ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଫେବୃଆରୀ ୨୩ ରୁ ୨୫ ତାରିଖ ମଧ୍ୟପ୍ରଦେଶ, ବିହାର ଏବଂ ଆସାମ ଗସ୍ତ କରିବେ । ଫେବୃଆରୀ ୨୩ ତାରିଖ ଅପରାହ୍ଣ ୨ଟାରେ ମଧ୍ୟପ୍ରଦେଶର ଛତରପୁର ଜିଲ୍ଲାରେ ସେ ବାଗେଶ୍ୱର ଧାମ ମେଡିକାଲ ଆଣ୍ଡ ସାଇନ୍ସ ରିସର୍ଚ୍ଚ ଇନଷ୍ଟିଚ୍ୟୁଟର ଶିଳାନ୍ୟାସ କରିବେ । ଫେବୃଆରୀ ୨୪ ତାରିଖ ପୂର୍ବାହ୍ନ ୧୦ଟାରେ ପ୍ରଧାନମନ୍ତ୍ରୀ ଭୋପାଳରେ ଗ୍ଲୋବାଲ ଇନଭେଷ୍ଟର୍ସ ସମିଟ ୨୦୨୫ (ବୈଶ୍ୱିକ ନିବେଶକ ସମ୍ମିଳନୀ) କୁ ଉଦଘାଟନ କରିବେ । ଏହାପରେ ସେ ବିହାରର ଭାଗଲପୁର ଗସ୍ତ କରିବେ ଏବଂ ଅପରାହ୍ଣ ପ୍ରାୟ ୨ ଟା ୧୫ ମିନିଟରେ ପିଏମ କିଷାନ ଯୋଜନାର ଉନବିଂଶତମ କିସ୍ତିର ଅର୍ଥ ଟ୍ରାନ୍ସଫର କରିବେ ଏବଂ ଜାତି ଉଦ୍ଦେଶ୍ୟରେ ବିହାରର ବିଭିନ୍ନ ଉନ୍ନୟନମୂଳକ ପ୍ରକଳ୍ପର ଶିଳାନ୍ୟାସ ଓ ଲୋକାର୍ପଣ କରିବେ । ଏହାପରେ ସେ ଗୌହାଟୀ ଯାତ୍ରା କରିବେ ଏବଂ ସନ୍ଧ୍ୟା ପ୍ରାୟ ୬ଟାରେ ଝୁମର ବିନାଦିନୀ ୨୦୨୫ କାର୍ଯ୍ୟକ୍ରମରେ ଯୋଗ ଦେବେ । ଫେବୃଆରୀ ୨୫ ତାରିଖ ପ୍ରାୟ ପୂର୍ବାହ୍ନ ୧୦ଟା ୪୫ ମିନିଟରେ ଗୌହାଟୀରେ ଆଡଭେଣ୍ଟେଜ ଆସାମ ୨.୦ ଇନଭେଷ୍ଟମେଣ୍ଟ ଏବଂ ଇନଫ୍ରାଷ୍ଟ୍ରକଚର ସମିଟ ୨୦୨୫କୁ ଉଦଘାଟନ କରିବେ ।

