عزت مآب صدر جمہوریہ ہند، محترمہ دروپدی مرمو نے آج یہاں صحت اور خاندانی بہبود کے مرکزی وزیر جناب جگت پرکاش نڈا کی موجودگی میں آل انڈیا انسٹی ٹیوٹ آف میڈیکل سائنسز (ایمس) نئی دہلی کی 49 ویں سالانہ کنووکیشن تقریب سے خطاب کیا۔

شرکاء سے خطاب کرتے ہوئے صدر جمہوریہ نے کہا کہ ’’ایمس نئی دہلی نے صحت کی دیکھ بھال اور طبی تعلیم میں ایک معیار قائم کیا ہے۔ آج فارغ التحصیل ہونے والے ڈاکٹروں اور محققین کا ہمارے صحت کی دیکھ بھال کے نظام کو مضبوط بنانے اور لگن کے ساتھ قوم کی خدمت کرنے میں اہم کردار ہوگا۔‘‘ انہوں نے کہا کہ ’’ایمس گیتا کے کرمیوگ کی ایک چلتی ہوئی لیبارٹری ہے۔‘‘

صدر جمہوریہ نے اس بات پر روشنی ڈالی کہ ایمس ایک قابل فخر میڈ اِن انڈیا کامیابی کی کہانی ہے اور یہ پورے ملک میں اس کی تقلید کرنے کے لیے مثالی ماڈل ہے ۔ یہ خاص طور پر کووڈ-19 جیسی وبا کے دوران ، اہم تحقیق میں سب سے آگے رہا ہے۔ ایمس کی ذمہ داری صحت کی دیکھ بھال ، تعلیم اور تحقیق سے بھی بالاتر ہے۔ یہ ایک ایسے ماحول کو فروغ دینے تک پھیلا ہوا ہے جہاں ہر اسٹیک ہولڈر کی آواز سنی جائے، جہاں وسائل کا معقول استعمال کیا جائے اور جہاں عمدگی معمول ہو۔

آج صحت کی دیکھ بھال میں درپیش چیلنجوں پر زور دیتے ہوئے صدر جمہوریہ نے اس بات پر زور دیا کہ صحت کی دیکھ بھال میں پیش رفت کے ساتھ متوقع عمر میں اضافہ ہو رہا ہے۔ اس کے نتیجے میں، عمر رسیدہ آبادی کی تعداد میں اضافہ ہو رہا ہے، جس سے اس شعبے میں نئے چیلنجز پیدا ہو رہے ہیں۔ اس کے ساتھ ہی طبی پیشہ جدید دور میں طرز زندگی میں ہونے والی تبدیلیوں سے پیدا ہونے والی بیماریوں سے دوچار ہیں۔ انہوں نے ایمس نئی دہلی کی فیکلٹی پر زور دیا کہ وہ ذہنی صحت پر بیداری مہم شروع کریں تاکہ لوگوں کو اس چھپی ہوئی بیماری سے آگاہ کیا جا سکے۔

صدر جمہوریہ نے کہا کہ جدید طب کسی نتیجے پر پہنچنے کے لیے ایک قلیل مدتی تجربہ کرتی ہے، جبکہ آیوروید ، یوگا اور ادویات کے بہت سے روایتی نظام انسانی صحت کے لیے ایک طویل مدتی اور جامع نقطہ نظر اختیار کرتے ہیں۔ اس تناظر میں، انہوں نے صحت کے معاملات سے نمٹنے میں جدیدیت اور روایت کا امتزاج پیش کرنے کے لیے ہندوستان کے قدیم شفا یابی کے طریقوں کو اپنانے کے لیے ایمس نئی دہلی کی تعریف کی۔

انہوں نے ایمس پر زور دیا کہ وہ صحت کی دیکھ بھال کے پروٹوکول میں صنفی مساوات لانے کے لیے ایک مہم شروع کرے، کیونکہ یہ دیکھا گیا ہے کہ دل کی بیماری اور دیگر بیماریوں میں مبتلا زیادہ تر مریض مرد ہیں۔

صدر جمہوریہ نے طلباء اور والدین کو ان کی انتھک قربانی، محنت اور نظم و ضبط کے لیے مبارکباد دیتے ہوئے اپنے خطاب کو ختم کیا۔

