’وکست کرشی سنکلپ ابھیان‘ کے تحت، مرکزی زراعت اور کسانوں کی بہبود کے وزیر جناب شیوراج سنگھ چوہان نے آج تلنگانہ میں کسانوں سے بات چیت کی۔

انہوں نے سب سے پہلے تلنگانہ کے رنگا ریڈی ضلع کے مانسون پلی گاؤں کا دورہ کیا تاکہ کسانوں سے بات چیت کی جاسکے، اس کے بعد رام چندر گوڈا گاؤں میں کسان چوپال کا دورہ کیا۔ بات چیت کے دوران، کسانوں نے وزیر کو بتایا کہ وہ تنوع اور مربوط کاشتکاری کے طریقوں کو اپنا رہے ہیں، جس سے ان کی پیداوار اور آمدنی دونوں کو بڑھانے میں مدد ملی ہے۔ کسان چوپال کے بعد، شری چوہان نے منگل پلی، ابراہیم پٹنم میں منعقدہ ایک پروگرام میں کسانوں سے خطاب کیا۔

جناب چوہان نے کہا کہ  کہ زراعت ہندوستانی معیشت کی ریڑھ کی ہڈی ہے، اور کسان اس کی روح ہیں۔ انہوں نے کہا، ’میں وزیر اعظم جناب نریندر مودی کی طرف سے مجھے سونپی گئی ذمہ داری کو پورا کرنے کے لیے تہہ دل سے پرعزم ہوں۔ آج ان کی تیسری میعاد کے پہلے سال کی تکمیل کا موقع ہے، اور میں انھیں اپنی پرتپاک مبارکباد اور دلی خواہشات پیش کرتا ہوں۔‘

انہوں نے مزید کہا کہ کسانوں کی خوشحالی حکومت کا اولین مقصد ہے۔ انہوں نے زور دے کر کہا کہ ترقی یافتہ ہندوستان کی تعمیر کے لیے ترقی یافتہ زراعت اور معاشی طور پر بااختیار کسان بہت ضروری ہیں۔ زراعت ملک کی تقریباً نصف آبادی کے لیے معاش کا بنیادی ذریعہ ہے اور قومی جی ڈی پی میں 18 فیصد حصہ ڈالتی ہے۔ اس سال کی چوتھی سہ ماہی میں، اس شعبے نے 5.4فیصد  کی شرح نمو ریکارڈ کی، جو کہ ہندوستانی کسانوں کی غیر متزلزل لگن اور محنت کا ثبوت ہے۔ ’ہمارے کسانوں نے غیر معمولی کارکردگی کا مظاہرہ کیا ہے، لیکن ہمیں اس سے بھی بڑی کامیابیوں کے لیے کوشش جاری رکھنی چاہیے،‘ انہوں نے کہا۔

وزیر نے چار کلیدی مقاصد کا خاکہ پیش کیا جن کے لیے بنیادی طور پر توجہ مرکوز کرنے کی ضرورت ہے، اناج کے کافی ذخائر کو برقرار رکھ کر قومی غذائی تحفظ کو یقینی بنانا؛ کسانوں کی پیداوار کی مناسب قیمتوں کی ضمانت؛ ملک کی 1.45 بلین آبادی کو غذائیت سے بھرپور خوراک فراہم کرنا؛ مٹی کی زرخیزی کا تحفظ اور آنے والی نسلوں کے لیے پائیدار زراعت کو یقینی بنانا۔

جناب چوہان نے کہا کہ وکشت کرشی سنکلپ ابھیان کا آغاز اجتماعی شرکت کے جذبے کے ساتھ کیا گیا تھا۔ اس اقدام کا مقصد لیب سے زمین کے درمیان فرق کو ختم کرنا ہے، اس بات کو یقینی بنانا کہ سائنسی تحقیق براہ راست کسانوں تک پہنچ جائے۔ اس کو آسان بنانے کے لیے، 16,000 سائنسدانوں پر مشتمل 2,170 ٹیموں کو گائوں کا دورہ کرنے اور علاقے کے مخصوص زرعی علم کو پھیلانے کے لیے تعینات کیا گیا ہے۔ بہترین طریقوں اور فصلوں کی اقسام کے بارے میں سفارشات مقامی مٹی کی زرخیزی، موسمی حالات اور علاقائی ضروریات کی بنیاد پر تیار کی جا رہی ہیں۔

