ساؤتھ ایسٹرن کول فیلڈز لمیٹڈ (ایس ای سی ایل) کوئلے کی کان کنی کے لیے پیسٹ فل ٹکنالوجی کو اپنانے والا بھارت کا پہلا کوئلہ پی ایس یو بننے کے لیے تیار ہے - جو پائیدار اور ماحول دوست کان کنی کے طریقوں کی طرف ایک بڑا قدم ہے۔

اس جدید زیر زمین کان کنی ٹکنالوجی کو نافذ کرنے کے لیے ایس ای سی ایل نے ٹی ایم سی منرل ریسورسز پرائیویٹ لمیٹڈ کے ساتھ 7040 کروڑ روپئے کے معاہدے پر دستخط کیے ہیں۔

اس معاہدے کے تحت ایس ای سی ایل کے کوربا علاقے میں واقع سنگھالی زیر زمین کوئلے کی کان میں پیسٹ فل ٹیکنالوجی کا استعمال کرتے ہوئے بڑے پیمانے پر کوئلے کی پیداوار کی جائے گی۔ 25 سال کی مدت میں ، اس منصوبے سے تقریبا 8.4 ملین ٹن (84.5 لاکھ ٹن) کوئلہ پیدا ہونے کی توقع ہے۔

پیسٹ فل ٹیکنالوجی کیا ہے؟

پیسٹ فل ایک جدید زیر زمین کان کنی کا طریقہ ہے جو سطحی زمین حاصل کرنے کی ضرورت کو ختم کرتا ہے۔ کوئلہ نکالنے کے بعد، کان کنی کی خالی جگہوں کو فلائی ایش ، سیمنٹ، پانی اور بانڈنگ کیمیکلز سے تیار کردہ ایک خاص طور پر تیار کردہ پیسٹ سے بھر دیا جاتا ہے۔ یہ عمل زمین کو دھنسنے سے روکتا ہے اور کان کے ساختی استحکام کو یقینی بناتا ہے۔

اہم بات یہ ہے کہ پیسٹ فل میں صنعتی فضلے  مواد کا استعمال کیا جاتا ہے ، اس طرح یہ عمل ماحولیاتی طور پر پائیدار بن جاتا ہے اور فضلے کی ری سائیکلنگ کو فروغ ملتا ہے۔

سنگھالی کان کا پس منظر

سنگھالی زیر زمین کان کو 1989 میں 0.24 ملین ٹن سالانہ کی پیداواری صلاحیت کے لیے منظور کیا گیا تھا اور 1993 میں کام شروع کیا گیا تھا۔ اس وقت کان میں جی سیون گریڈ نان کوکنگ کوئلے کے 8.45 ملین ٹن قابل اخراج ذخائر موجود ہیں۔ اسے بورڈ اینڈ پلر طریقہ کار کا استعمال کرتے ہوئے تیار کیا گیا تھا ، جس میں زیر زمین آپریشنز کے لیے لوڈ ہال ڈمپر (ایل ایچ ڈی) اور یونیورسل ڈرلنگ مشینوں (یو ڈی ایم) کا استعمال کیا گیا تھا۔

تاہم، کان کے اوپر کا سطحی علاقہ گنجان آباد ہے – گاؤں، ہائی ٹینشن بجلی کی لائنیں، اور پبلک ورکس ڈپارٹمنٹ (پی ڈبلیو ڈی) کی سڑک – جس کی وجہ سے حفاظت اور ماحولیاتی خدشات کی وجہ سے روایتی کیونگ کے طریقے ناممکن ہیں۔

سنگھالی کان کے لیے نیا موقع

پیسٹ فل ٹیکنالوجی آنے کے ساتھ ، اس علاقے میں کان کنی کی سرگرمیاں اب سطح کے بنیادی ڈھانچے میں خلل ڈالے بغیر آگے بڑھ سکتی ہیں۔

سنگھالی میں اس ٹکنالوجی کے کامیاب نفاذ سے دیگر زیر زمین کانوں میں آپریشن دوبارہ شروع کرنے کی راہ ہموار ہونے کی امید ہے جہاں اسی طرح کی زمین کی رکاوٹیں موجود ہیں۔

سبز کان کنی کی طرف ایک قدم

7040 کروڑ روپئے کی کل سرمایہ کاری کے ساتھ یہ پروجیکٹ بھارت میں گرین کان کنی ٹکنالوجی کو فروغ دینے کے لیے ایک اہم پہل ہے۔ اس کا مقصد ماحولیاتی اثرات کو نمایاں طور پر کم کرتے ہوئے کوئلے کی پیداوار کو بڑھانا ہے۔

اس موقع پر ایس ای سی ایل کے سی ایم ڈی ہریش دوہن نے کہا کہ مجھے پختہ یقین ہے کہ پیسٹ فل ٹیکنالوجی نہ صرف زیر زمین کان کنی کے مستقبل کو محفوظ بنائے گی بلکہ ایک جدید اور ماحول دوست حل بھی پیش کرے گی۔ یہ منصوبہ گرین کان کنی کی جانب ایک تاریخی قدم ہے اور آنے والے برسوں میں کوئلے کی صنعت کے مستقبل کو تشکیل دے گا۔

***

(ش ح – ع ا)

U. No. 25

(Release ID: 2122671)