صدر جمہوریہ ہند محترمہ دروپدی مرمو نے آج (12 مارچ 2025) چنڈی گڑھ میں پنجاب یونیورسٹی کے تقسیم   اسناد کی تقریب میں شرکت کی۔

اس موقع پر صدر جمہوریہ  نے کہا کہ گزشتہ 140 برسوں  میں پنجاب یونیورسٹی نے اعلیٰ تعلیم کے ایک بڑے مرکز کے طور پر ترقی کی ہے۔ اس یونیورسٹی نے علمی، کھیل، تحقیقی اور ثقافتی میدانوں میں اپنی الگ پہچان بنائی ہے۔ انہیں یہ جان کر خوشی ہوئی کہ اس یونیورسٹی نے 17 مرتبہ مولانا ابوالکلام آزاد ٹرافی جیتی ہے۔ انہوں نے کہا کہ یہ یونیورسٹی کے کھلاڑیوں کی لگن اور عزم کا واضح  ثبوت ہے۔ اس یونیورسٹی کے طلباء منو بھاکر اور سربجوت سنگھ نے 2024 پیرس اولمپکس میں تمغے جیت کر ملک کا سر فخر سے بلند کیا ہے۔

صدر جمہوریہ  نے تعلیم اور صنعتی روابط کو فروغ دینے کے لئے پنجاب یونیورسٹی کی ستائش کی۔ انہوں نے یونیورسٹی کے پالیسی سازوں پر زور دیا کہ وہ یونیورسٹی اور صنعت کے ربط اور مستقبل کی تیاری پر مزید کام کریں۔ انہوں نے کہا کہ یونیورسٹی کے مضامین ایپلیکیشن پر مبنی تعلیم ہونے چاہئیں۔ تعلیم کو طالب علموں کی زندگی کے سفر میں مدد کرنی چاہیے۔ آنے والا وقت مشکل ہوگا اور مسابقتی جذبہ بڑھتا رہے گا۔ لہذا، یہ ضروری ہے کہ ہر طالب علم کے پاس مثبت فکر ہو اور چیلنجوں کا مقابلہ کرنے کے لیے جدید مہارت ہو۔ ابھرتی ہوئی ٹکنالوجیوں کا علم حاصل کرنا اور مسلسل ترقی کرنا اور ان کو صحیح طریقے سے استعمال کرنے کی صلاحیت کامیابی کے لیے ضروری ہوگی۔

صدرجمہوریہ نے طلباء سے کہا کہ یہ ان کے لیے فخر کی بات ہے کہ انہیں اس باوقار یونیورسٹی میں پڑھنے کا موقع ملا۔ اس یونیورسٹی نے معاشرے کو صدر، وزیر اعظم، نوبیل انعام یافتہ شخصیات سے لے کر رہنما اور مختلف شعبوں میں نمایاں خدمات فراہم کرنے والی بہت سی عظیم شخصیات دی ہیں۔ انہوں نے طلباء پر زور دیا کہ وہ اس وراثت کو آگے بڑھائیں۔ انہوں نے بتایا کہ وہ اپنی کوششوں اور بصیرت افروز سوچ کے ذریعے اپنے خوابوں کی تعبیر کے ساتھ معاشرے، قوم اور دنیا کے لیے مؤثر کردار ادا کر سکتے ہیں۔

https://static.pib.gov.in/WriteReadData/specificdocs/documents/2025/mar/doc2025312519101.pdf

***

ش ح۔ ک ا۔ ص ج

U.NO.8183