نیشنل ہیومن رائٹس کمیشن(این ایچ آر سی) انڈیا نے اندرا گاندھی نیشنل فارسٹ اکیڈمی، دہرادون کے 14ویں مڈ کریئر کورس (فیز III) کے حصے کے طور پر نئی دہلی میں انڈین فاریسٹ سروس(آئی ایف ایس)) افسران کے لیے ایک تربیتی پروگرام کا اہتمام کیا۔ افسران سے خطاب کرتے ہوئے، جناب جسٹس وی راما سبرامنیم، چیئرپرسن، این ایچ آر سی، انڈیا، نے ملک کے قدرتی ورثے کے تحفظ میں انڈین فاریسٹ سروس کے افسران کے اہم کردار پر زور دیا۔ انہوں نے کہا کہ انہیں تحفظ کی ضروریات کے ساتھ ترقی کی ضروریات کو متوازن کرنے کے مشکل کام کا سامنا ہے۔ انہوں نے کہا کہ اپنے فرائض کو مؤثر طریقے سے نبھانے کے لیے انہیں جنگلات کے قانون کے تاریخی تناظر، ابھرتے ہوئے چیلنجز اور قانون، پالیسی اور نفاذ کے درمیان باہمی عمل کو سمجھنے کی ضرورت ہے۔

اسپیکر نے برطانوی دور سے لے کر آج تک جنگلات کے قانون کے تاریخی ارتقاء پر بھی روشنی ڈالی اور ترقی اور تحفظ کے درمیان بدلتے ہوئے توازن پر زور دیا۔ بحث میں جنگلات کی زمین کے حصول پر 2013 کے لینڈ ایکوزیشن ایکٹ کے اثرات پر تبادلہ خیال کیا گیا، جس کے نتیجے میں جنگلات کے تحفظ کے قانون میں 2023 میں ترمیم کی گئی۔

انہوں نے کہا کہ عدالتوں نے جنگلات کے تحفظ کی تشکیل میں بھی اہم کردار ادا کیا ہے۔ مثال کے طور پر، تاریخی 1995 ٹی این گوداورمن کیس نے جنگل کے شعبے پر لکڑی کی صنعت کے اثرات کو کافی حد تک کم کردیا۔ اس معاملے  نےنہ صرف مضبوط قوانین کی ضرورت پر روشنی ڈالی بلکہ اس پر عمل درآمد کے موثر طریقہ کار کی بھی نشاندہی کی۔ گوداورمن کیس میں عدالت کی مسلسل شمولیت، ’جاری منڈیمس‘ کے تصور کے ذریعے، ترقی اور تحفظ کے درمیان توازن قائم کرنے میں مسلسل چیلنجوں کی نشاندہی کرتی ہے۔

جناب بھرت لال، سکریٹری جنرل، این ایچ آر سی، انڈیا نے اپنے خطاب میں کہا کہ تاریخ بتاتی ہے کہ عکاسی کے لمحات کس طرح تقدیر کو نئی شکل دے سکتے ہیں اور تبدیلی لا سکتے ہیں۔ شہنشاہ اشوک نے کلنگا جنگ کے بعد امن کا راستہ اختیار کیا۔ اسی طرح، گوتم بدھ نے اپنی مراعات کو ترک کر دیا، روشن خیالی حاصل کی اور اپنی زندگی انسانیت کی رہنمائی کے لیے وقف کر دی۔ مہاتما گاندھی کو ٹرین سے ہٹانے سے دنیا بھر میں ایک تحریک چلی جس نے انسانیت کی تقدیر بدل دی۔

جناب لال نے کہا کہ انسانی حقوق سب سے بنیادی ضرورت ہیں اور ہمیں ہر ایک کے حقوق کی حفاظت کے لیے ان پر یقین کرنا ہوگا، خاص طور پر پسماندہ لوگوں کے۔ انہوں نے ہندوستانی آئین میں درج انسانی حقوق کے اصولوں کے تئیں اجتماعی وابستگی پر زور دیا، خاص طور پر آرٹیکل 32، جو ذات، جنس یا مذہب سے قطع نظر مساوی حقوق کی ضمانت دیتا ہے۔ انہوں نے اپنے کریئر کے بعد کے مراحل میں پالیسیوں کی اسٹریٹجک ترقی کی بنیاد کے طور پر ابتدائی شعبہ کے تجربے سے فائدہ اٹھانے کی اہمیت کو اجاگر کیا۔

جناب لال نے کمیشن کی تشکیل کے بارے میں بھی بتایا جو کہ پی ایچ آر ایکٹ 1993 کے مطابق ہے۔ کمیشن کے مختلف کاموں کے علاوہ انہوں نے کمیشن کی تشکیل کے بارے میں بھی جانکاری دی۔ انہوں نے ان پر زور دیا کہ وہ اپنے حاصل کردہ علم پر غور کریں اور اسے معاشرے میں بامعنی شراکت کے لیےاستعمال کریں۔ اس کے بعد ایک معلوماتی سوال و جواب کا سیشن ہوا۔ سیشن کا اختتام لیفٹیننٹ کرنل وریندر سنگھ، ڈائریکٹر، این ایچ آر سی، انڈیا کے شکریہ کے ساتھ ہوا۔

********

 

ش ح۔م  ح۔اش ق

 (U: 7257)

(Release ID: 2104139) Visitor Counter : 29