न्यूझीलंडचे पंतप्रधान ख्रिस्तोफर लक्सन यांनी आज 17 मार्च 2025 रोजी राष्ट्रपती भवनात भारताच्या राष्ट्रपती द्रौपदी मुर्मू यांची भेट घेतली.

राष्ट्रपती भवनात पंतप्रधान लक्सन आणि त्यांच्या शिष्टमंडळाचे स्वागत करताना  राष्ट्रपतींनी सांगितले की, भारत आणि न्यूझीलंड यांच्यात लोकशाही, कायद्याचे राज्य आणि लोकांमधील दृढ  संबंध यावर आधारित घनिष्ठ आणि मैत्रीपूर्ण संबंध आहेत.

राष्ट्रपतींनी गेल्या वर्षी ऑगस्टमध्ये न्यूझीलंडला दिलेल्या भेटीच्या आठवणींना उजाळा दिला आणि सांगितले की, न्यूझीलंडचे  नैसर्गिक सौंदर्य आणि तेथील लोकांच्या सांस्कृतिक विविधतेने त्यांच्या मनावर अमिट छाप सोडली आहे.

राष्ट्रपतींनी नमूद केले की, शैक्षणिक देवाणघेवाण हा भारत-न्यूझीलंड संबंधांचा एक महत्त्वाचा घटक आहे. त्यांनी दोन्ही देशांमधील संस्थात्मक देवाणघेवाण, न्यूझीलंड विद्यापीठांच्या संकुलांची  भारतात स्थापना आणि दुहेरी पदवीच्या माध्यमातून शैक्षणिक सहकार्य वाढवण्याच्या अमर्याद संधींचा उल्लेख केला. तसेच, भारत आणि न्यूझीलंड यांच्यातील वाढत्या द्विपक्षीय व्यापार आणि आर्थिक संबंधांविषयी समाधान व्यक्त केले. विशेषतः सीमाशुल्क, फलोत्पादन, वनीकरण, आपत्ती व्यवस्थापन आणि पारंपरिक औषधोपचार यासारख्या क्षेत्रांमध्ये सहकार्याच्या नव्या संधी उपलब्ध होत असल्याचे त्यांनी नमूद केले.

 राष्ट्रपतींनी न्यूझीलंडच्या प्रगतीमध्ये प्रतिभावान आणि मेहनती भारतीय समुदायाच्या महत्वपूर्ण  योगदानाचे कौतुक केले.

दोन्ही नेत्यांनी मान्य केले की  राष्ट्रपतींच्या ऑगस्ट 2024 मधील न्यूझीलंड दौऱ्यामुळे आणि आज पंतप्रधान लक्सन यांच्या भेटीत झालेल्या महत्त्वपूर्ण निर्णयांमुळे भारत-न्यूझीलंड भागीदारीला सकारात्मक गती मिळेल.

***

S.Kane/G.Deoda/P.Kor

सोशल मिडियावर आम्हाला फॉलो करा: @PIBMumbai    /PIBMumbai    /pibmumbai  pibmumbai[at]gmail[dot]com