نائب صدرجمہوریہ ہند جناب جگدیپ دھنکھڑ نے آج کہا کہ’’ ملک میں سیاسی جماعتوں کو سیاسی درجہ حرارت کو کم کرنا ہوگا ۔ سیاسی جماعتوں کے درمیان ہونے والی بات چیت  میں تصادم  کی کوئی جگہ نہیں ہے۔بات چیت پرسکون ہونی چاہیے ۔ دوستوں ، جمہوریت کی تعریف بات چیت اور گفتگو سے ہوتی ہے ۔‘‘
انہوں نے مزید کہا کہ ’’ہندوستان ایک ترقی پذیر وفاقی معاشرہ ہے جہاں مرکز اور ریاستوں کے درمیان ہم آہنگی ہونی چاہیے ۔ قائدین اور سیاسی جماعتوں کے درمیان بات چیت بہت ضروری ہے-بات چیت کے لئے سرد رویہ  ہماری قومی ذہنیت کے لیے اچھی نہیں ہوگی ۔‘‘
آج بنگلورو میں صنعت کے قائدین اور صنعت کاروں کے ساتھ بات چیت کرتے ہوئے ، انہوں نے کہا کہ ’’قومی سلامتی کے مسائل ، ہماری قوم پرستی سے جڑے مسائل ، اور ہماری ترقی سے جڑے مسائل کو قومی چشمے سے دیکھا جانا چاہیے ، نہ کہ متعصبانہ چشمے سے ۔ مجھے پوری دنیا کے لوگوں کی سیاسی ذہانت پر شک نہیں ہے-ایسے لوگ تمام سیاسی جماعتوں میں موجود  ہیں ۔ ‘‘
اظہار رائے کی آزادی کے ویدک اصول پر زور دیتے ہوئے ، نائب صدر جمہوریہ نے کہا  کہ ’’اظہار رائے اور بحث کی آزادی کے بغیر جمہوری اقدار کو بیان نہیں کیا جا سکتا ۔ اگر کوئی آپ کے اظہار رائے کے حق پر حملہ کرتا ہے ، مایوس کرتا ہے یا اسے منظم کرتا ہے تو جمہوریت میں کمی ہے ۔ ‘‘
صنعتی رجحانات پر تبصرہ کرتے ہوئے ، انہوں نے ایک کہاکہ ’’صنعت میں لوگ ، سیاست کے برعکس ، بیلنس شیٹ سے مطمئن ہیں ۔ لیکن گرین فیلڈ منصوبے اس رفتار سے سامنے نہیں آرہے ہیں جس سے انہیں آنا چاہیے ۔ براہ کرم سوچیں ، مساوی روزگار اور ترقی کو یقینی بنانے کے لیے کلسٹروں میں مل جائیں ۔ ‘‘

کارپوریٹ سیکٹر سے اپنے منافع کو زرعی شعبے کے ساتھ شیئر کرنے کی اپیل کرتے ہوئے جناب دھنکھڑ نے کہا  کہ ’’کارپوریٹس کے لیے وقت آگیا ہے کہ وہ اپنے منافع کو زرعی شعبے کے ساتھ ساجھاکریں ۔ تحقیق یا کھیتوں میں آپ کی سرمایہ کاری خیراتی کام نہیں ہے-یہ ایک فائدہ مند سرمایہ کاری ہے ۔‘‘

زراعت کے شعبے کو صنعت کے ساتھ مربوط کرنے پر بات کرتے ہوئے نائب صدر جمہوریہ نے کہا کہ ’’میں ایک کسان برادری سے آیا ہوں، زراعت کا شعبہ ملک کی ترقی میں اہم کردار ادا کرتا ہے۔ لیکن فی الحال، یہ صرف زرعی مصنوعات کی پیداوار کر رہا ہے - یہ مارکیٹنگ چین کا حصہ نہیں ہے۔‘‘

صنعت اور کھیت کے درمیان ہم آہنگی کی اپیل کرتے ہوئے انہوں نے مزید کہا کہ ’’صنعت کو زرعی شعبے کے ساتھ زیادہ ہم آہنگی پیدا کرنے کے لیے ذہن سازی کرنی چاہیے ۔ کسانوں کو سہارا دینے کی ضرورت ہے ؛ زرعی صنعت کاروں کو ابھرنا چاہیے ، لیکن  ان کی مدد کئے بغیر ایسا ممکن نہیں ہے  ۔‘‘
ہندوستان کی ترقی کے مستقبل پر ، جناب دھنکھڑ نے تحقیق اور اختراع کے کردار پر زور دیتے ہوئے کہاکہ ہمیں اعلی درجے کی تحقیق میں مشغول ہونا چاہیے ۔ ہماری تحقیقی صلاحیت بھارت کی عالمی حیثیت کو اجاگر کرے گی ۔ ہماری تکنیکی اختراع اس بات کی وضاحت کرے گی کہ ہم کتنے محفوظ ہیں ۔

اسٹریٹجک امن کا حوالہ دیتے ہوئے ، انہوں نے وضاحت کی کہ امن کاروبار اور لوگوں کی ہم آہنگی کے لیے بنیادی چیز ہے ، لیکن امن پر کبھی سودے بازی نہیں کی جاتی-یہ طاقت سے آتا ہے ۔ سب سے بڑا امن تب حاصل ہوتا ہے جب ہم جنگ کے لیے تیار ہوتے ہیں ۔‘‘

قومی سلامتی میں صنعت کے کردار کے ارتقا پر روشنی ڈالتے ہوئے ، انہوں نے کہا ، ’’ایک وقت تھا جب صنعت صرف اسلحہ کے کارخانے تیار کرتی تھی ۔ اب اسے ٹیکنالوجی میں قیادت کرنی چاہیے ۔ تحقیق طویل مدتی ترقی کی ریڑھ کی ہڈی ہے ‘‘۔

یہ اعلان کرتے ہوئے کہ ہندوستان ترقی کی راہ پر گامزن ہے اور اسے روکا نہیں جاسکتا، نائب صدر نے کہا،’’ہندوستان اب امکانات کا ملک نہیں ہے - یہ ایک ابھرتا ہوا ملک ہے۔ ’ترقی یافتہ ہندوستان‘ اب ہمارا خواب نہیں رہا - یہ ہمارا مقصد ہے۔ لیکن ہمیں فی کس آمدنی میں کئی گنا اضافہ کرکے ایک بڑی جست لگانی ہوگی۔"

ایک عملی نقطہ نظر پر زور دیتے ہوئے، انہوں نے مزید کہا، "ہمیں اپنی معاشی حیثیت کو اپنے آبادیاتی حجم - 1.4 بلین افراد کے ساتھ جوڑنا چاہیے۔ تجرباتی اندازوں پر، فی کس آمدنی میں آٹھ گنا اضافہ ہونا چاہیے۔‘‘

اس موقع پر کرناٹک کے گورنر جناب تھاور چند گہلوت ، کرناٹک کے نائب وزیر اعلی جناب ڈی کے شیو کمار ، ایم پی جناب لہر سنگھ ، وزیر ، حکومت کرناٹک ، ڈاکٹر ایم سی سدھاکر اور دیگر معززین بھی موجود تھے ۔

************

ش ح۔ س ک۔ ف ر

U-1578