କେନ୍ଦ୍ର ଯୁବ ବ୍ୟାପାର ଏବଂ କ୍ରୀଡ଼ା ଏବଂ ଶ୍ରମ ଓ ନିଯୁକ୍ତି ମନ୍ତ୍ରୀ ଡ. ମନସୁଖ ମାଣ୍ଡଭିୟ ଆଜି ବିହାରର ପାଟନାଠାରେ ଏକ ଐତିହାସିକ ଜୟ ଭୀମ ପଦଯାତ୍ରାର ନେତୃତ୍ୱ ନେଇଥିଲେ। ଏହି ପଦଯାତ୍ରାକୁ ବିହାର ବିଧାନସଭାର ମାନ୍ୟବର ବାଚସ୍ପତି ଶ୍ରୀ ନନ୍ଦ କିଶୋର ଯାଦବ ପତାକା ଦେଖାଇ ଶୁଭାରମ୍ଭ କରିଥିଲେ ଏବଂ ଏହି ପଦଯାତ୍ରାରେ ୬,୦୦୦ରୁ ଅଧିକ ଏମୱାଇ ଭାରତ ଯୁବ ସ୍ୱେଚ୍ଛାସେବୀ ଅଂଶଗ୍ରହଣ କରିଥିଲେ । ଏହି ପଦଯାତ୍ରା ବାବାସାହେବଙ୍କ ଜୀବନ ଓ ପରମ୍ପରାପ୍ରତି ଏକ ଭବ୍ୟ ଶ୍ରଦ୍ଧାଞ୍ଜଳି ଭାବରେ ଠିଆ ହୋଇଥିଲା, ଯେଉଁଥିରେ ଯୁବ ଭାଗିଦାରୀ ଏବଂ ସମ୍ବିଧାନର ସ୍ଥାୟୀ ମୂଲ୍ୟବୋଧ ଉପରେ ଅଧିକ ଗୁରୁତ୍ୱ ଦିଆଯାଇଥିଲା ।

ସମାବେଶକୁ ସମ୍ବୋଧିତ କରି ଡକ୍ଟର ମନସୁଖ ମାଣ୍ଡଭିୟ ଭାରତର ଯୁବପିଢ଼ିଙ୍କ ଶକ୍ତି ଉପରେ ଗୁରୁତ୍ୱାରୋପ କରିଥିଲେ ଏବଂ ଏକ ନୂତନ ଭାରତ ନିର୍ମାଣ ପାଇଁ ଡକ୍ଟର ଆମ୍ବେଦକରଙ୍କ ଐତିହ୍ୟର ମଶାଲବାହକ ହେବାକୁ ଆହ୍ୱାନ କରିଥିଲେ। ସେ କହିଥିଲେ, “ପାଟନାରେ ଉଦିତ ସୂର୍ଯ୍ୟ କେବଳ ଏକ ପ୍ରତିମୂର୍ତ୍ତି ନୁହେଁ ବରଂ ଏକ ଭାବନାକୁ ଆଲୋକିତ କରିଥିଲା, ଯାହା ହେଉଛି ଡକ୍ଟର ଆମ୍ବେଦକରଙ୍କ ଆଦର୍ଶ ପ୍ରତି ଏକ ନୂତନ ପ୍ରତିବଦ୍ଧତା ଏବଂ ଦେଶର ସବୁଠାରୁ ଶକ୍ତିଶାଳୀ ବଳ - ଏହାର ଯୁବଶକ୍ତି ନେତୃତ୍ୱରେ ଏକ ବିକଶିତ ଭାରତ ଗଠନ।”

କେନ୍ଦ୍ର ମନ୍ତ୍ରୀ ଦେଶର ଯୁବପିଢ଼ିଙ୍କୁ ଏକ ବିକଶିତ ଭାରତ ଆଡକୁ ଯାତ୍ରାରେ ବାବାସାହେବ ଆମ୍ବେଦକର ଏବଂ ଅନ୍ୟାନ୍ୟ ମହାନ ନେତାଙ୍କ ଦୃଷ୍ଟିକୋଣ, ଐତିହ୍ୟ ଏବଂ ଅନୁକରଣୀୟ କାର୍ଯ୍ୟରୁ ପ୍ରେରଣା ନେବାକୁ ଆହ୍ୱାନ କରିଥିଲେ। ୧୯୪୭ ମସିହାରେ ଯେତେବେଳେ ବିଶ୍ୱର ଅନେକ ସ୍ଥାନରେ ଲିଙ୍ଗଗତ ସମାନତାକୁ ସ୍ୱୀକୃତି ଦିଆଯାଇ ନଥିଲା, ସେତେବେଳେ ମହିଳାମାନଙ୍କ ପାଇଁ ସମାନ ଅଧିକାର ସୁନିଶ୍ଚିତ କରିବାରେ ବାବାସାହେବ ଆମ୍ବେଦକରଙ୍କ ଅଗ୍ରଣୀ ଅବଦାନ ରହିଥିଲା ବୋଲି ସେ ଆଲୋକପାତ କରିଥିଲେ ।

