ಸರ್ಕಾರದ ಪ್ರಮುಖ ಗ್ರಾಹಕ ಜಾಗೃತಿ ಅಭಿಯಾನ 'ಜಾಗೋ ಗ್ರಾಹಕ್ ಜಾಗೋ' ಅಡಿಯಲ್ಲಿ ಡಿಜಿಟಲ್ ಸಾಕ್ಷರತಾ ಉಪಕ್ರಮಗಳ ಮೂಲಕ ಗ್ರಾಹಕರನ್ನು ಸಬಲೀಕರಣಗೊಳಿಸುವ 'ಸಬಲೀಕೃತ ಗ್ರಾಹಕರಾಗಿರಿ' ಎಂಬ ಹೊಸ ಸಹಯೋಗವನ್ನು ಕೇಂದ್ರ ಗ್ರಾಹಕ ವ್ಯವಹಾರಗಳು, ಆಹಾರ ಮತ್ತು ಸಾರ್ವಜನಿಕ ವಿತರಣೆ ಮತ್ತು ಹೊಸ ಮತ್ತು ನವೀಕರಿಸಬಹುದಾದ ಇಂಧನ ಸಚಿವರಾದ ಶ್ರೀ ಪ್ರಲ್ಹಾದ್ ಜೋಶಿ ಮತ್ತು ಮೆಟಾದ ಮುಖ್ಯ ಜಾಗತಿಕ ವ್ಯವಹಾರಗಳ ಅಧಿಕಾರಿ ಶ್ರೀ ಜೋಯಲ್ ಕಪ್ಲಾನ್ ಅವರು ಘೋಷಿಸಿದರು.

ಪಾಲುದಾರಿಕೆಯ ಉದ್ಘಾಟನೆಯ ಸಂದರ್ಭದಲ್ಲಿ ಮಾತನಾಡಿದ ಶ್ರೀ ಜೋಶಿ, "ನಾಗರಿಕರು ಡಿಜಿಟಲ್ ವಲಯವನ್ನು ನ್ಯಾವಿಗೇಟ್ ಮಾಡಲು ಮತ್ತು ಆನ್‌ಲೈನ್‌ ನಲ್ಲಿ ಸುರಕ್ಷಿತವಾಗಿರಲು ಅನುವು ಮಾಡಿಕೊಡುವ ಜ್ಞಾನ ಮತ್ತು ಸಾಧನಗಳೊಂದಿಗೆ ಅವರನ್ನು ಸಜ್ಜುಗೊಳಿಸುವ ಈ ನಿರ್ಣಾಯಕ ಉಪಕ್ರಮದಲ್ಲಿ ಮೆಟಾ ಜೊತೆ ಪಾಲುದಾರಿಕೆ ಮಾಡಿಕೊಳ್ಳಲು ನಮಗೆ ಸಂತಸವಾಗಿದೆ" ಎಂದು ಹೇಳಿದರು.

"ಗ್ರಾಹಕರ ಜಾಗೃತಿಯು ಸುಸ್ಥಿರ ಮತ್ತು ಸುರಕ್ಷಿತ ಡಿಜಿಟಲ್ ಅನುಭವಕ್ಕೆ ಪ್ರಮುಖವಾಗಿದೆ ಮತ್ತು ಈ ಅಭಿಯಾನವು ಗ್ರಾಹಕ ರಕ್ಷಣಾ ಕ್ರಮಗಳನ್ನು ಬಲಪಡಿಸುತ್ತದೆ ಮತ್ತು ಭಾರತೀಯ ಗ್ರಾಹಕರನ್ನು ಸಬಲೀಕರಣಗೊಳಿಸುವ ನಮ್ಮ ಬದ್ಧತೆಯನ್ನು ಬಲಪಡಿಸುತ್ತದೆ" ಎಂದು ಅವರು ಹೇಳಿದರು.

