नवी दिल्‍ली, 6 मार्च 2025

 

केंद्रिय सामाजिक न्याय व सक्षमीकरण मंत्रालयाच्या सामाजिक न्याय व सक्षमीकरण विभागाने राष्ट्रीय कर्मयोगी जन सेवा उपक्रमातील पहिल्या तुकडीची यशस्वी सुरुवात केली.  सरकारी अधिकाऱ्यांमधील सेवा भाव जोपासून समस्येवर उत्तर शोधणारे, दयाभाव असणारे व नागरिकांना केंद्रस्थानी ठेवून काम करणारे सरकारी अधिकारी घडविणे हे क्षमता बांधणी आयोगाने सुरू केलेल्या या अभियानाचे उद्दीष्ट आहे. 

या उपक्रमाअंतर्गत सुमारे दीड तासाच्या कालावधीची चार छोटी सत्रे आयोजित करण्यात येणार असून खुल्या चर्चेला प्रोत्साहन, एकत्रित काम व सेवा केंद्रित उद्देशानुसार समस्येवर व्यवहार्य तोडगा काढणे यानुसार त्यांचे स्वरुप ठरविण्यात आले आहे.

या उपक्रमाचे उद्घाटन सामाजिक न्याय व सक्षमीकरण विभागाचे सचिव अमित यादव यांच्या हस्ते झाले. उद्घाटनप्रसंगी केलेल्या भाषणात त्यांनी सरकारी नोकरीच्या मूलभूत हेतूवर भर दिला. ते म्हणाले, “आपल्यापैकी अनेक जण काहीतरी बदल घडवण्याच्या ध्येयाने सरकारी सेवेत येतात. परंतु कालांतराने दैनंदिन कामकाज आणि नागरिकांशी मर्यादित संवाद यामुळे ध्येयापासून लांब गेलो असे घडू शकते. लोकांच्या जीवनात अर्थपूर्ण बदल घडवण्यासाठी आपण काम करतो आहोत याची आठवण हा उपक्रम आपल्याला करुन देईल. सरकारी कर्मचाऱ्यांची प्रत्येक कृती देशाच्या प्रगतीत भर घालत असते.”

सरकारी सेवेत असताना व्यक्तीमत्त्व विकास व स्वतःचे समाधान यांचे महत्त्व यादव यांनी अधोरेखित केले. नागरिकांशी संवाद हा प्रशासनाचा आत्मा आहे आणि नागरिकांशी संवाद साधणारे, त्यांच्या तक्रारींची दखल घेणारे आणि समस्या सोडवणारे अधिकारी कार्यक्षम प्रशासनामधे महत्त्वाची भूमिका बजावतात असे ते म्हणाले. या उपक्रमाच्या नावामागील विचार सांगताना ते म्हणाले, “‘कर्मयोगी’ म्हणजे आपले आपल्या देशाप्रती, आपल्या विभागाप्रती, आपल्या नागरिकांप्रती आणि स्वतःप्रती असलेले कर्तव्य. हा उपक्रम प्रत्येक अधिकाऱ्यासाठी नेतृत्वकौशल्य विकसित करण्याची, प्रश्न सोडवण्याचा दृष्टीकोन अंगीकारण्याची आणि आपल्या कामात सेवाभाव रुजवण्याची एक संधी आहे.”  

या प्रशिक्षण सत्रांमध्ये सामाजिक न्याय व सक्षमीकरण विभागाच्या संचालक काजल सिंग व उपसचिव पुष्पेंद्र सिंग आणि क्षमता बांधणी आयोगाच्या कार्यक्रम समन्वयक क्षिप्रा सिंग यांनी मार्गदर्शन केले. या प्रशिक्षणामध्ये उपस्थित अधिकाऱ्यांनी सक्रिय सहभाग घेतला. यातून त्यांना सामाजिक न्याय व सक्षमीकरण विभागाच्या सेवेतील आपली भूमिका व जबाबदाऱ्या समजून घेण्यात मदत झाली आणि याचे राष्ट्र उभारणीतील योगदानही लक्षात आले. यावेळी विभागाची भविष्यतील उद्दीष्टे व कार्यक्रम याविषयी चर्चा करण्यात आली.  

या प्रशिक्षण सत्रांची आखणी करताना देशभारत अमलात आणलेल्या यशस्वी उपक्रम व मोहीमांचा संदर्भ घेण्यात आला, त्यामुळे सहभागी अधिकाऱ्यांना वास्तविक, व्यवहार्य संदर्भ पुरवले गेले. याशिवाय धोरण आखण्यातील विभागाची भूमिका, तक्रार निवारण, कायदेशीर बाबी आणि सामाजिक न्याय योजनांची सहज उपलब्धता या विषयीदेखील उपक्रमाच्या उद्दीष्टांना अनुसरुन सविस्तर चर्चा केली गेली. या दृष्टीकोनामुळे सहभागी अधिकाऱ्यांना उपक्रमातील प्रशिक्षणाची त्यांच्या दैनंदिन कामकाजातील जबाबदाऱ्यांशी सांगड घालता आली.

 

* * *

JPS/S.Joshi/D.Rane

 

सोशल मिडियावर आम्हाला फॉलो करा:@PIBMumbai    /PIBMumbai    /pibmumbai  pibmumbai[at]gmail[dot]com  /PIBMumbai    /pibmumbai

(Release ID: 2108823) Visitor Counter : 30