புது தில்லியில் உள்ள  தேசிய வேளாண் அறிவியல் வளாகத்தில் உள்ள பாரத ரத்னா சி. சுப்பிரமணியம் ஆடிட்டோரியத்தில், இந்தியாவில் இரண்டு மரபணு திருத்தப்பட்ட அரிசி வகைகளை  மத்திய வேளாண்மை மற்றும் விவசாயிகள் நலத்துறை அமைச்சர் திரு  சிவராஜ் சிங் சௌஹான் இன்று அறிவித்தார். இது அறிவியல் ஆராய்ச்சி மற்றும் புதுமைத் துறையில் ஒரு புதிய தொடக்கத்தைக் குறிக்கிறது. இந்த நிகழ்வில் ஏராளமான விஞ்ஞானிகள் மற்றும் விவசாயிகள் கலந்து கொண்டனர்.

கூட்டத்தில் உரையாற்றிய திரு  சிவராஜ் சிங் சௌஹான், "பிரதமர் மோடியின் தலைமையில், வளர்ந்த நாடு என்ற இந்தியாவின் தொலைநோக்குப் பார்வை நனவாகி வருகிறது, மேலும் விவசாயிகள் செழிப்பை நோக்கி நகர்கின்றனர். இன்றைய சாதனை பொன் எழுத்துக்களால் எழுதப்படும். விடுதலையின் அமிர்தப் பெருவிழாவின்  போது, விவசாய சவால்களை சமாளிக்க நவீன நுட்பங்களைப் பின்பற்றுமாறு பிரதமர் மோடி விவசாயிகளுக்கு அழைப்பு விடுத்தார். அவரது வார்த்தைகளால் ஈர்க்கப்பட்டு, இந்த புதிய வகைகளை உருவாக்குவதன் மூலம் ஐசிஏஆர் விஞ்ஞானிகள் விவசாயத் துறையில் அபாரமான  சாதனைகளைச் செய்துள்ளனர் " என்று கூறினார்.

இந்தப் புதிய பயிர்களின் வளர்ச்சி உற்பத்தியை மேம்படுத்துவதோடு மட்டுமல்லாமல் சுற்றுச்சூழல் ரீதியாகவும் நேர்மறையான பலன்களைத் தரும் என்று அவர் மேலும் கூறினார். இது பாசன நீரைச் சேமிக்கும் மற்றும் பசுமை இல்ல வாயு வெளியேற்றத்தைக் குறைக்கும், இதன் மூலம் சுற்றுச்சூழல் நிர்பந்தத்தை குறைக்கும். உற்பத்தி அதிகரிப்பு மற்றும் சுற்றுச்சூழல் பாதுகாப்பு ஆகிய இரண்டு நன்மைகளையும் பெறுவதற்கு இது ஒரு சிறந்த எடுத்துக்காட்டாகும் என அவர் தெரிவித்தார்.

வரும் காலங்களில், உணவுப் பாதுகாப்பை உறுதி செய்தல், சத்தான உற்பத்தியை அதிகரித்தல் மற்றும் இந்தியாவிற்கும் உலகிற்கும் உணவை வழங்குதல் ஆகியவற்றின் தேவை உள்ளது என்றும், அதே நேரத்தில் இந்தியாவை உலகின் உணவுக் கிடங்காக மாற்றுவது அவசியம் என்றும் திரு சௌஹான் வலியுறுத்தினார். "எங்கள் முயற்சிகள் ஆண்டுதோறும் 48,000 கோடி ரூபாய் மதிப்புள்ள பாசுமதி அரிசியை ஏற்றுமதி செய்ய வழிவகுத்ததில் நாங்கள் பெருமைப்படுகிறோம்" என்றும் அவர் கூறினார்.

சோயாபீன், துவரம் பருப்பு, பயறு, உளுந்து, எண்ணெய் வித்துக்கள் மற்றும் பருப்பு வகைகளின் உற்பத்தியை அதிகரிக்க மேலும் நடவடிக்கைகள் எடுக்க வேண்டியதன் அவசியத்தையும் அமைச்சர் வலியுறுத்தினார்.

"மைனஸ் 5 மற்றும் பிளஸ் 10" சூத்திரத்தையும் திரு சௌஹான் அறிமுகப்படுத்தினார், இது நெல் சாகுபடி பரப்பளவை 5 மில்லியன் ஹெக்டேர் குறைத்து அதே நேரத்தில் அரிசி உற்பத்தியை 10 மில்லியன் டன் அதிகரிப்பதை உள்ளடக்கியது என்பதை விளக்கினார். இது பருப்பு வகைகள் மற்றும் எண்ணெய் வித்துக்களை பயிரிடுவதற்கான இடத்தை விடுவிக்கும் என அவர் தெரிவித்தார்.

விவசாயிகள், குறிப்பாக இளம் விவசாயிகள், மேம்பட்ட விவசாய நுட்பங்களைப் பின்பற்றுமாறு அவர் வலியுறுத்தினார். "விவசாய ஆராய்ச்சியை விவசாயிகளிடம் எடுத்துச் செல்ல வேண்டும். விவசாய விஞ்ஞானிகளும் விவசாயிகளும் ஒன்று சேரும்போது, அற்புதங்கள் நடக்கும்" என்று திரு. சௌஹான் கூறினார்.

மத்திய வேளாண்மை மற்றும் விவசாயிகள் நலத்துறை இணையமைச்சர் திரு. பகீரத் சௌத்ரி, விஞ்ஞானிகளை மெய்நிகர் முறையில் வாழ்த்தினார்.