ہندوستان کے ممتاز طبی ادارے سے فارغ التحصیل ہونے پر طلباء کو مبارکباد دیتے ہوئے جناب جگت پرکاش نڈا نے کہا کہ مسلسل سیکھنے اور ترقی کے عزم نے ایمس نئی دہلی کو اس مقام پر پہنچا دیا ہے، جہاں وہ 2018 سے طبی زمرے میں این آئی آر ایف کی درجہ بندی حاصل کر رہا ہے۔ انہوں نے کہا کہ ایمس نے ملک کی صحت ضروریات کو پورا کرنے کے لیے اپنی صلاحیتوں کو مسلسل بڑھایا ہے۔

ایمس کی کچھ حالیہ کامیابیوں پر روشنی ڈالتے ہوئے جناب نڈا نے کہا کہ ’’ایمس نے خود کو مصنوعی ذہانت سے چلنے والی تشخیص اور روبوٹک سرجری کی تربیت میں ایک رہنما کے طور پر قائم کیا ہے۔ یہ ہندوستان کا پہلا طبی ادارہ ہے جس نے کئی اہم طریقہ کار (پروسیجر) انجام دیے ہیں، جن میں ڈبل گردے کا ٹرانسپلانٹ اور گردوں کا خودکار ٹرانسپلانٹ شامل ہیں۔ تحقیق کے تئیں انسٹی ٹیوٹ کے عزم کا اظہار خاطرخواہ فنڈز کے ساتھ 900 سے زیادہ بیرونی منصوبوں کے انتظام سے ہوتا ہے۔ انہوں نے مزید کہا کہ ایمس نئی دہلی میکانائزڈ کلیننگ، اپنی صفائی ستھرائی کی افرادی قوت کو اپ اسکلنگ اور ری اسکلنگ وغیرہ جیسے اقدامات لا کر کیکلپ ایوارڈز میں مستقل طور پر پہلا درجہ حاصل کرنے میں کامیاب رہا ہے۔

مرکزی وزیر صحت نے طلباء کی حوصلہ افزائی کی کہ وہ ملک میں صحت کی دیکھ بھال کے نظام کو مؤثر طریقے سے بہتر بنانے کے لیے ایمس جیسے ممتاز ادارے میں حاصل کردہ اپنی صلاحیتوں، مہارتوں اور علم کا استعمال کریں۔ انہوں نے ان پر زور دیا کہ اگر انہیں وہاں خدمات انجام دینے کا موقع ملتا ہے تو وہ ملک میں نئے قائم کردہ ایمس اور ٹرٹیری نگہداشت کے اداروں میں ایمس نئی دہلی کے کام کی اخلاقیات اور ثقافت کو جاری رکھیں ۔ ایمس میں آپ کی تعلیم نے آپ کو نہ صرف اپنے منتخب کردہ شعبوں میں مہارت حاصل کرنے کے لیے مطلوبہ علم اور مہارت سے آراستہ کیا ہے، بلکہ ہمدردی، دیانت داری اور خدمت کی اقدار سے بھی آراستہ کیا ہے۔ یہ بنیادی اقدار آپ کے رہنما اصولوں کے طور پر کام کریں گی، جب آپ طبی پیشے کی پیچیدگیوں سے نمٹیں گے اور ان لوگوں کی زندگیوں پر مثبت اثر ڈالنے کی کوشش کریں گے جن کی آپ خدمت کرتے ہیں ۔

جناب نڈا نے طلباء کو اختراع اور تعاون کے جذبے کو اپنانے کی ترغیب دیتے ہوئے اپنے خطاب کا اختتام کیا۔ انہوں نے کہا کہ ’’طبی سائنس اور ٹیکنالوجی میں پیش رفت صحت کی دیکھ بھال کے منظر نامے میں انقلاب لا رہی ہے  اور یہ بین موضوعاتی شراکت داری اور زندگی بھر سیکھنے کے عزم کے ذریعے ہے کہ ہم اپنے وقت کے صحت کے مسائل کو مؤثر طریقے سے حل کر سکتے ہیں۔‘‘