ମଧ୍ୟପ୍ରଦେଶରେ ପ୍ରଧାନମନ୍ତ୍ରୀ

ଛତରପୁର ଜିଲ୍ଲାର ଗାହର ଗ୍ରାମରେ ପ୍ରଧାନମନ୍ତ୍ରୀ ବାଗେଶ୍ୱର ଧାମ ମେଡିକାଲ ଆଣ୍ଡ ସାଇନ୍ସ ରିସର୍ଚ୍ଚ ଇନଷ୍ଟିଚ୍ୟୁଟର ଶିଳାନ୍ୟାସ କରିବେ । ବିଭିନ୍ନ ବର୍ଗର ଲୋକଙ୍କ ପାଇଁ ଉତ୍ତମ ସ୍ୱାସ୍ଥ୍ୟସେବାର ପ୍ରତିବଦ୍ଧତା ସ୍ୱରୂପ ୨୦୦ କୋଟି ଟଙ୍କାରେ ପ୍ରତିଷ୍ଠିତ ହେବାକୁ ଥିବା କ୍ୟାନ୍ସର ହସପିଟାଲ ସ୍ୱଦେଶୀ ଜ୍ଞାନକୌଶଳର ମେସିନ ଏବଂ ବିଶେଷଜ୍ଞ ଡାକ୍ତରଙ୍କ ଦ୍ୱାରା ଗରିବ କ୍ୟାନ୍ସର ରୋଗୀଙ୍କୁ ମାଗଣା ଚିକିତ୍ସା ଉପଲବ୍ଧ କରାଇବ ।

ଭୋପାଳରେ ଦୁଇ ଦିନିଆ ଗ୍ଲୋବାଲ ଇନଭେଷ୍ଟର୍ସ ସମିଟ ୨୦୨୫କୁ ମଧ୍ୟ ପ୍ରଧାନମନ୍ତ୍ରୀ ଉଦଘାଟନ କରିବେ । ମଧ୍ୟପ୍ରଦେଶକୁ ବୈଶ୍ୱିକ ନିବେଶ ହବ୍ ରେ ପରିଣତ କରିବା ଉଦ୍ଦେଶ୍ୟରେ ଏହି ଗୁରୁତ୍ୱପୂର୍ଣ୍ଣ ମଞ୍ଚରେ ବିଭାଗ ୱାରି ଅଧିବେଶନ ଅନୁଷ୍ଠିତ ହେବ । ଏଥିସହ ଫାର୍ମା ଏବଂ ମେଡିକାଲ ଡିଭାଇସ, ଟ୍ରାନ୍ସପୋର୍ଟ ଏବଂ ଲଜିଷ୍ଟିକ୍ସ, ଉଦ୍ୟୋଗ, ଦକ୍ଷତା ବିକାଶ, ପର୍ଯ୍ୟଟନ ଏବଂ ଏମଏସଏମଇ ଆଦି କ୍ଷେତ୍ରରେ ସ୍ପେଶାଲ ଅଧିବେଶନ ଅନୁଷ୍ଠିତ ହେବ । ଏଥିସହ ଗୁରୁତ୍ୱପୂର୍ଣ୍ଣ ସହଯୋଗୀ ରାଷ୍ଟ୍ରଗୁଡ଼ିକ ପାଇଁ ଗ୍ଲୋବାଲ ସାଉଥ୍ କଣ୍ଟ୍ରିଜ୍ କନଫରେନ୍ସ, ଲାଟିନ ଆମେରିକା ଏବଂ କ୍ୟାରିବିଆନ ଭଳି ଇଣ୍ଟରନ୍ୟାସନାଲ ଅଧିବେଶନ ମଧ୍ୟ ଅନୁଷ୍ଠିତ ହେବ ।

ସମିଟ କାଳରେ ତିନୋଟି ଗୁରୁତ୍ୱପୂର୍ଣ୍ଣ ଔଦ୍ୟୋଗିକ ପ୍ରଦର୍ଶନ ମଧ୍ୟ ହେବ । ଅଟୋମୋବାଇଲ କ୍ଷେତ୍ରରେ ମଧ୍ୟପ୍ରଦେଶର ଦକ୍ଷତା ଏବଂ ଭବିଷ୍ୟତର ମୋବିଲିଟି ସଲ୍ୟୁସନ ପ୍ରଦର୍ଶନ କରିବାକୁ ଅଟୋ ସୋ ଅନୁଷ୍ଠିତ ହେବ । ଉଭୟ ପାରମ୍ପରିକ ଏବଂ ଆଧୁନିକ ବୟନ କ୍ଷେତ୍ରରେ ରାଜ୍ୟର ଦକ୍ଷତା ପ୍ରଦର୍ଶନ କରିବାକୁ ଦ ଟେକ୍ସଟାଇଲ ଆଣ୍ଡ ଫେସନ ଏକ୍ସପୋ ଅନୁଷ୍ଠିିତ ହେବ । ରାଜ୍ୟର ବିଶେଷ ହସ୍ତକଳା ଦକ୍ଷତା ଏବଂ ସାଂସ୍କୃତିକ ଐତିହ୍ୟ ‘ୱାନ ଡିଷ୍ଟ୍ରିକ୍ଟ - ୱାନ ପ୍ରଡକ୍ଟ’ (ଓଡିଓପି) ଗ୍ରାମରେ ପ୍ରଦର୍ଶିତ ହେବ ।