ஐசிஏஆர் இன்று அறிவித்த புதிய வகைகள் இந்திய விவசாயத்தில் ஒரு திருப்புமுனையாக அமையும் என்று மத்திய வேளாண்மை மற்றும் வேளாண் அமைச்சகத்தின் செயலாளர் திரு. தேவேஷ் சதுர்வேதி எடுத்துரைத்தார்:

இந்த சந்தர்ப்பத்தில், இரண்டு வகைகளின் ஆராய்ச்சிக்கு பங்களித்த விஞ்ஞானிகளை அமைச்சர் கௌரவித்தார். டாக்டர் விஸ்வநாதன் சி, டாக்டர் கோபால கிருஷ்ணன் எஸ், டாக்டர் சந்தோஷ் குமார், டாக்டர் ஷிவானி நாகர், டாக்டர் அர்ச்சனா வாட்ஸ், டாக்டர் சோஹம் ரே, டாக்டர் அசோக் குமார் சிங் மற்றும் டாக்டர் பிரஞ்சல் யாதவ் ஆகியோர் பூசா டிஎஸ்டி ரைஸ் 1 இல் செய்த பணிகளுக்காக கௌரவிக்கப்பட்டனர். டாக்டர் சத்யேந்திர குமார் மங்ருதியா, டாக்டர் ஆர்.எம். சுந்தரம், டாக்டர் ஆர். அப்துல் ஃபியாஸ், டாக்டர் சி.என். நீர்ஜா, மற்றும் டாக்டர் எஸ்.வி. சாய் பிரசாத் ஆகியோர் டிஆர்ஆர் ரைஸ் 100 (கம்லா) வளர்ச்சிக்கு அளித்த பங்களிப்பிற்காக கௌரவிக்கப்பட்டனர்.

பின்னணி:

ஐசிஏஆர் இந்தியாவின் முதல் மரபணு திருத்தப்பட்ட அரிசி வகைகளை உருவாக்கியுள்ளது - டிஆர்ஆர் ரைஸ் 100 (கம்லா) மற்றும் பூசா டிஎஸ்டி ரைஸ் 1. இந்த வகைகள் அதிக உற்பத்தி, காலநிலைக்கு ஏற்ப மாற்றக்கூடிய தன்மை மற்றும் நீர் பாதுகாப்பு ஆகியவற்றின் அடிப்படையில் புரட்சிகரமான மாற்றங்களை ஏற்படுத்தும் ஆற்றலைக் கொண்டுள்ளன.

2018 ஆம் ஆண்டில், தேசிய வேளாண் அறிவியல் நிதியத்தின் கீழ் சம்பா மசூரி மற்றும் MTU 1010 ஆகிய இரண்டு முக்கிய அரிசி வகைகளை மேம்படுத்த ஐசிஏஆர் மரபணு திருத்தும் ஆராய்ச்சியைத் தொடங்கியது. இந்த ஆராய்ச்சியின் விளைவாக பின்வரும் நன்மைகளை வழங்கும் இரண்டு மேம்பட்ட வகைகள் உள்ளன:

* மகசூலில் 19% அதிகரிப்பு.

* பசுமை இல்ல வாயு வெளியேற்றத்தில் 20% குறைப்பு.

7,500 மில்லியன் கன மீட்டர் பாசன நீர் சேமிப்பு.

* வறட்சி, உப்புத்தன்மை மற்றும் காலநிலை நிர்பந்தங்களுக்கு மேம்பட்ட சகிப்புத்தன்மை.

 

DRR அரிசி 100 (கமலா) வகை சம்பா மசூரி (BPT 5204) அடிப்படையில் ஐதராபாத்தில் உள்ள ICAR-IIRR ஆல் உருவாக்கப்பட்டது. இதன் நோக்கம் ஒரு பயிருக்கு தானியங்களின் எண்ணிக்கையை அதிகரிப்பதாகும்.

இரண்டாவது வகை, பூசா டிஎஸ்டி ரைஸ் 1, MTU 1010 ஐ அடிப்படையாகக் கொண்டு, புது தில்லியில் உள்ள ஐசிஏஆர்-ஐஏஆர்ஐ உருவாக்கியது. இந்த வகை உப்பு மற்றும் கார மண்ணில் 9.66% முதல் 30.4% வரை விளைச்சலை அதிகரிக்க முடியும், மேலும் உற்பத்தியில் 20% வரை அதிகரிக்கும்.

இந்த வகைகள் ஆந்திரப் பிரதேசம், தெலுங்கானா, கர்நாடகா, தமிழ்நாடு, புதுச்சேரி, கேரளா (மண்டலம் VII), சத்தீஸ்கர், மகாராஷ்டிரா, மத்தியப் பிரதேசம் (மண்டலம் V), ஒடிசா, ஜார்கண்ட், பீகார், உத்தரப் பிரதேசம் மற்றும் மேற்கு வங்காளம் (மண்டலம் III) போன்ற மாநிலங்களுக்காக உருவாக்கப்பட்டுள்ளன.

இந்த வகைகளின் வளர்ச்சி, வளர்ந்த நாடாக மாறுவதற்கும் நிலையான விவசாயத்தை ஊக்குவிப்பதற்கும் இந்தியாவின் இலக்கை நோக்கி ஒரு குறிப்பிடத்தக்க படியாகும். 2023-24 பட்ஜெட்டில், விவசாயப் பயிர்களில் மரபணு திருத்தத்திற்காக இந்திய அரசு ரூ 500 கோடியை ஒதுக்கியுள்ளது. எண்ணெய் வித்துக்கள் மற்றும் பருப்பு வகைகள் உட்பட பல பயிர்களுக்கு ஐசிஏஆர் ஏற்கனவே மரபணு திருத்த ஆராய்ச்சியைத் தொடங்கியுள்ளது.

****

(Release ID: 2126802)

SM/PKV/RJ

(Release ID: 2126856) Visitor Counter : 100