مرکزی وزیر مملکت برائے صحت و خاندانی بہبود جناب پرتاپ راؤ گنپتراو جادھو نے آج یہاں فوڈ سیفٹی اینڈ اسٹینڈرڈ اتھارٹی آف انڈیا (ایف ایس ایس اے آئی)، وزارت صحت و خاندانی بہبود کے زیر اہتمام غذائی اجناس میں کیڑے مار ادویات کی باقیات کی نگرانی میں چیلنجوں پر قومی اسٹیک ہولڈروں مشاورت کا افتتاح کیا۔ غذا میں کیڑے مار دواؤں کی باقیات کی کڑی نگرانی کے لیے ایک ملک گیر حکمت عملی کی ضرورت پر زور دیتے ہوئے جناب جادھو نے تمام اسٹیک ہولڈروں پر زور دیا کہ وہ خوراک کی حفاظت اور پائیداری کے لیے بہترین طور طریقوں کو فروغ دینے کے لیے مل کر کام کریں۔

کیڑے مار دواؤں کے بارے میں اسٹیک ہولڈروں کی یہ مشاورت پائیدار پیکیجنگ، نیوٹراسوٹیکل، اینٹی مائکروبیل مزاحمت وغیرہ جیسے ابھرتے ہوئے مسائل پر اسٹیک ہولڈروں کے ساتھ اس طرح کی مشاورت کے سلسلے میں پہلا موقع ہے۔ اسٹیک ہولڈروں سے خطاب کرتے ہوئے مرکزی وزیر نے ایف ایس ایس اے آئی کے اقدام کی ستائش کی اور کیڑے مار دواؤں کی نگرانی میں موجودہ طریقوں کا جائزہ لینے اور کیڑے مار ادویات کی باقیات کے چیلنجوں سے نمٹنے کے لیے ایک مضبوط میکانزم بنانے کی ضرورت پر زور دیا۔ انھوں نے لاکھوں افراد کے ذریعہ معاش کو برقرار رکھنے اور غذائی تحفظ کو یقینی بنانے میں زراعت کی اہمیت پر بھی زور دیا۔ جناب جادھو نے مزید کہا کہ آج کے کسان نئی ٹکنالوجی کے استعمال کے لیے زیادہ موزوں ہیں لہذا انھیں کیڑے مار دواؤں کے استعمال اور اچھے زرعی طریقوں (جی اے پی) کے بارے میں تعلیم دینا آسان ہے۔ انھوں نے غذائی اجناس میں کیڑے مار دواؤں کی باقیات کو کم سے کم کرنے کے لیے ٹھوس ایکشن پلان تیار کرنے کے لیے تمام اسٹیک ہولڈروں کی مشترکہ کوششوں کی بھی وکالت کی۔

جناب جادھو نے یہ بھی کہا کہ یہ مشاورت خلا کی نشاندہی میں مددگار ثابت ہوگی ، جس پر توجہ مرکوز کی جاسکتی ہے اور اس پر غور کیا جاسکتا ہے تاکہ فوڈ سیفٹی کا ایک مضبوط میکانزم تیار کیا جاسکے اور غذائی اجناس کو کیڑے مار دواؤں کی باقیات سے پاک بنایا جاسکے۔ انھوں نے فوڈ سیفٹی فریم ورک کو مضبوط بنانے میں ایف ایس ایس اے آئی کی کوششوں کی بھی تعریف کی۔

مرکزی صحت سکریٹری محترمہ پونیا سلیلا شریواستو نے اس مسئلہ پر اپنی قیمتی بصیرت کا اظہار کرتے ہوئے اس بات پر زور دیا کہ کیڑے مار دواؤں کا اندھا دھند استعمال صحت عامہ کے لیے اہم خطرات پیدا کرتا ہے۔ انھوں نے نگرانی کے نظام کو مضبوط بنانے اور کیڑے مار دواؤں کے استعمال کے بارے میں عوامی شعور اجاگر کرنے کی اہمیت پر زور دیا تاکہ اس بات کو یقینی بنایا جاسکے کہ ہر شخص کو محفوظ خوراک تک رسائی حاصل ہو۔ انھوں نے صحت عامہ کے تحفظ کے مقصد سے قابل عمل حکمت عملی تیار کرنے کی وکالت کی اور اس بات پر زور دیا کہ اس مشاورت کا بنیادی مقصد اس بات کو یقینی بنانا ہے کہ ہر کوئی محفوظ اور صحت مند خوراک سے لطف اندوز ہوسکے۔

وزارت زراعت اور کسانوں کی بہبود کے سکریٹری جناب دیویش چترویدی نے ایک خصوصی خطاب کیا جس میں انھوں نے بازار میں جعلی کیڑے مار دواؤں کے مسئلے کو اجاگر کیا اور صارفین کی صحت کے تحفظ کے لیے کیڑے مار دواؤں کے منصفانہ استعمال کی بھی وکالت کی۔

فوڈ پروسیسنگ انڈسٹریز کی وزارت کے سکریٹری جناب سبرت گپتا نے فوڈ ویلیو چین کے تمام اسٹیک ہولڈروں کو کیڑے مار دواؤں سے متعلق چیلنجوں سے نمٹنے کے لیے تعاون کرنے کی ضرورت پر زور دیا۔ ’’کیڑے مار دوائیں نہ صرف خراب صحت کا سبب بنتی ہیں بلکہ خراب تجارت کا بھی سبب بنتی ہیں۔