ಈ ಸಹಯೋಗದೊಂದಿಗೆ, ಗ್ರಾಹಕ ರಕ್ಷಣೆಗಾಗಿ ಭಾರತ ಸರ್ಕಾರದ ಗ್ರಾಹಕ ವ್ಯವಹಾರಗಳ ಇಲಾಖೆಯ ಪ್ರಯತ್ನಗಳು ದೇಶದ ದೂರ ಪ್ರದೇಶಗಳನ್ನು ತಲುಪುತ್ತವೆ ಎಂದು ಶ್ರೀ ಜೋಶಿ ಒತ್ತಿ ಹೇಳಿದರು.

'ಸಬಲೀಕೃತ ಗ್ರಾಹಕರಾಗಿರಿ' ಎಂಬ ಜಂಟಿ ಅಭಿಯಾನವು ಆನ್‌ಲೈನ್ ಬೆದರಿಕೆಗಳನ್ನು ಗುರುತಿಸುವುದು ಮತ್ತು ಬಲವಾದ ಪಾಸ್‌ವರ್ಡ್‌ ಬಳಕೆ, ಆನ್‌ಲೈನ್ ಮಾಹಿತಿಯ ಪರಿಶೀಲನೆ ಮತ್ತು ಅನುಮಾನಾಸ್ಪದ ಚಟುವಟಿಕೆಯನ್ನು ವರದಿ ಮಾಡುವುದು ಸೇರಿದಂತೆ ಆರೋಗ್ಯಕರ ಆನ್‌ಲೈನ್ ಅಭ್ಯಾಸಗಳನ್ನು ಉತ್ತೇಜಿಸುವ ಬಗ್ಗೆ ಭಾರತೀಯರಿಗೆ ಅರಿವು ಮೂಡಿಸಲು ಪ್ರಯತ್ನಿಸುತ್ತದೆ. ಉದ್ಘಾಟನೆಗೂ ಮೊದಲು ನಡೆದ ಸಭೆಯಲ್ಲಿ ಇದರ ಬಗ್ಗೆ ಚರ್ಚಿಸಲಾಯಿತು.

ಸಭೆಯಲ್ಲಿ, ಬೆಂಗಳೂರಿನ ನ್ಯಾಷನಲ್ ಲಾ ಸ್ಕೂಲ್ ಆಫ್ ಇಂಡಿಯಾ ಯೂನಿವರ್ಸಿಟಿಯಲ್ಲಿ ವಿಭಾಗವು ಸ್ಥಾಪಿಸಿದ ಮತ್ತು ಮೆಟಾ ಬೆಂಬಲದಲ್ಲಿ ಐಐಟಿ ಬಾಂಬೆಯೊಂದಿಗೆ ಆರಂಭಿಸಲಾದ ಜಂಟಿ ಯೋಜನೆಯ ಬಗ್ಗೆ ಕೇಂದ್ರ ಸಚಿವರಿಗೆ ವಿವರಿಸಲಾಯಿತು. ನಾಗರಿಕ-ಕೇಂದ್ರಿತ ಚಾಟ್‌ ಬಾಟ್: ಗ್ರಾಹಕ್‌ ನ್ಯಾಯ್ ಅನ್ನು ರಚಿಸುವಲ್ಲಿ ಮೆಟಾದ ಮುಕ್ತವಾಗಿ ಲಭ್ಯವಿರುವ ಲಾರ್ಜ್‌ ಲಾಂಗ್ವೇಜ್‌ ಮಾಡೆಲ್‌ ಆದ Llama 2 ಅನ್ನು ಬಳಸಿಕೊಳ್ಳುವ ಕಾರ್ಯಸಾಧ್ಯತೆಯನ್ನು ಈ ಯೋಜನೆಯು ಪರಿಶೋಧಿಸುತ್ತದೆ. ಚಾಟ್‌ ಬಾಟ್ ಗ್ರಾಹಕ ಹಕ್ಕುಗಳ ಮಾಹಿತಿಗೆ ಪ್ರವೇಶವನ್ನು ಹೆಚ್ಚಿಸುತ್ತದೆ, ಇದು ವ್ಯಕ್ತಿಗಳು ದೂರುಗಳನ್ನು ಸಲ್ಲಿಸಲು ಮತ್ತು ಪ್ರಶ್ನೆಗಳನ್ನು ಹೆಚ್ಚು ಪರಿಣಾಮಕಾರಿಯಾಗಿ ಪರಿಹರಿಸಲು ಸಹಾಯ ಮಾಡುವ ದೃಢವಾದ ಕುಂದುಕೊರತೆ ಪರಿಹಾರ ಸಾಧನವಾಗಿದೆ. ಚಾಟ್‌ ಬಾಟ್ ಈಗ ಕ್ಲೋಸ್ಡ್ ಗ್ರೂಪ್ ಬೀಟಾ ಪರೀಕ್ಷೆಗೆ ಸಿದ್ಧವಾಗಿದೆ ಮತ್ತು ಅದರ ಪರೀಕ್ಷೆ ಪೂರ್ಣಗೊಂಡ ನಂತರ ಅಧಿಕೃತವಾಗಿ ಬಿಡುಗಡೆ ಮಾಡಲಾಗುತ್ತದೆ ಮತ್ತು ಗ್ರಾಹಕ ವ್ಯವಹಾರಗಳ ಇಲಾಖೆಯ (DoCA) ವೆಬ್‌ಸೈಟ್‌ ಗೆ ಸಂಯೋಜಿಸಲಾಗುತ್ತದೆ.

