தெற்கு விமானப்படையின் தலைமையகம், விமானப்படை ஆற்றல் ஆய்வுக்கான மையத்துடன் இணைந்து, பிப்ரவரி 25, 2025 அன்று "விமான மற்றும் கடற்படைகளை ஒருங்கிணைத்தல்: இந்தியப் பெருங்கடல் பிராந்தியத்தில் போர் சக்தியை மேம்படுத்துதல்" என்ற கருத்தரங்கை நடத்தியது. இந்தக் கருத்தரங்கின் தலைமை விருந்தினராக முப்படைகளின் தலைமைத் தளபதி ஜெனரல் அனில் சவுகான் மற்றும் விமானப்படை துணைத் தலைவர் ஏர் மார்ஷல் எஸ்.பி. தர்கர் ஆகியோர் கலந்து கொண்டனர்.

நிகழ்ச்சியில் உரையாற்றிய முப்படைகளின் தலைமைத் தளபதி, வளர்ந்து வரும் உலகளாவிய பாதுகாப்பு சூழ்நிலையில் தயார் நிலை மற்றும் விழிப்புணர்வின் முக்கியத் தேவையை அடிக்கோடிட்டுக் காட்டினார். இந்தியப் பெருங்கடல் பிராந்தியத்தில் இந்தியாவின் தனித்துவமான புவியியல் அமைவிடம், கடல்சார் துறையை உத்திரீதியான ஆர்வத்தின் முக்கிய பகுதியாக ஆக்குகிறது என்று அவர் வலியுறுத்தினார். கூட்டுப் படை திட்டத்தின் முக்கியத்துவத்தை எடுத்துரைத்த அவர், தேச நலன்களைப் பாதுகாப்பதற்கும் பிராந்தியத்தில் தடுப்பு முறைகளை உறுதி செய்வதற்கும் விமான மற்றும் கடற்படை  ஆற்றலின் ஒருங்கிணைப்பு அவசியம் என்று வலியுறுத்தினார். தொழில்நுட்ப முன்னேற்றங்கள், உத்திசார் கூட்டாண்மை மற்றும் கூட்டு செயல்பாட்டு பயிற்சிகள் இந்தியாவின் பாதுகாப்புத் தோரணையை மேம்படுத்துவதில் எவ்வாறு முக்கிய பங்கு வகிக்கும் என்பதை அவர் மேலும் விரிவாக எடுத்துரைத்தார். ஏர் மார்ஷல் எஸ்.பி.தர்கர் தனது உரையில், பிராந்தியத்தில் வளர்ந்து வரும் அச்சுறுத்தல்களை எதிர்கொள்ள இந்திய கடற்படை மற்றும் இந்திய விமானப்படைக்கு இடையே நிகழ்நேர உளவுத்துறை பகிர்வு மற்றும் தடையற்ற ஒருங்கிணைப்பின் முக்கியத்துவத்தை எடுத்துரைத்தார்.

இந்தியப் பெருங்கடல் பிராந்தியத்தில் இந்தியாவின் உத்திசார் நிலைப்பாட்டை முன்னெடுத்துச் செல்வதிலும், சேவைகளுக்கு இடையேயான ஒத்துழைப்பை வளர்ப்பதிலும் இந்திய ஆயுதப் படைகளின் உறுதிப்பாட்டை இந்த நிகழ்வு மீண்டும் உறுதிப்படுத்தியது. வலுவான கடல்சார் பாதுகாப்பை உறுதி செய்வதை நோக்கமாகக் கொண்ட கருத்துக்கள் மற்றும் சிறந்த நடைமுறைகளைப் பரிமாறிக் கொள்வதற்கான பாதுகாப்பு நிபுணர்களுக்கான தளமாகவும் இது செயல்பட்டது.

மேலும் விவரங்களுக்கு இந்த செய்திக் குறிப்பை ஆங்கிலத்தில் இங்கே காணவும்: https://pib.gov.in/PressReleasePage.aspx?PRID=2106207

***

RB/DL