فٹ انڈیا سنڈے آن سائیکل تقریب میں ملک بھر میں بڑے پیمانے پر شرکت ملاحظہ کی گئی ہے، جس میں نوجوانوں کے امور اور کھیلوں کے مرکزی وزیر ڈاکٹر من سکھ منڈاویہ نے آج احمد آباد کے مشہور سابرمتی ریور فرنٹ میں تقریب کی قیادت کی۔ ایس اے آئی گاندھی نگر کے زیر اہتمام، اس تقریب میں تقریباً 650 سائیکل سواروں نے شرکت کی، جن میں انڈین میڈیکل ایسوسی ایشن (آئی ایم اے) گجرات، احمد آباد میڈیکل ایسوسی ایشن کے ممبران، اور ممبران پارلیمنٹ ہس مکھ بھائی پٹیل اور دنیش بھائی مکوانا شامل تھے۔ تقریب کا افتتاح پیرا اولمپئن ایتھلیٹ بھاونا چودھری نے کیا۔

ڈاکٹر من سکھ منڈاویہ نے اپنے خطاب میں "سنڈے آن سائیکل" تقریب کی بڑھتی ہوئی تحریک کے بارے میں اپنے جوش و خروش کا اظہار کیا۔ ڈاکٹر منڈاویہ نے ذکر کیا کہ فٹ انڈیا تحریک پورے ملک میں ترقی کر رہی ہے، "سنڈے آن سائیکل" تقریب آہستہ آہستہ ایک ثقافتی رجحان بنتی جا رہی ہے۔ انہوں نے اس بات پر روشنی ڈالی کہ آج کی تقریب 5,000 سے زیادہ مقامات پر منعقد ہوئی، جس میں ڈاکٹروں نے فعال طور پر چاق و چوبند رہنے اور موٹاپے سے پاک بھارت کے پیغام کو فروغ دینے میں حصہ لیا۔

ڈاکٹر منڈاویہ نے ذکر کیا کہ روزمرہ کی زندگی کے ایک حصے کے طور پر سائیکلنگ کی حوصلہ افزائی کی جانی چاہیے، خواہ کام پر جانے کے لیے ہو یا گھریلو سامان کی خریداری جیسے آسان کاموں کے لیے۔ انہوں نے جسمانی چاق و چوبند رہنے، ماحولیاتی تحفظ اور آلودگی کو کم کرنے کے لیے سائیکلنگ کی اہمیت پر بھی زور دیا۔

انہوں نے اس امر کو اجاگر کیا کہ کس طرح سائیکل چلانا موٹاپے کے خلاف جنگ میں ایک اہم ذریعہ ہے، جو کہ وزیر اعظم نریندر مودی کی طرف سے شروع کی گئی تحریک ہے، اور اس بات کا ذکر کیا کہ سائیکلنگ کو مستقبل میں کاربن کریڈٹ اسکیموں سے ممکنہ طور پر جوڑا جا سکتا ہے۔

انہوں نے ڈاکٹروں کی حوصلہ افزائی کی کہ وہ سائیکلنگ کو صحت کو برقرار رکھنے کے لیے تجویز کریں، طبی برادری پر زور دیا کہ وہ مریضوں کو سائیکلنگ کو اپنے طرز زندگی کے حصے کے طور پر اپنانے کی ترغیب دیں۔ ڈاکٹر منڈاویہ نے اس بات کا اعادہ کیا کہ "ایک صحت مند شہری ایک صحت مند معاشرے کی تعمیر کرتا ہے، اور ایک صحت مند معاشرہ ایک خوشحال ملک کی تعمیر کر سکتا ہے۔" اور 2047 تک وکست بھارت کے وژن کو حاصل کرنے کے لیے قوم کو فٹ رہنے کی ضرورت ہے، اس تبدیلی میں سائیکلنگ کا اہم کردار ہے۔

