ভাৰতৰ বাবে এক ঐতিহাসিক মাইলষ্টোন হিচাপে, 'দেশ কা প্ৰকৃতি পৰীক্ষণ অভিযান'ই অভূতপূৰ্ব পাঁচটা গিনিজ ৱৰ্ল্ড ৰেকৰ্ড অৰ্জন কৰিছে, যিয়ে দেশৰ সমগ্ৰ স্বাস্থ্য সেৱাৰ প্ৰতি অংগীকাৰ আৰু আয়ুৰ্বেদৰ বৰ্ধিত বিশ্বব্যাপী স্বীকৃতি প্ৰদৰ্শন কৰিছে। ভাৰত চৰকাৰৰ আয়ুষ মন্ত্ৰণালয়ৰ সমৰ্থনত ভাৰতীয় চিকিৎসা ব্যৱস্থাৰ ৰাষ্ট্ৰীয় আয়োগ (এনচিআইএছএম)-য়ে ২০ ফেব্ৰুৱাৰী, ২০২৫ত মুম্বাইত 'দেশ কা প্ৰকৃতি পৰীক্ষণ অভিযান'ৰ প্ৰথম পৰ্যায়ৰ সমাপ্তিৰ চিন স্বৰূপে এক সমাপ্তি অনুষ্ঠানৰ আয়োজন কৰিছিল।

পাঁচটা গিনিজ ৱৰ্ল্ড ৰেকৰ্ড:

১. এক সপ্তাহত স্বাস্থ্য অভিযানৰ বাবে সৰ্বাধিক প্ৰতিশ্ৰুতি: ৬০,০৪,৯১২টা প্ৰতিশ্ৰুতিৰে আগৰ ১৪,৫৭১টা প্ৰতিশ্ৰুতিৰ ন্যূনতম আৱশ্যকতা অতিক্ৰম কৰি এক নতুন বিশ্বৰেকৰ্ড স্থাপন কৰা হৈছে।

২. এক মাহত স্বাস্থ্য অভিযানৰ বাবে সৰ্বাধিক প্ৰতিশ্ৰুতি: ১,৩৮,৯২,৯৭৬টা প্ৰতিশ্ৰুতিৰে চীনৰ শ্বেনজেন, গুৱাংডং-ত চিগনা এণ্ড চিএমবি লাইফ ইনশ্বুৰেন্স কোম্পানী লিমিটেড-ৰ ৫৮,২৮৪টা প্ৰতিশ্ৰুতিৰ ৰেকৰ্ড অতিক্ৰম কৰা হৈছে।

৩. স্বাস্থ্য অভিযানৰ বাবে সৰ্বাধিক প্ৰতিশ্ৰুতি: মুঠ ১,৩৮,৯২,৯৭৬টা প্ৰতিশ্ৰুতিৰে জিফি এফডিচি লিমিটেড (ভাৰত)-ৰ ৫,৬৯,০৫৭টা প্ৰতিশ্ৰুতিৰ ৰেকৰ্ড অতিক্ৰম কৰা হৈছে।

৪. ডিজিটেল প্ৰমাণপত্ৰ প্ৰদৰ্শন কৰা লোকৰ সৰ্বাধিক অনলাইন ফটো এলবাম: ৬২,৫২৫টা ফটোৰে এচেঞ্চাৰ ছলিউচনছ প্ৰাইভেট লিমিটেড (ভাৰত)-ৰ ২৯,০৬৮টা ফটোৰ ৰেকৰ্ড ভংগ কৰা হৈছে।

৫. একে বাক্য কোৱা লোকৰ সৰ্বাধিক অনলাইন ভিডিঅ’ এলবাম: ১২,৭৯৮টা ভিডিঅ’ৰে ঘে ভৰৰী, ৰাহুল কুলকাৰ্ণী, আৰু নীলম এডলাবডকাৰ (ভাৰত)-ৰ ৮,৯৯২টা ভিডিঅ’ৰ ৰেকৰ্ড অতিক্ৰম কৰা হৈছে।

গিনিজ ৱৰ্ল্ড ৰেকৰ্ডৰ এডজুডিকেটৰ, মিঃ ৰিচাৰ্ড উইলিয়াম ষ্টেনিংয়ে আনুষ্ঠানিকভাৱে এই পাঁচটা ৰেকৰ্ডৰ সফল সম্পূৰ্ণতা ঘোষণা কৰে। তেওঁ আয়ুষ মন্ত্ৰণালয়ৰ ৰাজ্যমন্ত্ৰী (স্বতন্ত্ৰ), শ্ৰী প্ৰতাপৰাও যাধৱক প্ৰমাণপত্ৰ প্ৰদান কৰে।