ایف ایس ایس اے آئی کے سی ای او جناب جی کملا وردھن راؤ نے اپنے اختتامی کلمات میں سخت نگرانی اور ریگولیٹری اقدامات کے ذریعے فوڈ سیفٹی کو یقینی بنانے کے ایف ایس ایس اے آئی کے عزم کا اعادہ کیا۔ انھوں نے نتیجہ اخذ کیا کہ ’’خوراک کی حفاظت کو یقینی بنا کر، ہم نہ صرف عوامی صحت بلکہ اپنے ماحول، اپنے کسانوں کے ذریعہ معاش، اور بین الاقوامی تجارت کے مستقبل کی بھی حفاظت کرتے ہیں. اس مشاورت کے نتائج زیادہ موثر پالیسیوں اور ضابطوں کی بنیاد بنائیں گے جو آج کے زرعی اور فوڈ سیفٹی منظرنامے کی پیچیدگیوں کے غماز ہیں‘‘ انھوں نے مزید کہا کہ اس مشاورت کی بصیرت اور سفارشات کیڑے مار ادویات کی باقیات کی نگرانی کو بہتر بنانے اور پورے بھارت میں خوراک کی حفاظت کو یقینی بنانے کے لیے زیادہ مضبوط پالیسیوں اور ایکشن پلان کی ترقی میں معاون ثابت ہوں گی۔

کیڑے مار ادویات کی باقیات پر قومی اسٹیک ہولڈروں مشاورت کیڑے مار ادویات کے استعمال کی نگرانی اور انضباطی  تعمیل کو یقینی بنانے میں چیلنجوں سے نمٹنے کے ذریعہ فوڈ سیفٹی کو مضبوط بنانے میں ایک اہم قدم ہے۔ ایک مربوط نقطہ نظر کی ضرورت کو تسلیم کرتے ہوئے ، ایف ایس ایس اے آئی نے نگرانی کو بڑھانے ، حفاظتی معیارات کو نافذ کرنے اور خوراک میں کیمیائی باقیات سے وابستہ صحت کے خطرات کو کم کرنے کے لیے یہ مشاورت طلب کی۔ اہم اسٹیک ہولڈروں کو یکجا کرکے یہ مشاورت بہترین طریقوں، ابھرتے ہوئے خطرات اور بائیو کیڑے مار ادویات اور درست اطلاق جیسے جدید حلوں پر تعاون کو فروغ دیتی ہے۔ چونکہ بھارت عالمی حفاظتی معیارات کے ساتھ ہم آہنگ ہے ، لہذا یہ بحث عوامی صحت کے تحفظ اور پائیدار زراعت کو فروغ دینے میں اہم ہے۔

اس تقریب میں اہم اسٹیک ہولڈروں بشمول سرکاری عہدیداروں، سائنسی ماہرین، ریگولیٹری باڈیز، نیشنل انسٹی ٹیوٹس، انڈسٹری ایسوسی ایشن، کسان تنظیموں، کنزیومر ایسوسی ایشنز اور کیڑے مار ادویات بنانے والی تنظیموں کے نمائندوں کو حکمت عملی پر غور و خوض اور قیمتی بصیرت کا تبادلہ کرنے کے لیے یکجا کیا گیا، جس سے ٹھوس ایکشن پلان تیار کرنے میں مدد ملے گی۔

مشاورت میں ایک تکنیکی سیشن پیش کیا گیا جس کے بعد ’’عالمی ریگولیٹری فریم ورک اور غذائی اجناس میں کیڑے مار ادویات کی باقیات کی نگرانی میں قومی سطح کے چیلنجز‘‘ پر ایک پینل مباحثہ ہوا۔ اس پینل میں کیڑے مار ادویات کی باقیات (جے ایم پی آر)، ایف اے او، آئی سی اے آر، سی آئی بی اینڈ آر سی اور ایف ایس ایس اے آئی کے سائنسی پینل برائے حشرہ کش باقیات کے بارے میں مشترکہ ایف اے او / ڈبلیو ایچ او اجلاس کے ماہرین شامل تھے۔

اہم گفت و شنید میں قومی نگرانی کے پروگراموں کو وسعت دینے ، لیبارٹری کی صلاحیتوں کو بڑھانے ، بھارت کے منفرد زرعی اور ماحولیاتی حالات پر غور کرتے ہوئے کوڈیکس ایلیمینٹریس جیسے بین الاقوامی معیاروں کے ساتھ بھارت کی زیادہ سے زیادہ باقیات کی حدود (ایم آر ایل) کو ہم آہنگ کرنے کی اہمیت پر زور دیا گیا۔

دوپہر کے کھانے کے بعد کے سیشن میں ایک اوپن فورم اسٹیک ہولڈروں سے گفت و شنید کی گئی جس میں زراعت، فوڈ پروسیسنگ اور صارفین کی تنظیموں کے اسٹیک ہولڈروں نے اپنے خدشات اور سفارشات کا اظہار کیا۔ مشاورت کے دوران اٹھائے گئے اہم مسائل میں کیڑے مار دواؤں کی باقیات کی موثر نگرانی کو نافذ کرنے میں چیلنجز، بھارت کی زیادہ سے زیادہ باقیات کی حدود (ایم آر ایل) کو بین الاقوامی معیارکے ساتھ ہم آہنگ کرنے کی ضرورت، اور آف لیبل اور کیڑے مار دواؤں کے زیادہ استعمال پر تشویش شامل ہیں۔ کسانوں کی تعلیم اور بیداری کو بڑھانے، ڈیجیٹل ٹریسیبلٹی حل متعارف کرانے اور صحت کے خطرات اور تجارتی رکاوٹوں کو کم سے کم کرنے کے لیے بائیو کیڑے مار ادویات اور انٹیگریٹڈ پیسٹ مینجمنٹ (آئی پی ایم) جیسے پائیدار متبادلکو فروغ دینے پر بھی زور دیا گیا۔

***

(ش ح – ع ا)

U. No. 6590

(Release ID: 2102966) Visitor Counter : 58