કેન્દ્રીય જલ શક્તિ મંત્રી શ્રી સી આર પાટીલે રાજસ્થાનના મુખ્યમંત્રી શ્રી ભજનલાલ શર્માની ઉપસ્થિતિમાં જળ સુરક્ષા પરની બીજી રાજ્ય જળ મંત્રીઓની પરિષદનું પરંપરાગત જલ કળશ સમારંભ સાથે ઉદઘાટન કર્યું હતું.

જળ સુરક્ષા પર રાજ્યના જળ મંત્રીઓના બીજા સંમેલનમાં બોલતા કેન્દ્રીય જળ શક્તિ મંત્રી શ્રી સી આર પાટિલે જલ જીવન મિશન (જેજેએમ)ની નોંધપાત્ર પ્રગતિ પર પ્રકાશ પાડ્યો હતો અને ભારતના દરેક ગ્રામીણ પરિવારો માટે પીવાના શુધ્ધ અને સ્થાયી પાણી સુનિશ્ચિત કરવા માટે સરકારની પ્રતિબદ્ધતાની પુનઃપુષ્ટિ કરી હતી.

શ્રી પાટિલે જણાવ્યું હતું કે, પ્રધાનમંત્રી શ્રી નરેન્દ્ર મોદીનાં નેતૃત્વમાં આ અભિયાને અભૂતપૂર્વ પ્રગતિ કરી છે, જેમાં 80 ટકાથી વધારે ગ્રામીણ કુટુંબો અત્યારે નળનાં પાણીનાં જોડાણો મેળવી રહ્યાં છે. જેના કારણે 15 કરોડથી વધુ પરિવારોને સ્વચ્છ અને સલામત પીવાના પાણીનો લાભ ઘરઆંગણે મળી રહ્યો છે.

મંત્રીશ્રીએ જાહેર આરોગ્ય, મહિલા સશક્તિકરણ અને સામુદાયિક ભાગીદારી પર જેજેએમની પરિવર્તનશીલ અસર પર ભાર મૂક્યો હતો. ડબ્લ્યુએચઓના અંદાજ મુજબ, આ મિશને ઝાડા જેવા પાણીજન્ય રોગોને કારણે થતાં 4 લાખ મૃત્યુને રોકવામાં ફાળો આપ્યો છે. તદુપરાંત, આ પહેલને કારણે આરોગ્ય-સંબંધિત ખર્ચમાં નોંધપાત્ર ઘટાડો થયો છે, જેણે ગ્રામીણ વસ્તીની એકંદર સુખાકારીમાં સુધારો કર્યો છે.

આ મિશનની મુખ્ય વિશેષતા મહિલાઓના સશક્તિકરણની છે, જેમાં 25 લાખ મહિલાઓને ફિલ્ડ ટેસ્ટિંગ કિટનો ઉપયોગ કરીને પાણીની ગુણવત્તાનું પરીક્ષણ કરવા માટે તાલીમ આપવામાં આવી છે. આ પહેલે સમુદાયની આગેવાની હેઠળની દેખરેખને મજબૂત બનાવી છે, જે સુનિશ્ચિત કરે છે કે ઘરોમાં પાણી પહોંચતું પાણી ગુણવત્તાના ધોરણોને પૂર્ણ કરે છે. આ ઉપરાંત નળના પાણીની ઉપલબ્ધતાને કારણે મહિલાઓ માટે દરરોજના 5.5 કરોડ કલાકની બચત થઈ છે, જેનાથી તેઓ આર્થિક, શૈક્ષણિક અને સામાજિક પ્રવૃત્તિઓમાં જોડાઈ શકે છે.

સરકારનાં વિઝનની પુનઃપુષ્ટિ કરતાં શ્રી પાટિલે જણાવ્યું હતું કે, જળ સુરક્ષા એ વિકસિત ભારતનો મૂળભૂત આધારસ્તંભ છે – વર્ષ 2047 અને જલ જીવન મિશન આ લક્ષ્યાંકને હાંસલ કરવામાં મુખ્ય પ્રેરકબળ છે. સ્થાયી પ્રગતિ અને સમુદાયની મજબૂત ભાગીદારી સાથે, અમે સ્વચ્છ પીવાના પાણીને બધા માટે વાસ્તવિક બનાવવા માટે પ્રતિબદ્ધ છીએ.

 

AP/IJ/GP/JT

સોશિયલ મીડિયા પર અમને ફોલો કરો :  @PIBAhmedabad    /pibahmedabad1964    /pibahmedabad  pibahmedabad1964[at]gmail[dot]com

(Release ID: 2104572) Visitor Counter : 35