کانووکیشن کے دوران مختلف شعبوں میں کل 1,886 ڈگریاں دی گئیں ، جن میں 77 پی ایچ ڈی اسکالرز،  363 ڈی ایم / ایم سی ایچ اسپیشلسٹ ، 572  ایم ڈی،  76ایم ایس،  49 ایم ڈی ایس، 74 فیلوشپ ، 172 ایم ایس سی، 191 ایم بی بی ایس اور 312 بی ایس سی شامل ہیں۔ 8 ڈاکٹروں کو ایمس میں ان کی قابل ستائش خدمات کے لیے لائف ٹائم اچیومنٹ ایوارڈ ملا۔ 28 طلباء اور ڈاکٹروں نے تمغے اور کتابی انعامات حاصل کیے۔  9 نے توصیفی انعامات حاصل کیے۔

پس منظر:

ایمس نے پچھلے دو سالوں میں اپنے بنیادی ڈھانچے اور صحت کی دیکھ بھال سے متعلق خدمات کے سلسلے میں بڑے پیمانے پر پیش رفت کی ہے۔ اپنے نئے اوتار میں، انسٹی ٹیوٹ میں 4,000 سے زیادہ اندرونی مریضوں کے بستر ہیں، جو تقریباً  48 لاکھ او پی ڈی مریضوں کا علاج کرتے ہیں اور ہر سال 3.2 لاکھ اندرونی مریضوں کو داخل کرتے ہیں۔ اس نے اپنی جراحی کی صلاحیت میں بھی 50 فیصد اضافہ کیا ہے، جو سالانہ تقریباً  2.80 لاکھ جراحی (آپریشن)  انجام دے رہی ہے، جن میں سے بہت سے انتہائی پیچیدہ ہیں۔

ایمس میں بستروں کی گنجائش میں 34 فیصد اضافہ کیا گیا ہے  اور ٹیکنالوجی و وسائل کے موثر انتظام کے ذریعے جراحی اور تشخیصی سہولیات میں بہتری آئی ہے۔ ایمس نے ایمس-ایس بی آئی اسمارٹ کارڈ، ساہس (سسٹم فار ایمس ہیومن ریسورسز اینڈ اکاؤنٹنگ سروسز) اور سنتوش کمپلینٹ ریڈریسل پورٹل سمیت ڈیجیٹل ہیلتھ کیئر اقدامات بھی شروع کیے ہیں، جس سے اسپتال انتظامیہ میں شفافیت اور کارکردگی کے ایک نئے دور کا آغاز ہوا ہے۔

حکومت ہند نے ایمس کو مصنوعی ذہانت اور مشین لرننگ کے لیے سینٹر آف ایکسی لینس قرار دیا ہے، جبکہ سینٹر فار میڈیکل اینوویشن اینڈ انٹرپرینیورشپ (سی ایم آئی ای) 24 ہیلتھ کیئر اسٹارٹ اپس کی پرورش کر رہا ہے، جو ری جنریٹیو میڈیسن اور میڈیکل ڈیوائسز کے ساتھ ساتھ ایپ پر مبنی ہیلتھ کیئر سالیوشن پر کام کر رہے ہیں۔

ایمس نئی دہلی نے ہندوستان اور بیرون ملک کے ممتاز اداروں کے ساتھ مضبوط تعاون قائم کیا ہے۔ ایمس، آرمڈ فورسز میڈیکل سروسز کے تعاون سے، اونچائی ، ایرو اسپیس اور میرین میڈیسن میں تحقیق میں اضافہ کرنا چاہتا ہے۔ بین ادارہ جاتی تحقیقی تعلقات نے آئی آئی ایس سی بنگلورو ، آئی آئی ٹی مدراس ، سی سی ایم بی اور سی ایس آئی آر-این آئی آئی ایس ٹی اور عالمی ادارہ صحت (ڈبلیو ایچ او) اور کلینکم ڈیر یونیورسٹی منچن، جرمنی جیسے بین الاقوامی اداروں کے ساتھ بھی توسیع کی ہے۔

تقریب میں پروفیسر ایم این سری نیواس، ڈائریکٹر، ایمس نئی دہلی، ڈاکٹر کوشل کمار ورما، ڈین (اکیڈمکس) ایمس نئی دہلی؛ پروفیسر گریجا پرساد رتھ، رجسٹرار، ایمس نئی دہلی کے ساتھ اساتذہ اور طلباء بھی موجود تھے۔

***

ش ح۔ م م ۔ م ر

U-NO. 8702