ঙসি য়ুনাইতেদ কিংদমগী ফোরেন সেক্রেতরি দেবিদ লাম্মিনা প্রধান মন্ত্রী শ্রী নরেন্দ্র মোদী উনখ্রে।

ইন্দিয়া-য়ু.কে ফ্রি ত্রেদ এগ্রিমেন্ত অমসুং দবল কন্ত্রিব্যুসন কনভেন্সন মাইপাক্না লোইশিনখিবদা প্রধান মন্ত্রীনা অপেনবা ফোঙদোকখ্রে অমসুং মাইপাকপা অসি লাক্নবা নাকল অনিমক্না মপুংফানা থবক পায়খৎখিবদা থাগৎপা ফোঙদোকখ্রে।

লৈবাক অনিগী মরীশিং ফগৎলকপদা প্রধান মন্ত্রীনা তরাম্না ওকখ্রে অমসুং ইন্দিয়া-য়ু.কে কমপ্রেহেন্সিপ স্ত্রাতেজিক পার্তনরশিপ হেন্না চেৎশিনহনবদা অপেনবা ফোঙদোকখ্রে। তেক্নোলোজি সেকুরিতি ইনিসিয়েতিপকী মখাদা মখা তানা পুন্না থবক তৌমিন্নবদা মহাক্না তরাম্না ওকখ্রে অমসুং মসিনা থাজনবা লৈহনগনি অমসুং অনৌবা থবকশিং পায়খৎপা ঙমহনগনি হায়না ফোঙদোকখি।

ললোন-ইতিক অমসুং শেন থাদবা, ঙাক-শেন অমসুং তেক্নোলোজি, ইন্নোবেসন অমসুং ক্লিন ইনর্জি য়াওনা মরুওইবা হিরমশিংদা মখা তানা মতেং পাংনবা হেনগৎহন্নবা য়ু.কেনা পাম্লিবা অদু ফোরেন সেক্রেতরি লাম্মিনা ফোঙদোকখি। ইন্দিয়া-য়ু.কে ফ্রি ত্রেদ এগ্রিমেন্তনা লৈবাক অনিমক্ত অনৌবা শেন-থুমগী খুদোংচাবশিং ফংহনগনি হায়না মহাক্না থাজবা ফোঙদোকখি।

লুচিংবা অনিনা লমদম লমদমগী অমসুং মালেমগী ওইবা ৱাফমশিং খন্নখি। য়ু.কে ফোরেন সেক্রেতরিনা পেহালগাম তেরর এত্তেক্ত য়াম্না কন্না য়ানিংদবা ফোঙদোকখি অমসুং ঙমখৈ ৱাংমদগী চৎথরবা তেরোরিজম ভারতনা থেংনরিবা অসিদা শৌগৎপা ফোঙদোকখি। তেরোরিজম অমসুং মসি শৌগৎলিবা মীওইশিংগী মথক্ত মালেমগী অকনবা থবক পায়খৎপগী দরকার ওইবা অদু প্রধান মন্ত্রীনা ফোঙদোকখি।

প্রধান মন্ত্রীনা য়ু.কেগী প্রধান মন্ত্রী সার কৈর স্তরমরদা মহাক্কী য়াইফ পাউজেল পীখি অমসুং নাকল অনিনা খুদোংচাগদবা মতম অমদা মহাক ভারত্ত লাক্নবা চেবাউ পীখি।

***