மத்திய அறிவியல் மற்றும் தொழில்நுட்பத் துறை (தனிப்பொறுப்பு) இணையமைச்சர், பிரதமர் அலுவலகம், பணியாளர் நலன், பொதுமக்கள் குறை தீர்ப்பு, ஓய்வூதியம், அணுசக்தி மற்றும் விண்வெளித் துறை இணையமைச்சர் டாக்டர் ஜிதேந்திர சிங், மின்கலன் உச்சி மாநாடு 2025 இல் உரையாற்றினார். வலுவான சுற்றுச்சூழல் அமைப்பு, பொருளாதாரத்தில் இந்தியா சமீபத்தில் எட்டப்பட்ட 4வது இடத்திலிருந்து 3வது இடத்திற்கு முன்னேற உதவும் என்றும், குறைந்த கார்பன் தொழில்நுட்பங்கள் இந்தியா நிகர பூஜ்ஜிய 2070 இலக்கை அடைவதற்கு முக்கியமாகும் என்றும் வலியுறுத்தினார்.

“சவால்களை எதிர்கொள்வது, புதுமை மற்றும் அளவிடுதல் தீர்வுகளை இயக்குதல்” என்ற கருப்பொருளில் பேசிய டாக்டர் ஜிதேந்திர சிங், ஆராயப்படாத இருப்புக்கள் மற்றும் வளங்களை ஆராய்வது மற்றும் குறைந்த கார்பன் எரிசக்தி துறைகளில் புதுமை ஆகியவை பொருளாதார மதிப்பை அதிகரிக்கும் என்றும், கார்பன் தடத்தையும் குறைக்கும் என்றும் எடுத்துரைத்தார். இது 2070க்குள் இந்தியாவின் லட்சியமான நிகர பூஜ்ஜிய இலக்குடன் ஒத்துப்போகிறது.

இந்த சூழலில், ஜம்மு & காஷ்மீரில் உள்ள பரந்த லித்தியம் இருப்புக்களின் சமீபத்திய கண்டுபிடிப்புகளும் குறிப்பிட்டார், அவை நிகர பூஜ்ஜிய 2070 இலக்கை அடைவதற்கு பங்களிப்பதாக உறுதியளிக்கின்றன என்றும், மேலும் இதுவரை பயன்படுத்தப்படாத அத்தகைய வளங்களை ஆராய்ந்து பயன்படுத்த தீவிர முயற்சிகளுக்கு அமைச்சர் அழைப்பு விடுத்தார்.

"மின்கல உற்பத்தி, மின் இயக்கம் மற்றும் நிலையான தொழில்நுட்ப சுற்றுச்சூழல் அமைப்புகளில் புதுமைகள் மூலம் இந்தியாவின் சுத்தமான எரிசக்தி மாற்றத்தை முன்னேற்றுவதில் அறிவியல் மற்றும் தொழில்நுட்பத் துறை (டிஎஸ்டி) முக்கிய பங்கு வகிக்கிறது," என்று டாக்டர் சிங் கூறினார்.