ସମିଟରେ ୬୦ରୁ ଅଧିକ ଦେଶର ପ୍ରତିନିଧି, ବିଭିନ୍ନ ଆନ୍ତର୍ଜାତିକ ସଙ୍ଗଠନର କର୍ମକର୍ତ୍ତା ଏବଂ ଦେଶର ୩୦୦ ଜଣାଶୁଣା ଉଦ୍ୟୋଗପତି ଓ ନୀତି ନିର୍ମାତା ଯୋଗ ଦେବେ ।

ବିହାରରେ ପ୍ରଧାନମନ୍ତ୍ରୀ

କୃଷକଙ୍କ କଲ୍ୟାଣ ନିମନ୍ତେ ପ୍ରଧାନମନ୍ତ୍ରୀ ପ୍ରତିବଦ୍ଧ । ଏହି ଉଦ୍ଦେଶ୍ୟରେ ଭାଗଲପୁରରେ ଅନେକ ଗୁଡ଼ିଏ ପଦକ୍ଷେପ ନିଆଯିବ । ଭାଗଲପୁରରେ ସେ ପିଏମ କିଷାନ ଯୋଜନାର ଉନବିଂଶତମ କିସ୍ତି ଅର୍ଥ ଜାରି କରିବେ । ଏହାଦ୍ୱାରା ଦେଶବ୍ୟାପୀ ୯.୭ କୋଟିରୁ ଅଧିକ ଚାଷୀ ୨୧,୫୦୦ କୋଟି ଟଙ୍କାରୁ ଅଧିକ ପ୍ରତ୍ୟକ୍ଷ ଲାଭ ପାଇବେ ।

କୃଷକମାନଙ୍କୁ ସେମାନଙ୍କ ଉତ୍ପାଦର ଉଚିତ ପ୍ରାପ୍ୟ ଯେପରି ମିଳିବ ତାହାକୁ ସୁନିଶ୍ଚିତ କରିବାକୁ ପ୍ରଧାନମନ୍ତ୍ରୀ ଗୁରୁତ୍ୱ ଦେଉଛନ୍ତି । ଏହାକୁ ଦୃଷ୍ଟିରେ ରଖି ସେ ୨୦୨୦ ଫେବୃଆରୀ ୨୯ ତାରିଖରେ ୧୦ ହଜାର କୃଷକ ଉତ୍ପାଦକ ସଙ୍ଗଠନ (ଏଫପିଓ)ର ଗଠନ ଏବଂ ପ୍ରୋତ୍ସାହନ ପାଇଁ କେନ୍ଦ୍ରୀୟ କ୍ଷେତ୍ର ଯୋଜନାର ଶୁଭାରମ୍ଭ କରିଥିଲେ । ଏହା କୃଷକମାନଙ୍କୁ ସାମୁହିକ ଭାବେ ନିଜ କୃଷି ଉତ୍ପାଦର ବିପଣନ ଏବଂ ଉତ୍ପାଦନ ପାଇଁ ସହାୟତା କରୁଛି । ପାଞ୍ଚ ବର୍ଷ ମଧ୍ୟରେ କୃଷକମାନଙ୍କ ପାଇଁ ପ୍ରଧାନମନ୍ତ୍ରୀଙ୍କ ଏହି ପ୍ରତିବଦ୍ଧତା ସଫଳ ହୋଇପାରିଛି ଏବଂ ସେ କାର୍ଯ୍ୟକ୍ରମ ମଧ୍ୟରେ ଦେଶରେ ୧୦ ହଜାର ତମ ଏଫପିଓ ଗଠନର ମାଇଲଖୁଣ୍ଟକୁ ଚିହ୍ନିତ କରିଛନ୍ତି ।

