مرکزی وزیر ریلوے اشونی ویشنو نے آج کہا کہ پونے شہر کی تاریخی اور صنعتی اہمیت کے پیش نظر حکومت نے پونے ریلوے اسٹیشن کو مکمل طور پر نئے سرے سے بنانے کا فیصلہ کیا ہے۔ انہوں نے کہا کہ اس بڑے اقدام کے تحت ریلوے اسٹیشن پر چار نئے پلیٹ فارم سمیت عالمی معیار کی سہولیات فراہم کی جائیں گی۔

وہ مہاراشٹر میں پونے کے قریب ہڈپسر سے دو نئی ایکسپریس ٹرینوں - ہڈپسر-جودھپور ایکسپریس اور ایم جی آر چنئی سنٹرل-بھگت کی کوٹھی ایکسپریس کو ہری جھنڈی دکھانے کے بعد خطاب کر رہے تھے۔ اس موقع پر تعاون اور شہری ہوا بازی کے وزیر مملکت مرلی دھر موہول، اعلیٰ اور تکنیکی تعلیم اور پارلیمانی امور کے وزیر چندرکانت پاٹل اور ممبران پارلیمنٹ شری رنگ بارنے اور میدھا کلکرنی اس موقع پر موجود تھے۔ مرکزی وزیر مملکت ایل مروگن (چنئی سے) اور گجیندر سنگھ شیخاوت (جودھپور سے) عملی طور پر اس تقریب میں شامل ہوئے۔

ویشنو نے کہا کہ چھ ریلوے اسٹیشنوں – پونے، ہڈپسر، کھڑکی، شیواجی نگر، اُرولی کنچن اور آلندی – کے ترقیاتی منصوبے آخری مراحل میں ہیں۔ انہوں نے یہ بھی کہا کہ پونے-ناگپور وندے بھارت ٹرین شروع کرنے کے سلسلے میں وزیر اعلی دیویندر فڑنویس کے ساتھ بات چیت ہوئی ہے۔ انہوں نے کہا کہ پونے-ناسک ریلوے کوریڈور کے لیے نئی الائنمنٹ پر ٹرائل رن جاری ہیں، جو کہ خوڈاڈ میں عالمی معیار کی ٹیسٹنگ لیبارٹری کی موجودگی کی وجہ سے اسٹریٹجک اہمیت کا حامل ہے۔ اس کے علاوہ پونے-لوناوالا روٹ پر تیسری اور چوتھی ریلوے لائنوں کا کام جلد مکمل ہو جائے گا۔

تعاون اور شہری ہوا بازی کے وزیر مملکت مرلیدھر موہول نے یقین ظاہر کیا کہ ہڈپسر-جودھ پور ایکسپریس سے پونے میں رہنے والے راجستھانی کمیونٹی کو بہت فائدہ پہنچے گا۔ ریاست میں 1 کروڑ روپے کی لاگت سے ریلوے کے ترقیاتی منصوبے چل رہے ہیں۔ امرت بھارت یوجنا کے تحت پونے، ہڈپسر، ارولی اور شیواجی نگر اسٹیشنوں پر ترقیاتی کام جاری ہے۔

رکن پارلیمنٹ میدھا کلکرنی نے خاص طور پر آنے والے کمبھ میلے کے پیش نظر پونے اور ناسک کے درمیان نئی ٹرین شروع کرنے کا مطالبہ کیا۔

ہڈپسر-جودھ پور ایکسپریس کا شیڈول:

ٹرین 5 مئی 2025 سے باقاعدگی سے چلے گی۔

• ہڈپسر سے روانگی: 7:15 پی ایم | جودھ پور آمد: اگلے دن سہ پہر 3:00 پی ایم
• جودھ پور سے روانگی: 10:00 پی ایم | ہڈپسر آمد: اگلے دن 5:00 پی ایم

ہالٹ: چنچوڑ، لوناوالا، کلیان، وسئی روڈ، واپی، سورت، وڈودرا جنکشن، احمد آباد، مہسانہ، پالن پور، آبو روڈ، پنڈواڑہ، جوائی ڈیم، فالنا، رانی، مارواڑ جنکشن، پالی مارواڑ اور لونی۔

*****

U.No:552

ش ح۔ح ن۔س ا

(Release ID: 2126738)