٰ حکام بھی موجود تھے ۔

*********

ش ح۔م  ح۔اش ق

Urdu No-1787