ಕಾರ್ಯಕ್ರಮದಲ್ಲಿ ಉಪಸ್ಥಿತರಿದ್ದ ಗ್ರಾಹಕ ವ್ಯವಹಾರಗಳ ಇಲಾಖೆಯ ಕಾರ್ಯದರ್ಶಿ ಶ್ರೀಮತಿ ನಿಧಿ ಖರೆ, ಗ್ರಾಹಕರ ಹಕ್ಕುಗಳನ್ನು ಎತ್ತಿಹಿಡಿಯುವ ಮತ್ತು ರಕ್ಷಿಸುವ ಬದ್ಧತೆಯಲ್ಲಿ ಸರ್ಕಾರ ದೃಢವಾಗಿದೆ ಎಂದು ಹೇಳಿದರು. ಈ ಬದ್ಧತೆಯನ್ನು ಪರಿಣಾಮಕಾರಿಯಾಗಿಸಲು, ಗ್ರಾಹಕರು ಆನ್‌ಲೈನ್ ಬೆದರಿಕೆಗಳ ಬಗ್ಗೆ ತಿಳಿಯಲು ಮತ್ತು ಅನೈತಿಕ ವ್ಯವಹಾರ ಅಭ್ಯಾಸಗಳನ್ನು ಗ್ರಹಿಸಲು ಸಾಧ್ಯವಾಗುತ್ತದೆ ಎಂದು ಅವರು ಹೇಳಿದರು. ಅಲ್ಲದೆ, ಹೊಣೆಗಾರಿಕೆ, ಪಾರದರ್ಶಕತೆ ಮತ್ತು ನ್ಯಾಯಸಮ್ಮತತೆಯನ್ನು ಉತ್ತೇಜಿಸಲು ಅವರ ಕುಂದುಕೊರತೆಗಳನ್ನು ಕೇಳುವ ಮತ್ತು ಪರಿಹರಿಸುವ ಹಕ್ಕನ್ನು ಹೊಂದಿರುವುದು ಅತ್ಯಗತ್ಯವಾಗಿದೆ. ಚಾಟ್‌ ಬಾಕ್ಸ್ ತಡೆರಹಿತ ದೂರು ಸಲ್ಲಿಕೆ ಮತ್ತು ಪ್ರಶ್ನೆಗಳ ಪರಿಹಾರದ ಪ್ರಕ್ರಿಯೆಯ ಮೂಲಕ ಅದನ್ನು ಸಾಧ್ಯವಾಗಿಸುತ್ತದೆ ಎಂದು ಅವರು ಹೇಳಿದರು.