دریں اثنا، قومی دارالحکومت میں، گنیز ورلڈ ریکارڈ ہولڈر روہتاش چودھری کے ساتھ فٹ انڈیا تحریک کو فروغ ملا، جو میجر دھیان چند نیشنل اسٹیڈیم میں "پش اپ مین آف انڈیا" کے نام سے مشہور ہیں۔ روہتاش، جن کے نام ایک گھنٹے میں سب سے زیادہ پش اپس (ایک ٹانگ اٹھاکر اور 27.2 کلوگرام وزن کے ساتھ) کا ریکارڈ ہے، نے سائیکلنگ کے 500 شائقین بشمول انڈین میڈیکل ایسوسی ایشن (آئی ایم اے) کے ڈاکٹرز، اسکول اور کالج کے طلباء، یوگاسنا بھارت کے اراکین اور کارپوریٹ پیشہ ور افراد کے ساتھ سائیکلنگ کی تقریب میں شمولیت اختیار کی۔

روہتاش نے کہا، "سنڈے آن سائیکل فٹ انڈیا کی جانب سے ایک عظیم پہل قدمی ہے۔ شرکاء میں جوش و خروش قابل ذکر تھا، لیکن میں ہر ایک سے، خاص طور پر نوجوانوں سے گزارش کرتا ہوں کہ وہ نہ صرف اتوار کو بلکہ ہر روز سائیکل چلائیں۔"  فٹنس کی ضرورت پر روشنی ڈالتے ہوئے، انہوں نے مزید کہا، "چین اور امریکہ کے بعد ہندوستان میں موٹاپے کے معاملات کی دنیا میں تیسری سب سے زیادہ تعداد ہے۔ ہمیں ترقی میں سب سے اوپر ہونے کی ضرورت ہے، موٹاپے میں نہیں۔ فٹ رہنا ہمارے ملک کی ترقی کے لیے بہت ضروری ہے۔

آئی ایم اے نے ملک بھر میں 25 مقامات پر سائیکل پر اتوار کا اہتمام کیا ہے۔ انڈین میڈیکل ایسوسی ایشن کے فائنانس سکریٹری ڈاکٹر پیوش جین نے طرز زندگی کی بیماریوں سے بچاؤ میں فٹنس کی اہمیت پر زور دیا۔ "آئی ایم اے فٹ انڈیا تحریک کے لیے پوری طرح پرعزم ہے کیونکہ روک تھام علاج سے بہتر ہے۔ ہر ایک کے لیے صحت مند غذا برقرار رکھنا اور باقاعدگی سے ورزش کرنا ضروری ہے۔ سائیکلنگ ایک بہترین پورے جسم کی ورزش ہے اور اس سے دماغی تندرستی کو بھی فائدہ ہوتا ہے، جو اسے ایک مثالی ورزش بناتا ہے ‘‘۔

تقریب نے نہ صرف سائیکلنگ کو فروغ دیا بلکہ مجموعی جسمانی فٹنس کی اہمیت کو بھی ظاہر کیا، جس میں پش اپس کو ایک سادہ لیکن موثر ورزش کے طور پر اجاگر کیا گیا۔ سائیکلنگ اور طاقت کی تربیت کے امتزاج کا مقصد شرکاء کو اپنی حدود کو آگے بڑھانے اور صحت مند طرز زندگی کو اپنانے کی ترغیب دینا ہے۔

دسمبر 2024 میں ڈاکٹر منسکھ منڈاویہ کے ذریعہ آغاز کے بعد سے، فٹ انڈیا سنڈے آن سائیکل پہل قدمی ملک بھر میں 4,500 سے زیادہ مقامات پر پہنچ چکی ہے۔ یہ تقریب بیک وقت ملک بھر میں ایس اے آئی  مقامی مراکز ، قومی مراکز برائے عمدگی(این سی او ای) اور کھیلو انڈیا مراکز(کے آئی سی) میں منعقد کی جاتی ہے، جو شہریوں میں فٹنس اور ایک فعال طرز زندگی کو فروغ دینے کے لیے حکومت کے عزم کو تقویت فراہم کرتی ہے۔

******

 (ش ح –ا ب ن)

U.No:8332