’کسان ہی سچا سائنسدان ہے‘جناب چوہان نے تبصرہ کیا۔ اس کے مطابق، میں نے زرعی سائنسدانوں کو ہدایت کی ہے کہ وہ کسانوں کو درپیش عملی چیلنجوں کو فعال طور پر سنیں اور ان حقیقی دنیا کے مسائل کو حل کرنے کے لیے اپنی تحقیقی کوششوں کو ہم آہنگ کریں۔

انہوں نے جوار (شری انا) کو عالمی سطح پر تسلیم شدہ اناج کے طور پر قائم کرنے کے حکومت کے عزم پر زور دیا۔ انہوں نے مزید کہا، ’’مجھے یقین ہے کہ تلنگانہ میں انڈین انسٹی ٹیوٹ آف ملٹس ریسرچ اس عالمی اقدام کی قیادت کرنے میں اہم رول ادا کرے گا۔ انہوں نے تلنگانہ میں پام آئل کی کاشت کو فروغ دینے کے لیے تحقیق کو بڑھانے پر بھی زور دیا۔

جناب چوہان نے رنگا ریڈی ضلع میں کاشتکاری کے اختراعی طریقوں کی تعریف کی۔ انہوں نے کھجور اور پپیتے کی انٹرکراپنگ، ٹماٹر اور پھولوں کی کاشت اور مقامی کسانوں کی نرسریوں کی ترقی جیسے کامیاب اقدامات پر روشنی ڈالی۔ "ایک کسان نے بتایا کہ وہ 3 لاکھ فی ایکڑ تک کما رہا ہے۔ ہم آپ کی خوشحالی کی راہ میں حائل ہر رکاوٹ کو دور کرنے کے لیے تندہی سے کام کر رہے ہیں، انہوں نے کہا۔

انہوں نے مزید کہا کہ حکومت کامیاب بین الاقوامی زرعی تحقیق کو ہندوستانی کسانوں کے لیے قابل رسائی بنانے کے لیے پرعزم ہے۔ انہوں نے مارکیٹ انٹروینشن اسکیم کے آغاز کا اعلان کیا، جس کے تحت مرکزی حکومت ریاستی سرحدوں کے پار فروخت ہونے والے ٹماٹر، آلو اور پیاز کی پیداوار کے لیے نقل و حمل کے اخراجات برداشت کرے گی، اس کے علاوہ ذخیرہ کرنے کی مناسب سہولتیں فراہم کی جائیں گی۔

چھوٹے اور پسماندہ کسانوں کو زیادہ سے زیادہ فوائد حاصل کرنے کے قابل بنانے پر بھی خصوصی زور دیا جا رہا ہے۔ پیداوار اور آمدنی میں اضافہ کو یقینی بنانے کے لیے مربوط کاشتکاری کے ماڈلز کو فعال طور پر فروغ دیا جا رہا ہے۔

اپنے اختتامی کلمات میں، شری چوہان نے تصدیق کی کہ وزیر اعظم نریندر مودی کی قیادت میں، ہندوستانی زراعت کو تبدیل کرنے کی کوششیں غیر متزلزل لگن اور عجلت کے ساتھ کی جا رہی ہیں۔ انہوں نے یقین دلایا کہ ہم ایسی پالیسیاں تشکیل دے رہے ہیں جو ہمارے کسان بھائیوں اور بہنوں کے لیے زیادہ سے زیادہ فائدہ کو یقینی بنائیں گی۔

ش ح ۔ ال

U-1611