இந்திய மின்கல சுற்றுச்சூழல் அமைப்பில் கண்டறியும் தன்மை, செயல்திறன் மற்றும் அளவிடுதல் ஆகியவற்றை செயல்படுத்துவதில் மாற்றத்தை ஏற்படுத்தக்கூடியது என்று அமைச்சரால் விவரிக்கப்பட்ட டிஎஸ்டி இன் கீழ் மின்கல ஆதார் முன்முயற்சி தொடங்கப்பட்டது உச்சிமாநாட்டில் ஒரு முக்கிய அறிவிப்பாகும். இந்த அமைப்பு ஒவ்வொரு மின்கல தொகுப்பிற்கும் ஒரு தனித்துவமான டிஜிட்டல் அடையாளத்தை ஒதுக்கும், இது உற்பத்தி தோற்றம், மின்கல வேதியியல், பாதுகாப்பு சான்றிதழ்கள் மற்றும் வாழ்க்கைச் சுழற்சி செயல்திறன் ஆகியவற்றைக் கண்காணிக்க உதவுகிறது. இது வெப்ப நிகழ்வுகள், சார்ஜ்-டிஸ்சார்ஜ் சுழற்சிகள் மற்றும் ஆயுட்கால நிலை போன்ற முக்கியமான அளவுருக்களையும் கண்காணிக்கும், முன்கணிப்பு பராமரிப்பு மற்றும் திறமையான மறுசுழற்சியை எளிதாக்கும். கூடுதலாக, மின்கல ஆதார் போலி தயாரிப்புகளின் பரவலைத் தடுக்கவும் நுகர்வோர் நம்பிக்கையை அதிகரிக்கவும் ஒரு ஒழுங்குமுறை கருவியாகச் செயல்படும், அதே நேரத்தில் சுழற்சி பொருளாதார முயற்சிகளை ஆதரிக்கும். மின்கல மேலாண்மை அமைப்புகள் (பிஎம்எஸ்), செயற்கை நுண்ணறிவால் இயக்கப்பட்ட பிரச்னை அறிதல் மற்றும் தேசிய மின்சார வாகன தரவுத்தளங்களுடன் ஒருங்கிணைப்பதன் மூலம், மின்கல ஆதார் இந்தியாவின் வளர்ந்து வரும் மின்கல நுண்ணறிவு சுற்றுச்சூழல் அமைப்பின் ஒரு மூலக்கல்லாக மாறும்.

இந்தியாவின் தூய்மையான எரிசக்தி மாற்றத்தை இயக்கும் பல எதிர்கால முயற்சிகளின் வெற்றியை டாக்டர் ஜிதேந்திர சிங் அடிக்கோடிட்டுக் காட்டினார், இதில் மேம்பட்ட வேதியியல் செல்களுக்கான உற்பத்தியுடன் இணைந்த ஊக்கத்தொகை (PLI) திட்டங்கள், மின்-இயக்க மாற்றம், மற்றும் பிரதமரின் மின்னணு இயக்கம் மற்றும் மின்சார வாகனங்களின் விரைவான தத்தெடுப்பு மற்றும் உற்பத்தி திட்டங்கள் போன்ற முதன்மைத் திட்டங்களும் அடங்கும். அனுசந்தன் தேசிய ஆராய்ச்சி அறக்கட்டளையின் கீழ் அர்ப்பணிக்கப்பட்ட மஹா மின்சார வாகனங்கள் திட்டம், மின்சார வாகன சுற்றுச்சூழல் அமைப்பை வலுப்படுத்துவதற்கும் நிலையான போக்குவரத்து தீர்வுகளை ஊக்குவிப்பதற்கும் ஒரு குறிப்பிடத்தக்க படியாக அவர் எடுத்துரைத்தார்.

காலநிலை பேச்சுவார்த்தைகளில் இந்தியாவின் பயணத்தை நினைவுகூர்ந்த டாக்டர் ஜிதேந்திர சிங், தயக்கத்துடன் பங்கேற்பவராகக் கருதப்படுவதிலிருந்து காலநிலை உறுதிப்பாடுகளில் உலகளாவிய தலைவராக உருவெடுப்பதற்கான குறிப்பிடத்தக்க மாற்றத்தைக் குறிப்பிட்டார். இந்தியாவின் நீண்டகால கார்பன் வெளியேற்ற இலக்குகளை கோடிட்டுக் காட்டும் நிகர பூஜ்ஜியம் 2070; நிலையான தனிநபர் மற்றும் சமூக நடத்தைகளை ஊக்குவிப்பதை நோக்கமாகக் கொண்ட சுற்றுச்சூழலுக்கான வாழ்க்கை முறை; போன்ற முக்கிய முயற்சிகளின் தொடக்கம் மற்றும் வெற்றியே இந்த குறிப்பிடத்தக்க மாற்றத்திற்குக் காரணம் என்று அவர் கூறினார். மற்றும் இந்த வெற்றிகளின் வாயிலாக சர்வதேச சூரிய சக்தி கூட்டணி, சூரிய ஆற்றல் மற்றும் உலகளாவிய தூய்மையான எரிசக்தி கூட்டாண்மைகளை ஊக்குவிப்பதில் இந்தியாவின் தலைமையை அடிக்கோடிட்டுக் காட்டும் ஒரு கூட்டு தளமாக முன்னேறியுள்ளதையும் அவர் குறிப்பிட்டார். "இந்த முயற்சிகள் உலகளாவிய மன்றங்களில் இந்தியாவின் மதிப்பை உயர்த்தியுள்ளன, மேலும் நிலைத்தன்மை மற்றும் காலநிலை நடவடிக்கைகளில் நமது தலைமையை உறுதிப்படுத்தியுள்ளன," என்று அவர் கூறினார்.