ଏହି ଜାତୀୟ ପ୍ରତୀକମାନଙ୍କ ଆଦର୍ଶକୁ ଅନୁସରଣ କରିବା ପାଇଁ ଯୁବ ପିଢ଼ିଙ୍କୁ ପ୍ରତିଜ୍ଞା ନେବାକୁ ଆହ୍ୱାନ କରି ଡକ୍ଟର ମାଣ୍ଡାଭିୟ ଯୁବ-ନେତୃତ୍ୱ ଭିତ୍ତିକ ଜାତୀୟ ବିକାଶର ଗୁରୁତ୍ୱକୁ ଦୋହରାଇଲେ। ସେ ମାନ୍ୟବର ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଙ୍କ ନିର୍ଣ୍ଣାୟକ ନେତୃତ୍ୱକୁ ପ୍ରଶଂସା କରିଥିଲେ ଏବଂ ଏକ ଶକ୍ତିଶାଳୀ, ଆତ୍ମନିର୍ଭରଶୀଳ ଏବଂ ଅନ୍ତର୍ଭୁକ୍ତ ବିକଶିତ ଭାରତ ଗଠନ ପାଇଁ ପ୍ରଧାନମନ୍ତ୍ରୀଙ୍କ ଦ୍ୱାରା ପରିକଳ୍ପିତ ପଞ୍ଚପ୍ରାଣ ସହିତ ନିଜକୁ ସମନ୍ୱିତ କରିବାକୁ ଯୁବପିଢ଼ିଙ୍କୁ ଆହ୍ୱାନ କରିଥିଲେ।

ଜୟ ଭୀମ ପଦଯାତ୍ରା ଦେଶବ୍ୟାପୀ, ପ୍ରତ୍ୟେକ ରାଜ୍ୟର ରାଜଧାନୀ ଏବଂ ୫୦୦୦ ସ୍ଥାନରେ ଆୟୋଜିତ ହୋଇଥିଲା, ଯେଉଁଠାରେ ଏମୱାଇ ଭାରତ ସ୍ୱେଚ୍ଛାସେବକମାନେ ଡକ୍ଟର ବି.ଆର. ଆମ୍ବେଦକରଙ୍କ ଜନ୍ମବାର୍ଷିକୀ ପାଳନ କରିଥିଲେ। ଆମ୍ବେଦକରଙ୍କ ପ୍ରତିମୂର୍ତ୍ତି ସଫା କରି ଡକ୍ଟର ଆମ୍ବେଦକରଙ୍କ ଦୂରଦୃଷ୍ଟିକୁ ଶ୍ରଦ୍ଧାଞ୍ଜଳି ଅର୍ପଣ କରିଥିଲେ, ଯାହା ଏକ ଅନ୍ତର୍ଭୁକ୍ତ, ସଶକ୍ତ ଏବଂ ଯୁବ ନେତୃତ୍ୱାଧୀନ ଭାରତ ଗଠନ ପାଇଁ ସାମୂହିକ ପ୍ରତିବଦ୍ଧତାକୁ ସୁଦୃଢ଼ କରିଥିଲା। ଏହା ଉଲ୍ଲେଖନୀୟ ଯେ କେନ୍ଦ୍ର ଯୁବ ବ୍ୟାପାର ଏବଂ କ୍ରୀଡା ରାଷ୍ଟ୍ରମନ୍ତ୍ରୀ ଶ୍ରୀମତୀ ରକ୍ଷା ନିଖିଲ ଖଡସେ ମୁମ୍ବାଇଠାରେ ଜୟ ଭୀମ ପଦଯାତ୍ରାରେ ଅଂଶଗ୍ରହଣ କରିଥିଲେ, ଯାହା ଏକତା ଏବଂ ଜାତୀୟ ଅଂଶଗ୍ରହଣର ବାର୍ତ୍ତାକୁ ଆହୁରି ମଜବୁତ କରିଥିଲା।

ସଫଳ ଯୁବ ପ୍ରତିଭା ଏବଂ ଏମୱାଇ ଭାରତ ସ୍ୱେଚ୍ଛାସେବୀମାନଙ୍କ ଦ୍ୱାରା ସମ୍ବିଧାନର ପ୍ରସ୍ତାବନାର ସାମୂହିକ ପାଠ ସାମ୍ବିଧାନିକ ମୂଲ୍ୟବୋଧ ପ୍ରତି ପ୍ରତିବଦ୍ଧତାକୁ ଦୋହରାଇଥିଲା । ଏମୱାଇ ଭାରତ ଯୁବ ସ୍ୱେଚ୍ଛାସେବୀମାନେ ଏହି ପଦଯାତ୍ରାରେ ସକ୍ରିୟ ଭାବରେ ଅଂଶଗ୍ରହଣ କରିଥିଲେ ଏବଂ ଶକ୍ତିଶାଳୀ ଏବଂ ହୃଦୟସ୍ପର୍ଶୀ ସ୍ଲୋଗାନ ମାଧ୍ୟମରେ ସାମାଜିକ ସଦ୍ଭାବନା, ଗଣତାନ୍ତ୍ରିକ ମୂଲ୍ୟବୋଧ ଏବଂ ଅନ୍ତର୍ଭୁକ୍ତ ପ୍ରଗତିର ଭାବନାକୁ ପ୍ରତିଫଳିତ କରିଥିଲେ।