ରାଷ୍ଟ୍ରୀୟ ଗୋକୁଳ ମିଶନ ଅଧୀନରେ ମୋତିହାରିରେ ସ୍ୱଦେଶୀ ବ୍ରିଡର ଦକ୍ଷତା କେନ୍ଦ୍ରକୁ ପ୍ରଧାନମନ୍ତ୍ରୀ ଉଦଘାଟନ କରିବେ । ଏହାର ପ୍ରମୁଖ ଉଦ୍ଦେଶ୍ୟ ହେଲା ଅତ୍ୟାଧୁନିକ ଆଇଭିଏଫ୍ ଟେକନିକ ଆରମ୍ଭ କରିବା, ଆଗାମୀ ଦିନରେ ପ୍ରଜନନ ପାଇଁ ସ୍ୱଦେଶୀ ବ୍ରିଡ୍ ର ଉତ୍କୃଷ୍ଟ ପଶୁଙ୍କ ଉତ୍ପାଦନ ଏବଂ ଆଧୁନିକ ପ୍ରଜନନ ଟେକନିକ୍‌ରେ କୃଷକ ଓ ପେସାଦାରମାନଙ୍କୁ ପ୍ରଶିକ୍ଷଣ ପ୍ରଦାନ କରିବା । ସେ ବରୌଣୀରେ ମଧ୍ୟ ଦୁଗ୍ଧ ଉତ୍ପାଦନ ସଂଯନ୍ତ୍ରର ଉଦଘାଟନ କରିବେ । ଏହାର ଉଦ୍ଦେଶ୍ୟ ୩ ଲକ୍ଷ ଦୁଗ୍ଧ ଉତ୍ପାଦକ ମାନଙ୍କ ପାଇଁ ଏକ ସଂଗଠିତ ବଜାର ସୃଷ୍ଟି କରିବା ।

କନେକ୍ଟିଭିଟି ଏବଂ ଆନୁଷଙ୍ଗିକ ଭିତ୍ତିଭୂମିକୁ ସୁଦୃଢ଼ କରିବା ଲକ୍ଷ୍ୟରେ ନିଜ ପ୍ରତିବଦ୍ଧତା ସ୍ୱରୂପ ୫୨୬ କୋଟି ଟଙ୍କାରୁ ଅଧିକ ବ୍ୟୟରେ ନିର୍ମିତ ୱାରିସଲିଗଞ୍ଜ-ନୱାଦା-ତିଲୈୟା ରେଳ ଖଣ୍ଡର ଦୋହରୀକରଣ ଏବଂ ଇସମାଇଲପୁର-ରଫିଗଞ୍ଜ ରୋଡ ଓଭରବ୍ରିଜକୁ ପ୍ରଧାନମନ୍ତ୍ରୀ ରାଷ୍ଟ୍ରକୁ ସମର୍ପିତ କରିବେ ।