கடந்த பத்தாண்டுகளில் அறிவியல் மற்றும் புதுமைத் துறையில் இந்தியா அடைந்துள்ள குறிப்பிடத்தக்க முன்னேற்றத்தை டாக்டர் ஜிதேந்திர சிங் எடுத்துரைத்தார். உலகளாவிய புதுமை குறியீட்டில் இந்தியா தனது நிலையை கணிசமாக மேம்படுத்தி, 81வது இடத்திலிருந்து 39வது இடத்திற்கு உயர்ந்துள்ளது என்று அவர் குறிப்பிட்டார். நாடு அதன் தொடக்க சுற்றுச்சூழல் அமைப்பில் அதிவேக வளர்ச்சியைக் கண்டுள்ளது, 2014 இல் வெறும் 350 தொடக்க நிறுவனங்களிலிருந்து 2025 இல் 1.7 லட்சத்திற்கும் அதிகமாக விரிவடைந்து, உலகின் மூன்றாவது பெரிய புத்தொழில் சுற்றுச்சூழல் அமைப்பாக மாறியுள்ளது. இந்த வளர்ச்சியை நிறைவு செய்யும் வகையில், அறிவியல் மற்றும் தொழில்நுட்பத்துறை அதன் பட்ஜெட்டில் 926% அதிகரிப்பைக் கண்டுள்ளது, இது ₹2,777 கோடியிலிருந்து ₹28,509 கோடியாக உயர்ந்துள்ளது, இது புதுமை மற்றும் ஆராய்ச்சியை வளர்ப்பதற்கான அரசாங்கத்தின் வலுவான உறுதிப்பாட்டை பிரதிபலிக்கிறது.

விண்வெளி, அணுசக்தி மற்றும் அறிவியல் துறைகளை தனியார் பங்கேற்புக்குத் திறப்பதன் மூலம் புத்தொழில் சுற்றுச்சூழல் அமைப்பை வலுப்படுத்துவதற்கான அரசாங்கத்தின் உறுதிப்பாட்டை அமைச்சர் வலியுறுத்தினார்.

இந்தியாவின் அறிவியல், தொழில்நுட்பம் மற்றும் நிலைத்தன்மை காரணிகளில் முக்கிய பங்கு வகிக்கும் பல முக்கிய பிரமுகர்கள் இந்த உச்சிமாநாட்டில் கலந்து கொண்டனர். இவர்களில் அறிவியல் மற்றும் தொழில்நுட்பத் துறையின் செயலாளர் பேராசிரியர் அபய் கரண்டிகர்; ஐக்கிய நாடுகளின் சுற்றுச்சூழல் திட்டத்தின்  திரு. ஆஷர் லெசல்ஸ்; அறிவியல் மற்றும் தொழில்நுட்பத்திற்கான சிறப்பு மையத்தின் பிரிவின் தலைவர் டாக்டர் அனிதா குப்தா ஆகியோர் அடங்குவர்.  

***

(Release ID: 2132105)
AD/SM/RR/DL

(Release ID: 2132143)