ಮೆಟಾದ ಮುಖ್ಯ ಜಾಗತಿಕ ವ್ಯವಹಾರಗಳ ಅಧಿಕಾರಿ ಶ್ರೀ ಜೋಯಲ್ ಕಪ್ಲಾನ್ ಮಾತನಾಡಿ, "ತಂತ್ರಜ್ಞಾನವು ತುಂಬಾ ವೇಗವಾಗಿ ಪ್ರಗತಿ ಹೊಂದುತ್ತಿರುವುದರಿಂದ, ಜನರು ಆನ್‌ಲೈನ್‌ ನಲ್ಲಿ ಸುರಕ್ಷಿತವಾಗಿರಲು ಉತ್ತಮ ಅಭ್ಯಾಸಗಳ ಬಗ್ಗೆ ನವೀಕೃತವಾಗಿರುವುದು ಕಷ್ಟಕರವಾಗಿರುತ್ತದೆ, ಅದಕ್ಕಾಗಿಯೇ ನಾವು ಗ್ರಾಹಕ ವ್ಯವಹಾರಗಳ ಇಲಾಖೆಯೊಂದಿಗೆ ಕೆಲಸ ಮಾಡಲು ಮತ್ತು ಭಾರತದ ಡಿಜಿಟಲ್ ಗ್ರಾಹಕ ರಕ್ಷಣಾ ಪ್ರಯತ್ನಗಳಿಗೆ ಕೊಡುಗೆ ನೀಡಲು ಸಂತೋಷಪಡುತ್ತೇವೆ. ಮೆಟಾದಲ್ಲಿ ನಾವು ಕೃತಕ ಬುದ್ಧಿಮತ್ತೆಯು (ಎಐ) ಜನರು ತಮ್ಮನ್ನು ತಾವು ರಕ್ಷಿಸಿಕೊಳ್ಳಲು ಮತ್ತು ಮಾಹಿತಿಯುಕ್ತ ಆನ್‌ಲೈನ್ ಗ್ರಾಹಕರಿಗೆ ಸಹಾಯ ಮಾಡುತ್ತದೆ ಎಂದು ಭಾವಿಸುತ್ತೇವೆ. ಎಐ ಅನ್ನು ಹೆಚ್ಚು ಪ್ರವೇಶಿಸುವಂತೆ ಮಾಡುವ ಮೂಲಕ, ಗ್ರಾಹಕರ ಜಾಗೃತಿಯನ್ನು ಸುಧಾರಿಸಲು, ಪರಿಹಾರ ಪ್ರಕ್ರಿಯೆಗಳನ್ನು ಸುಗಮಗೊಳಿಸಲು ಮತ್ತು ಆನ್‌ಲೈನ್‌ ನಲ್ಲಿ ಮಾಹಿತಿಯುಕ್ತ ಆಯ್ಕೆಗಳನ್ನು ಮಾಡಲು ಜನರಿಗೆ ಅಗತ್ಯವಿರುವ ಜ್ಞಾನವನ್ನು ನೀಡಲು ನಾವು ಆಶಿಸುತ್ತೇವೆ" ಎಂದು ಹೇಳಿದರು.

ಮೇಲೆ ತಿಳಿಸಿದ ಉಪಕ್ರಮಗಳು ಪ್ರಗತಿಪರ ಕಾನೂನುಗಳನ್ನು ಜಾರಿಗೊಳಿಸುವ ಮೂಲಕ ಮತ್ತು ತಂತ್ರಜ್ಞಾನ ಚಾಲಿತ ಕಾರ್ಯಕ್ರಮಗಳ ಪರಿಚಯದ ಮೂಲಕ ಗ್ರಾಹಕರ ರಕ್ಷಣೆ ಮತ್ತು ಸಬಲೀಕರಣದ ಕಡೆಗೆ ಇಲಾಖೆಯ ಹೆಜ್ಜೆಗಳಾಗಿವೆ. ತಂತ್ರಜ್ಞಾನದ ಅಭಿವೃದ್ಧಿಯೊಂದಿಗೆ ಗ್ರಾಹಕರು ಹೊಸ ರೀತಿಯ ಅನ್ಯಾಯದ ವ್ಯಾಪಾರ ಮತ್ತು ತಪ್ಪುದಾರಿಗೆಳೆಯುವ ಜಾಹೀರಾತು, ಟೆಲಿ-ಮಾರ್ಕೆಟಿಂಗ್, ನೇರ ಮಾರಾಟ, ಇ-ಕಾಮರ್ಸ್ ಮುಂತಾದ ಅನೈತಿಕ ವ್ಯಾಪಾರ ಅಭ್ಯಾಸಗಳಿಗೆ ಗುರಿಯಾಗುತ್ತಿದ್ದಾರೆ, ಇದರಿಂದಾಗಿ ಗ್ರಾಹಕರಿಗೆ ಆಗುವ ಹಾನಿಯನ್ನು ತಡೆಗಟ್ಟಲು ಸೂಕ್ತ ಮತ್ತು ತ್ವರಿತ ಕಾರ್ಯನಿರ್ವಾಹಕ ಮಧ್ಯಸ್ಥಿಕೆಗಳು ಬೇಕಾಗುತ್ತವೆ.