ପଦଯାତ୍ରା ମାର୍ଗରେ ବିଭିନ୍ନ ସ୍ଥାନରେ ସାଂସ୍କୃତିକ କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା, ଯେଉଁଥିରେ ମାଇ ଭାରତ ସ୍ୱେଚ୍ଛାସେବୀମାନେ ଡକ୍ଟର ବି.ଆର. ଆମ୍ବେଦକରଙ୍କ ଗୀତ ଗାନ କରିଥିଲେ। ଆମ୍ବେଦକରଙ୍କ ପ୍ରତି ଉତ୍ସର୍ଗୀକୃତ ଗୀତ ଗାନ କରାଯାଇଥିଲା, ଯାହା ପଦଯାତ୍ରାରେ ଉତ୍ସାହ ଏବଂ ଉତ୍ସାହ ବୃଦ୍ଧି କରିଥିଲା। ଅଂଶଗ୍ରହଣକାରୀଙ୍କ ଆରାମ ଏବଂ ସ୍ୱାସ୍ଥ୍ୟ ସୁନିଶ୍ଚିତ କରିବା ପାଇଁ ରାସ୍ତାରେ ସେମାନଙ୍କୁ ପାନୀୟ ବଣ୍ଟନ କରାଯାଇଥିଲା। ନାଗରିକ ଦାୟିତ୍ୱର ଏକ ଦୃଢ଼ ପ୍ରଦର୍ଶନରେ, ମାଇ ଭାରତ ସ୍ୱେଚ୍ଛାସେବକମାନେ ସକ୍ରିୟ ଭାବରେ ମାର୍ଗ ସଫା କରୁଥିବାର ଦେଖାଯାଇଥିଲା, ଯାହା ପଦଯାତ୍ରା ସମୟରେ ସେବା ଭାବନାକୁ ପ୍ରତିଫଳିତ କରୁଥିଲା।

ପାଟନା ହାଇକୋର୍ଟ ନିକଟରେ ପଦଯାତ୍ରାର ସମାପ୍ତି ପରେ, ଡକ୍ଟର ମନସୁଖ ମାଣ୍ଡଭିୟ ଅନ୍ୟ ନେତାମାନଙ୍କ ସହିତ ଡକ୍ଟର ବି.ଆର. ଆମ୍ବେଦକରଙ୍କ ପ୍ରତିମୂର୍ତ୍ତି ଚାରିପାଖରେ ସଫେଇ ଅଭିଯାନରେ ଅଂଶଗ୍ରହଣ କରିଥିଲେ। ଏହା ପରେ, ସେ ବାବାସାହେବଙ୍କ ଫଟୋଚିତ୍ରରେ ମାଲ୍ୟାର୍ପଣ କରିଥିଲେ ଏବଂ ଭାରତୀୟ ସମ୍ବିଧାନ ନିର୍ମାତାଙ୍କୁ ହୃଦୟରୁ ଶ୍ରଦ୍ଧାଞ୍ଜଳି ଅର୍ପଣ କରିଥିଲେ। ଉପସ୍ଥିତ ସମସ୍ତ ମାନ୍ୟଗଣ୍ୟ ବ୍ୟକ୍ତି ପୁଷ୍ପମାଲ୍ୟ ଅର୍ପଣ କରି ତାଙ୍କୁ ସାମୂହିକ ସମ୍ମାନର ସହିତ ମନେ ପକାଇଥିଲେ।

ଡଃ ମନସୁଖ ମାଣ୍ଡଭିୟଙ୍କ ସହ ବିହାରର ମାନ୍ୟବର ଉପମୁଖ୍ୟମନ୍ତ୍ରୀ, ଶ୍ରୀ ସମ୍ରାଟ ଚୌଧୁରୀ, ପୂର୍ବତନ କେନ୍ଦ୍ରମନ୍ତ୍ରୀ ଶ୍ରୀ ବିଜୟ କୁମାର ସିହ୍ନା, ପାଟନା ସାଂସଦ ଶ୍ରୀ ରବିଶଙ୍କର ପ୍ରସାଦ, ରାଜ୍ୟର ମନ୍ତ୍ରୀ ଶ୍ରୀ ନୀତିନ ନବିନ ଏବଂ ଶ୍ରୀ ସୁରେନ୍ଦ୍ର ମେହେଟା, ସାଂସଦ ଶ୍ରୀମତୀ ଶାମ୍ଭବୀ ଚୌଧୁରୀ, ବିଧାୟିକା ଶ୍ରୀମତୀ ଶ୍ରେୟାସୀ ସିଂ ଏବଂ ଏମଏଲସି ଶ୍ରୀ ସଞ୍ଜୟ ମୟୁଖଙ୍କ ସମେତ ବହୁ ବିଶିଷ୍ଟ ବ୍ୟକ୍ତି ଉପସ୍ଥିତ ଥିଲେ।

TKM