لوک سبھا کے اسپیکر جناب اوم برلا نے آج کہا کہ ہندوستان اپنے نوجوانوں کی ذہانت اور قابلیت کے ذریعہ عالمی چیلنجوں کا حل تلاش کرنے میں دنیا کی قیادت کر رہا ہے۔ انہوں نے کہا کہ ہندوستان کے نوجوانوں نے ملک کی سماجی، اقتصادی اور تکنیکی ترقی میں بہت بڑا کردار ادا کیا ہے اور انہیں ملک کی بہتری کے لئے جدید ترین ٹیکنالوجی اور اختراعات کا استعمال کرنے کی تلقین کی ہے۔ انڈین انسٹی ٹیوٹ آف ٹیکنالوجی (آئی آئی ٹی)، جودھ پور میں ایک تقریب سے خطاب کرتے ہوئے جناب برلا نے کہا کہ ہندوستان جدید سائنس کی دوہری طاقتوں اور اپنے بھرپور روحانی ورثے کو بروئے کار لاتے ہوئے عالمی سطح پر آگے بڑھ رہا ہے۔

انہوں نے مشاہدہ کیا کہ ہندوستان کے نوجوان آج نوکری تلاش کرنےکے بجائے نوکری فراہم کرنے والے بننے کی طرف بڑھ رہے ہیں اور اس تبدیلی میں آئی آئی ٹی نے اہم کردار ادا کیا ہے۔ انہوں نے کہا کہ آئی آئی ٹی سے فارغ التحصیل افراد نے ملک میں اسٹارٹ اپ ایکو سسٹم کو مضبوط بنانے، معاشی ترقی کو تقویت دینے میں اہم کردار ادا کیا ہے۔ انہوں نے مزید کہا کہ پوری دنیا میں ہنر مندی اور اختراعی خیالات سے بھرے ہندوستانی نوجوانوں کی بہت زیادہ مانگ ہے۔ انہوں نے زور دیا کہ ہندوستان کے نوجوانوں کو ‘وکست بھارت’ کے راستے پر ملک کے سفر میں سرگرم حصہ دار بننا چاہیے۔ اس موقع پرجناب برلا نے آج آئی آئی ٹی، جودھپور کے جدید ترین لیکچر ہال کمپلیکس – II کا افتتاح کیا۔

لوک سبھا اسپیکر نے اس بات پر زور دیا کہ ملک کی ترقی اس کی روحانی روایات میں جڑی لازوال اقدار کے ساتھ جدید ٹیکنالوجی کے ہم آہنگ انضمام میں مضمر ہے۔ انہوں نے کہا کہ یہ متوازن نقطہ نظر نہ صرف جدت اور ترقی کوفروغ دیتا ہے بلکہ اس بات کو بھی یقینی بناتا ہے کہ ترقی اخلاقی، جامع اور پائیدار رہے۔ سائنسی علم اور روحانی حکمت دونوں کو اپناتے ہوئےہندوستان مجموعی قومی ترقی کی طرف ایک منفرد راستہ بنا رہا ہے۔

جناب اوم برلا نے کھلونوں کی تیاری سے لے کر دفاعی سازوسامان تک مختلف شعبوں میں خود انحصاری حاصل کرنے میں ہندوستان کی کامیابی کو بھی اجاگر کیا۔ جناب برلا نے زور دیا کہ ہندوستان کے ڈیجیٹل ماحولیاتی نظام کے ساتھ مل کر اس طرح کی کوششوں نے آتم نربھر بھارت کے لیے ہمارے عزم کو نمایاں فروغ دیا ہے۔