অনুষ্ঠানত মহাৰাষ্ট্ৰৰ স্বাস্থ্য মন্ত্ৰী শ্ৰী প্ৰকাশ আবিটকাৰ, আয়ুষ মন্ত্ৰণালয়ৰ সচিব পদ্মশ্ৰী বৈদ্য ৰাজেশ কোটেচা, ভাৰতীয় চিকিৎসা ব্যৱস্থাৰ ৰাষ্ট্ৰীয় আয়োগ (এনচিআইএছএম)-ৰ অধ্যক্ষ, বৈদ্য জয়ন্ত দেৱপূজাৰো উপস্থিত আছিল।

আয়ুষ মন্ত্ৰণালয়ৰ ৰাজ্যমন্ত্ৰী (স্বতন্ত্ৰ) শ্ৰী প্ৰতাপৰাও যাধৱে আয়ুষ মন্ত্ৰণালয়ৰ আয়ুৰ্বেদ আৰু অন্যান্য আয়ুষ প্ৰথাসমূহৰ বিকাশৰ প্ৰতি অটল অংগীকাৰৰ কথা উল্লেখ কৰিছিল। তেওঁ অভিযানটোৰ সাফল্যত অৰিহণা যোগোৱা আয়ুৰ্বেদ খণ্ডৰ প্ৰতিজন ব্যক্তিৰ কঠোৰ পৰিশ্ৰমৰ প্ৰশংসা কৰিছিল।

মহাৰাষ্ট্ৰৰ স্বাস্থ্য মন্ত্ৰী শ্ৰী প্ৰকাশ আবিটকাৰয়ে কয় যে এই অভিযান আয়ুৰ্বেদক পুনৰ স্থাপন কৰাৰ দিশত এক গুৰুত্বপূৰ্ণ পদক্ষেপ আৰু মহাৰাষ্ট্ৰই আয়ুৰ্বেদক মূলধাৰাৰ স্বাস্থ্য সেৱাৰ অংশ কৰাত সক্ৰিয় ভূমিকা পালন কৰিব।

আয়ুষ মন্ত্ৰণালয়ৰ সচিব পদ্মশ্ৰী বৈদ্য ৰাজেশ কোটেচায়ে কৈছে যে আয়ুষ মন্ত্ৰীৰ পৰামৰ্শত মন্ত্ৰণালয়ে মাত্ৰ দুটা মাহত ছয়টা বিশ্বৰেকৰ্ড স্থাপন কৰিছে, যিটো এক বিশিষ্ট সাফল্য। তেওঁ মন্ত্ৰীৰ নেতৃত্বত আয়ুষ মন্ত্ৰণালয়ে নতুন উচ্চতালৈ আগবাঢ়িব বুলি আশা প্ৰকাশ কৰিছে।

প্ৰধানমন্ত্ৰী শ্ৰী নৰেন্দ্ৰ মোদীয়ে ৰাষ্ট্ৰীয় আয়ুৰ্বেদ দিৱসৰ উপলক্ষে এই অভিযানৰ আৰম্ভণিৰ ঘোষণা কৰিছিল। ভাৰতৰ ৰাষ্ট্ৰপতি শ্ৰীমতী দ্ৰৌপদী মুৰ্মুৱে প্ৰথম ব্যক্তি হিচাপে প্ৰকৃতি পৰীক্ষণ কৰি দেশজুৰি ব্যাপক অংশগ্ৰহণৰ প্ৰেৰণা দিছিল। প্ৰথম পৰ্যায়ত ১.২৯ কোটিতকৈও অধিক ব্যক্তিৰ প্ৰকৃতি পৰীক্ষণ কৰা হৈছে, যিটো ১ কোটিৰ লক্ষ্যতকৈ অধিক। ১,৮১,৬৬৭জন স্বেচ্ছাসেৱক, য’ত ১,৩৩,৭৫৮জন আয়ুৰ্বেদৰ ছাত্ৰ-ছাত্ৰী, ১৬,১৫৫জন শিক্ষক, আৰু ৩১,৭৫৪জন চিকিৎসক অন্তৰ্ভুক্ত আছিল। এই ব্যাপক অংশগ্ৰহণে ভাৰতক ব্যক্তিগতকৃত স্বাস্থ্য সেৱাৰ ক্ষেত্ৰত এক নেতৃত্বস্থানীয় স্থানত তুলি ধৰিছে, আয়ুৰ্বেদৰ প্ৰতিষেধক স্বাস্থ্য সেৱা আৰু জীৱনশৈলী পৰিচালনাৰ গুৰুত্বক প্ৰদৰ্শন কৰিছে। এই তথ্য-ভিত্তিক পদ্ধতিয়ে আয়ুৰ্বেদক আধুনিক চিকিৎসাৰ সৈতে সংযোগ কৰি ভাৰতৰ স্বাস্থ্য সেৱা ক্ষেত্ৰক আগবঢ়াই নিবলৈ গুৰুত্বপূৰ্ণ অন্তৰ্দৃষ্টি প্ৰদান কৰিব।

*****

MV/AKS/AA