ଆସାମରେ ପ୍ରଧାନମନ୍ତ୍ରୀ

ପ୍ରଧାନମନ୍ତ୍ରୀ ଝୁମର ବିନାଦିନୀ (ମେଗା ଝୁମର) ୨୦୨୫ କାର୍ଯ୍ୟକ୍ରମରେ ଭାଗ ନେବେ । ଏହା ଏକ ଆକର୍ଷଣୀୟ ସାଂସ୍କୃତିକ କାର୍ଯ୍ୟକ୍ରମ, ଯେଉଁଥିରେ କି ୮୦୦୦ କଳାକାର ଝୁମର ନୃତ୍ୟ କରିବେ । ଝୁମର ନୃତ୍ୟ ଆସାମର ଚା’ ଜନଜାତି ଓ ଆଦିବାସୀ ସମୁଦାୟର ଏକ ଲୋକନୃତ୍ୟ । ଏହା ସମାବେଶୀତା, ଏକତା ଏବଂ ସାସ୍କୃତିକ ଗୌରବ ଭାବନାର ପ୍ରତୀକ ଏବଂ ଆସାମର ସମନ୍ୱିତ ସାଂସ୍କୃତିକ ସମନ୍ୱୟର ପ୍ରତୀକ ମଧ୍ୟ । ମେଗା ଝୁମର କାର୍ଯ୍ୟକ୍ରମ ଆସାମ ଚା’ ଉଦ୍ୟୋଗର ୨୦୦ ବର୍ଷ ଏବଂ ଆସାମରେ ଔଦ୍ୟେଗୀକରଣର ୨୦୦ ବର୍ଷର ପ୍ରତୀକ ।

ଫେବୃଆରୀ ୨୫ ଓ ୨୬ ତାରିଖରେ ଗୌହାଟୀରେ ଅନୁଷ୍ଠିତ ହେବାକୁ ଥିବା ଆଡଭେଣ୍ଟେଜ ଆସାମ ୨.୦ ନିବେଶ ଏବଂ ଇନଫ୍ରାଷ୍ଟ୍ରକଚର ଶିଖର ସମ୍ମିଳନୀ ୨୦୨୫ କୁ ପ୍ରଧାନମନ୍ତ୍ରୀ ଉଦଘାଟନ କରିବେ । ଏଥିରେ ଏକ ଉଦଘାଟନୀ ଅଧିବେଶନ, ୭ଟି ମନ୍ତ୍ରୀସ୍ତରୀୟ ଅଧିବେଶନ ଏବଂ ୧୪ଟି ବିଷୟଗତ ଅଧିବେଶନ ସାମିଲ ରହିବ । ରାଜ୍ୟର ଆର୍ଥିକ ପରିଦୃଶ୍ୟକୁ ଦର୍ଶାଇବା ପାଇଁ ସମ୍ମିଳନୀରେ ବ୍ୟାପକ ପ୍ରଦର୍ଶନୀ ଅନୁଷ୍ଠିତ ହେବ । ଏଥିରେ ଔଦ୍ୟୋଗିକ ବିକାଶ, ବୈଶ୍ୱିକ ବ୍ୟାବସାୟିକ ସହଭାଗିତା, ଦ୍ରୁତ ଅଭିବୃଦ୍ଧିଶୀଳ ଉଦ୍ୟୋଗ ଏବଂ ଜୀବନ୍ତ ଏମଏସଏମଇ କ୍ଷେତ୍ର ଉପରେ ଧ୍ୟାନ ରହିବ ଏବଂ ୨୪୦ରୁ ଅଧିକ ପ୍ରଦର୍ଶକ ସାମିଲ ହେବେ ।

ଶିଖର ସମ୍ମିଳନୀରେ ବିଭିନ୍ନ ଆନ୍ତର୍ଜାତିକ ସଙ୍ଗଠନ, ବୈଶ୍ୱିକ ନେତା ଏବଂ ନିବେଶକ, ନୀତି ନିର୍ମାତା, ଉଦ୍ୟୋଗ ବିଶେଷଜ୍ଞ, ଷ୍ଟାର୍ଟ ଅପ୍ ଏବଂ ଛାତ୍ରମାନେ ଅଂଶ ଗ୍ରହଣ କରିବେ ।

SR