ملک میں تکنیکی تعلیم کو آگے بڑھانے میں آئی آئی ٹی کے کردار کی ستائش کرتے ہوئے لوک سبھا اسپیکر نے کہا کہ ملک کے ہر کالج اور یونیورسٹی کو جدت اور عمدگی کا مرکز بننے کی کوشش کرنی چاہئے۔ انہوں نے اس بات پر زور دیا کہ اعلیٰ تعلیمی اداروں کو روایتی تدریسی طریقوں سے آگے بڑھ کر طلباء میں تخلیقی صلاحیتوں اور مسائل کے حل کو فعال طور پر فروغ دینا چاہیے۔ تحقیق انٹرپرینیورشپ اور صنعت کے ساتھ تعاون کی حوصلہ افزائی کرکےیہ ادارے سائنس، ٹیکنالوجی اور علم پر مبنی شعبوں میں ہندوستان کی ترقی کو آگے بڑھانے میں اہم رول ادا کرسکتے ہیں۔ انہوں نے مزید کہا کہ آئی آئی ٹی میں زیر تعلیم طلباء نے جدید ٹیکنالوجی کو ہندوستانی سوچ اور نئے نقطہ نظر کے ساتھ جوڑ کر ہندوستان کا سر فخر سے بلند کیا ہے۔

اسپیکر نے اس بات پر روشنی ڈالی کہ تعلیمی مقامات کو محض  راہ سیکھنے کی جگہیں نہیں ہونا چاہیے ، بلکہ متحرک ماحولیاتی نظام ہونا چاہیے جہاں خیالات کو پروان چڑھایا جائے ، صلاحیتوں کو فروغ دیا جائے اور مستقبل کے قائدین کی تشکیل کی جائے ۔ انہوں نے معیاری تعلیم ، اساتذہ کی ترقی اور جدید ترین بنیادی ڈھانچے پر نئی توجہ مرکوز کرنے پر زور دیا تاکہ اس بات کو یقینی بنایا جا سکے کہ ہندوستانی کالج اور یونیورسٹیاں عالمی سطح پر مقابلہ کرنے اور قومی ترقی میں بامعنی تعاون کرنے کے لیے اچھی طرح سے لیس ہوں ۔

آئی آئی ٹی جودھ پور کے شاندار سفر کا حوالہ دیتے ہوئے جناب برلا نے  کہا کہ آئی آئی ٹی جودھ پور نے اپنے مرکوز نقطہ نظر اور محنت کے ساتھ عالمی تحقیق ، اختراع اور معاشرے میں سائنسی مزاج کو فروغ دینے کے شعبوں میں اہم اقدامات کیے ہیں ۔ انہوں نے کہا کہ آئی آئی ٹی جودھ پور نے راجستھان کے صحرا کے علاقے میں نوجوانوں کو ایک نیا نقطۂ نظر پیش کرکے تبدیلی کا کردار ادا کیا ہے ۔ اسپیکر نے آئی آئی ٹی جودھ پور کے ڈائریکٹر پروفیسر اویناش کے اگروال کی دور اندیش قیادت اور وکست بھارت 2047 کے وژن کے لیے اختراع ، دفاعی ٹیکنالوجی اور پائیدار ترقی میں انسٹی ٹیوٹ کے اہم اقدامات کی تعریف کی ۔

لوک سبھا اسپیکر نے کہا کہ انسٹی ٹیوٹ، جغرافیائی طور پر ایک چیلنجنگ علاقے میں واقع ہے،جو امید اور ترقی کی ایک کرن بن چکا ہے، جو نوجوان ذہنوں کو عالمی معیار کی تعلیم، جدید تحقیق اور اختراعی سوچ تک رسائی کے ساتھ بااختیار بنا رہا ہے۔

اس موقع پر جناب برلا نے آئی آئی ٹی میں‘ریسرچ انیشیٹو گرانٹ’ بھی تقسیم کی جس سے محققین اور اختراع سے متعلق پروجیکٹوں کی حوصلہ افزائی ہوگی۔ اس کے ساتھ انہوں نے ادارے کی نئی آفیشل ویب سائٹ بھی لانچ کی اور کیمپس میں ایک پودا بھی لگایا۔

۔۔۔۔۔۔۔۔۔۔۔۔۔۔۔۔۔

ش ح۔ م ح ۔ اش ق

Urdu No. 1601