ಗ್ರಾಹಕರ ಅಸಂಖ್ಯಾತ ಮತ್ತು ನಿರಂತರವಾಗಿ ಹೊರಹೊಮ್ಮುತ್ತಿರುವ ದುರ್ಬಲತೆಗಳನ್ನು ಪರಿಹರಿಸಲು ಮತ್ತು ಗ್ರಾಹಕರ ಹಕ್ಕುಗಳನ್ನು ಉತ್ತೇಜಿಸಲು, ರಕ್ಷಿಸಲು ಮತ್ತು ಜಾರಿಗೊಳಿಸಲು, ಗ್ರಾಹಕ ಸಂರಕ್ಷಣಾ ಕಾಯ್ದೆ, 2019 ರ ಸೆಕ್ಷನ್ 10 ರ ಅಡಿಯಲ್ಲಿ ಕೇಂದ್ರ ಗ್ರಾಹಕ ಸಂರಕ್ಷಣಾ ಪ್ರಾಧಿಕಾರ (ಸಿಸಿಪಿಎ) ಎಂಬ ಕಾರ್ಯನಿರ್ವಾಹಕ ಸಂಸ್ಥೆಯನ್ನು ಸ್ಥಾಪಿಸಲಾಗಿದೆ. ಗ್ರಾಹಕ ಸಂರಕ್ಷಣಾ ಕಾಯ್ದೆ, 2019 ರ ಸೆಕ್ಷನ್ 18 ಗ್ರಾಹಕರ ಹಕ್ಕುಗಳನ್ನು ಒಂದು ವರ್ಗವಾಗಿ ರಕ್ಷಿಸಲು, ಉತ್ತೇಜಿಸಲು ಮತ್ತು ಜಾರಿಗೊಳಿಸಲು, ಅನ್ಯಾಯದ ವ್ಯಾಪಾರ ಪದ್ಧತಿಗಳನ್ನು ತಡೆಯಲು, ಯಾವುದೇ ಸುಳ್ಳು ಅಥವಾ ದಾರಿತಪ್ಪಿಸುವ ಜಾಹೀರಾತು ಮಾಡದಂತೆ ಖಚಿತಪಡಿಸಿಕೊಳ್ಳಲು ಮತ್ತು ಯಾವುದೇ ವ್ಯಕ್ತಿ ಸುಳ್ಳು ಅಥವಾ ದಾರಿತಪ್ಪಿಸುವ ಯಾವುದೇ ಜಾಹೀರಾತಿನ ಪ್ರಕಟಣೆಯಲ್ಲಿ ಭಾಗವಹಿಸದಂತೆ ಖಚಿತಪಡಿಸಿಕೊಳ್ಳಲು ಸಿಸಿಪಿಎಗೆ ಅಧಿಕಾರ ನೀಡುತ್ತದೆ. ಹೆಚ್ಚುವರಿಯಾಗಿ, ಸೆಕ್ಷನ್ 18 (2) (ಜೆ) ಮತ್ತು (ಎಲ್) ಅಡಿಯಲ್ಲಿ, ಅಪಾಯಕಾರಿ ಅಥವಾ ಅಸುರಕ್ಷಿತ ಸರಕುಗಳು ಅಥವಾ ಸೇವೆಗಳ ಬಗ್ಗೆ ಗ್ರಾಹಕರನ್ನು ಎಚ್ಚರಿಸಲು ಮತ್ತು ಅಕ್ರಮ ವ್ಯಾಪಾರ ಪದ್ಧತಿಗಳನ್ನು ತಡೆಗಟ್ಟಲು ಮತ್ತು ಗ್ರಾಹಕರ ಹಿತಾಸಕ್ತಿಗಳನ್ನು ರಕ್ಷಿಸಲು ಕ್ರಮವಾಗಿ ಸಿಸಿಪಿಎ ಸುರಕ್ಷತಾ ಸೂಚನೆಗಳನ್ನು ನೀಡಬಹುದು. ಕಾಯಿದೆಯ ಸೆಕ್ಷನ್ 19 ರ ಪ್ರಕಾರ, ಸಿಸಿಪಿಎ ಕೇಂದ್ರ ಸರ್ಕಾರದಿಂದ ಮಾಹಿತಿ, ದೂರು ಅಥವಾ ನಿರ್ದೇಶನಗಳನ್ನು ಪಡೆದಾಗ ಅಥವಾ ತನ್ನದೇ ಆದ ಮನವಿಯ ಮೇರೆಗೆ, ಗ್ರಾಹಕ ಹಕ್ಕುಗಳ ಉಲ್ಲಂಘನೆ ಅಥವಾ ಅಕ್ರಮ ವ್ಯಾಪಾರ ಪದ್ಧತಿ ಅಥವಾ ಯಾವುದೇ ಸುಳ್ಳು ಅಥವಾ ದಾರಿತಪ್ಪಿಸುವ ಜಾಹೀರಾತು ಪ್ರಾಥಮಿಕವಾಗಿ ಕಂಡುಬರುತ್ತದೆಯೇ ಎಂಬುದರ ಕುರಿತು ಪ್ರಾಥಮಿಕ ವಿಚಾರಣೆಯನ್ನು ನಡೆಸಬಹುದು ಮತ್ತು ಅದು ತೃಪ್ತಿಕರವಾದರೆ, ಮಹಾನಿರ್ದೇಶಕರಿಂದ ತನಿಖೆಗೆ ಕಾರಣವಾಗುತ್ತದೆ. ಸೆಕ್ಷನ್ 20 ಮತ್ತು 21 ರ ಅಡಿಯಲ್ಲಿ, ಅಂತಹ ಅಭ್ಯಾಸಗಳ ವಿರುದ್ಧ 50 ಲಕ್ಷ ರೂಪಾಯಿಗಳವರೆಗೆ ದಂಡ ವಿಧಿಸುವ ಅಧಿಕಾರವನ್ನು ಸಿಸಿಪಿಎ ಹೊಂದಿದೆ.

