மத்திய அரசின் மீன்வளம், கால்நடை பராமரிப்பு மற்றும் பால்வள அமைச்சகமானது ஒடிசா மாநில மீன்வளத் துறை உட்பட, அனைத்து மாநிலங்கள்/ யூனியன் பிரதேசங்களில் 2020-21-ம் ஆண்டு முதல் 2024-25-ம் ஆண்டு வரை ஐந்து ஆண்டுகளுக்கு பிரதமரின் மீன்வள மேம்பாட்டு திட்டத்தை செயல்படுத்தி  வருகிறது. கடந்த நான்கு ஆண்டுகள் மற்றும் நடப்பு நிதியாண்டிலும் ஒடிசா மாநில  அரசு சமர்ப்பித்த 1264.23 கோடி ரூபாய் மதிப்பீட்டிலான திட்டங்களுக்கு மத்திய மீன்வள மேம்பாட்டுத் துறை அமைச்சகம் ஒப்புதல் அளித்துள்ளது. இதில் மத்திய அரசின் பங்களிப்பு 510.94 கோடி ரூபாய் ஆகும். அம்மாநில அரசு சமர்ப்பித்த பயன்பாட்டு அறிக்கைகளின் அடிப்படையில் மத்திய அரசின் பங்காக 271.17 கோடி ரூபாய் விடுவிக்கப்பட்டுள்ளது.

மத்திய அரசின்  தேசிய கடல் மீன்வளக் கொள்கை 2017, மீன்வள ஆதாரங்களை பாதுகாத்து உகந்த முறையில் பயன்படுத்தி, நிலைத் தன்மையை உறுதி செய்வதற்கான வழிகாட்டுதல் கொள்கைகளை வழங்குகிறது. நாட்டின் கிழக்கு , மேற்கு கடற்கரையோர பகுதிகளில்  மீன்பிடி தடைக்காலத்தை மத்திய மீன்வளத்துறை அமல்படுத்தி வருகிறது. ஒடிசா கடற்கரை உட்பட கிழக்கு கடற்கரையில், மீன்பிடி தடைக்காலம் ஆண்டுதோறும் ஏப்ரல் 15-ம் தேதி முதல் ஜூன் 15-ம் தேதி வரை அமல்படுத்தப்படுகிறது. கூடுதலாக, மத்திய அரசு தீங்கு விளைவிக்கும் மீன்பிடி நடைமுறைகளையும் தடை செய்துள்ளது.

மாநிலங்களவையில் 2025 மார்ச் 19ம் தேதி கேள்வி ஒன்றுக்கு எழுத்து மூலம் அளித்த பதிலில் மத்திய மீன்வளம், கால்நடை பராமரிப்பு மற்றும் பால்வளத்துறை இணையமைச்சர் திரு. ஜார்ஜ் குரியன் இதனைத் தெரிவித்துள்ளார்.

மேலும் விவரங்களுக்கு இந்த ஆங்கில செய்திக் குறிப்பைக் காணவும்: https://pib.gov.in/PressReleasePage.aspx?PRID=2112694

***

TS/SV/SG/KR