زراعت اور کسانوں کی بہبود اور دیہی ترقی کے مرکزی وزیر، جناب شیوراج سنگھ چوہان، 17 اپریل 2025 کو برازیل کے شہر برازیلیا میں منعقد ہونے والی 15ویں برکس وزرائے زراعت کی میٹنگ (اے ایم ایم) میں ہندوستانی وفد کی قیادت کریں گے۔

15ویں برکس اے ایم ایم کا موضوع ہے: ‘برکس ممالک کے درمیان تعاون، اختراع اور مساوی تجارت کے ذریعے جامع اور پائیدار زراعت کو فروغ دینا’۔

اس اجلاس میں برکس کے رکن ممالک ، جن میں برازیل، روس،ہندوستان، چین، جنوبی افریقہ، سعودی عرب، مصر، متحدہ عرب امارات، ایتھوپیا، انڈونیشیا اور ایران شامل ہیں ، کے وزرائے زراعت اور سینئر عہدیداروں کی شرکت متوقع ہے۔

اس دورے کے دوران ، جناب چوہان برازیل کے اہم ہم منصبوں کے ساتھ دو طرفہ ملاقاتیں کریں گے ، جن میں زراعت اور مویشی پروری کے وزیر جناب کارلوس ہنریک باکیٹا فاوارو اور زرعی ترقی اور خاندانی کاشتکاری (ایم ڈی اے) کے وزیر جناب لوئز پاؤلو ٹیکسیرا شامل ہیں ۔یہ ملاقاتیں زراعت ، زرعی ٹیکنالوجی ، دیہی ترقی اور غذائی تحفظ کے مختلف شعبوں میں ہندوستان اور برازیل کے درمیان تعاون بڑھانے پر توجہ مرکوز ہوں گی۔

وزیر موصوف برازیل کی بڑی زرعی کاروباری کمپنیوں کے قائدین اور برازیلین ایسوسی ایشن آف ویجیٹیبل آئل انڈسٹریز کے نمائندوں کے ساتھ ساؤ پالو میں بات چیت کریں گے ، جس میں زرعی ویلیو چین میں شراکت داری اور سرمایہ کاری کے مواقع تلاش کیے جائیں گے ۔اپنے دورے کے ایک حصے کے طور پر، وزیر موصوف برازیلیا میں ہندوستانی سفارت خانے میں شجرکاری مہم میں بھی شرکت کریں گے، جو ایک عظیم پہل 'ایک پیڑ ماں کے نام' کے تحت منعقد کی جا رہی ہے، جس کا مقصد ماحولیاتی شعور اجاگر کرنا اور اور مادریت  کا احترام کرنا ہے ۔اس کے علاوہ ، وزیر ساؤ پالو میں متحرک ہندوستانی تارکین وطن کے ساتھ بات چیت کریں گے ، ثقافتی سفیروں اور دو طرفہ تعلقات میں شراکت داروں کے طور پر ان کے کردار کو تسلیم کریں گے ۔یہ دورہ برکس ممالک کے ساتھ تعاون کو گہرا کرنے اور زرعی اختراع ، لچک اور پائیداری میں جنوبی-جنوبی تعاون کو آگے بڑھانے کے ہندوستان کے عزم کی تصدیق کرتا ہے ۔

****

UR-9895

(ش ح۔ اس ک۔ف ر)