ಈ ದಿಕ್ಕಿನಲ್ಲಿ, ಸಿಸಿಪಿಎ ಹಿಂದೆ ಕಂಪನಿಗಳು ಮತ್ತು ಆನ್‌ಲೈನ್ ಪ್ಲಾಟ್‌ಫಾರ್ಮ್‌ ಗಳ ವಿರುದ್ಧ ಸೂಕ್ತ ಆದೇಶಗಳನ್ನು ಹೊರಡಿಸಿದೆ, ಜೊತೆಗೆ ವೈರ್‌ಲೆಸ್ ಜಾಮರ್‌ ಗಳ ಅಕ್ರಮ ಮಾರಾಟ ಮತ್ತು ಸೌಲಭ್ಯ, ವೈದ್ಯರ ಸಲಹೆ ಇಲ್ಲದೆ ಔಷಧಿಗಳ ಮಾರಾಟ, ಕಾರ್ ಸೀಟ್ ಬೆಲ್ಟ್ ಅಲಾರ್ಮ್ ಸ್ಟಾಪರ್ ಮಾರಾಟ ಇತ್ಯಾದಿಗಳ ವಿರುದ್ಧ ಸಲಹೆಗಳನ್ನು ನೀಡಿದೆ. ಇದಲ್ಲದೆ, ಗ್ರಾಹಕ ರಕ್ಷಣೆ (ಇ-ಕಾಮರ್ಸ್) ನಿಯಮಗಳು, 2020 ಮತ್ತು ದಾರಿತಪ್ಪಿಸುವ ಜಾಹೀರಾತುಗಳ ತಡೆಗಟ್ಟುವಿಕೆ ಮತ್ತು ದಾರಿತಪ್ಪಿಸುವ ಜಾಹೀರಾತುಗಳಿಗೆ ಅನುಮೋದನೆಗಳು, 2022 ಅನ್ನು ಇ-ಕಾಮರ್ಸ್ ಪ್ಲಾಟ್‌ಫಾರ್ಮ್‌ ಗಳನ್ನು ಗ್ರಾಹಕರಿಗೆ ಹೆಚ್ಚು ಪಾರದರ್ಶಕ ಮತ್ತು ಜವಾಬ್ದಾರಿಯುತವಾಗಿಸಲು ಅಧಿಸೂಚಿಸಲಾಗಿದೆ. ಇಲಾಖೆಯು "ಸಾಮಾಜಿಕ ಮಾಧ್ಯಮ ವೇದಿಕೆಗಳಲ್ಲಿ ಸೆಲೆಬ್ರಿಟಿಗಳು, ಪ್ರಭಾವಿಗಳು ಮತ್ತು ವರ್ಚುವಲ್ ಪ್ರಭಾವಿಗಳಿಗೆ ಜಾಹೀರಾತಿನ ಬಗ್ಗೆ ಮಾಹಿತಿ" ಕುರಿತು ಕಿರುಪುಸ್ತಕವನ್ನು ಪ್ರಕಟಿಸಿದೆ. ಇವುಗಳ ಜೊತೆಗೆ, ಸಿಸಿಪಿಎ ಅನೈತಿಕ ವ್ಯವಹಾರ ಪದ್ಧತಿಗಳ ವಿರುದ್ಧ ಶಾಸಕಾಂಗ ಚೌಕಟ್ಟನ್ನು ಬಲಪಡಿಸಲು ಆಗಿಂದಾಗ್ಗೆ ಮಾರ್ಗಸೂಚಿಗಳನ್ನು ಹೊರಡಿಸಿದೆ.  ಡಾರ್ಕ್ ಪ್ಯಾಟರ್ನ್ ತಡೆಗಟ್ಟುವಿಕೆ 2023 ರ ಮಾರ್ಗಸೂಚಿಗಳು, ಗ್ರೀನ್‌ವಾಶಿಂಗ್ ತಡೆಗಟ್ಟುವಿಕೆ ಮತ್ತು ನಿಯಂತ್ರಣಕ್ಕಾಗಿ ಮಾರ್ಗಸೂಚಿಗಳು, 2024 ಮತ್ತು ಕೋಚಿಂಗ್ ವಲಯದಲ್ಲಿ ದಾರಿತಪ್ಪಿಸುವ ಜಾಹೀರಾತಿನ ತಡೆಗಟ್ಟುವಿಕೆ ಮತ್ತು ನಿಯಂತ್ರಣಕ್ಕಾಗಿ ಮಾರ್ಗಸೂಚಿಗಳು 2024 ಇದರಲ್ಲಿ ಸೇರಿವೆ.

ಈಗ, ಈ ಎರಡು-ಹಂತದ ವಿಧಾನವು - ಗ್ರಾಹಕ್ ನ್ಯಾಯ್‌ ಚಾಟ್‌ ಬಾಕ್ಸ್ ಮೂಲಕ ಗ್ರಾಹಕರ ಕುಂದುಕೊರತೆ ಪರಿಹಾರಕ್ಕಾಗಿ ಎಐ ಅನ್ನು ಬಳಸಿಕೊಳ್ಳುವುದು ಮತ್ತು 'ಸಬಲೀಕೃತ ಗ್ರಾಹಕರಾಗಿರಿ' ಅಭಿಯಾನದ ಮೂಲಕ ಡಿಜಿಟಲ್ ಸಾಕ್ಷರತೆಯನ್ನು ಹೆಚ್ಚಿಸುವುದು, ಭಾರತದಲ್ಲಿ ಗ್ರಾಹಕರ ಹಕ್ಕುಗಳನ್ನು ಬಲಪಡಿಸುವ ಮಹತ್ವದ ಹೆಜ್ಜೆಯಾಗಿದೆ.

 

*****

 

 

 

(Release ID: 2112577) Visitor Counter : 26