Hapdeng ka jingbteng ka jngbun briew, ka Tnad Rel ka la trei borbah ban ai jingshakri ia ki para bangeit da kaba wan ialam bad leit buh biang sha ki iing jong ki ha ka Mahakumbh. Ha ka jingmih ka khubor ba bakla shi sngi shuwa kane, u Myntri sorkar pdeng ba dei khmih ia ka Tnad Rel, Ashwini Vaishnaw u la pyntip sha ka ri lyngba ki lad pathai khubor ba kumba 330 tylli ki rel na phra tylli ki steshon ha ka thain Prayagraj ki la kit 12 lak 50 hajar ngut ki briew sha ki iing jong ki. Wat haba ka jingbun briew kam pat duna, ka Tnad Rel ka la pyniaid mar kawei ka rel na kine ki steshon tang ha ki 4 minit kaba pynthikna ba ki para bangeit kim hap ban ap hadien ba ki la pyndep ia ka jingngam ba kyntang.

Shuwa ka jingsdang ka Amrit Snan jong ka Maghi Poornima kaba khuid, kawei ka rake jong kine ki rel ka kit kumba 3780 ngut ki briew tang ha ka shisien leit kaba pyni ba ka jingbun briew kam pat duna. Ha ka jingpeit bniah ia ka jinglong jingman ha ka jingialang bad ki ophisar jong ki zonal & divisional, u Chairman Railway Board & CEO, Satish Kumar u la bthah ia ki ophisar ban pyntip sha ki lad pathai khubor baroh ki sienjam jong ka ha ka jingai jingshakri ba pura ia ki briew. U la ong ba ka Prayagraj Junction lem bad 7 tylli kiwei ki steshon Prayagraj Chheoki, Naini, Subedarganj, Prayag, Phaphamau, Prayagraj Rambagh, bad Jhusi ki treikam pura. Hapdeng ka jingbteng ka jingbun briew, ki rel ba kyrpang bad kiwei kiwei ki rel ki treikam pura na kine ki 8 tylli ki steshon na ka thain Prayagraj. Ka jingkhang ia tang kawei ka steshon, Prayagraj Sangam, ar sngi shuwa bad ar sngi hadien kano kano ka Amrit Snan kadei kaba la leh man ka por, la ban jur u Satish Kumar. Shuh shuh, la leh ia kane ha ka jingai jingmut jong ki bor pyniaid distrik jong ka Prayagraj bad la leh ia kane ha baroh ki jingngam ba kyntang ba ladep, ki Amrit Snan. Kam don kano kano kaba thymmai ha kaba iadei bad kane. U la kyntu ia ki lad pathai khubor, ki Zonal & Divisional office of public relations jong ka Tnad Rel ban pyni ia ki sienjam ba kongsan ban iarap ia ki parabangeit ban poi sha ka nongbah Mahakumbh, khamtam ha ka jingkhapngiah ka leit ka wan ha ki jaka ba marjan. Shuwa ka 3 baje janmiet mynta ka sngi, palat 201 tylli ki rel ba kyrpang bad kiwei kiwei ki rel ki la mih na 8 tylli ki steshon kynthup ka Prayagraj Junction da kaba kit palat 9 lak ngut ki pilkrim. 

Shuwa kane, u CRB & CEO Satish Kumar u la ai jingtip ia u Myntri Sorkar pdeng ba dei khmih ia ka Tnad Rel, Ashwani Vaishnaw shaphang ka jingtreikam ryntih ia ki rel ha ka thain Prayagraj ha ka kamra jong ka Rail Bhawan, ba don baroh ki jingring dur CCTV na baroh ki steshon rel. Baroh arngut ki la peit bniah ia ka jinglong jingman ba iadei bad ka jingbun briew bad iamir jingmut shaphang ka jingpynkhreh ka Tnad Rel shuwa ka Amrit snan ban wan jong ka Maghi Purnima. Hadien kane, u Chairman, Railway Board u la kyntu ia ki lad pathai khubor bad ki paidbah ban nym ngop ha ki khubor shaphang ka jingshah ktah ki jingai jingkyrshan ha Prayagraj Junction. U la ong ba lah ban pynthikna ia ki jingshisha da kaba leit sha 8 tylli ki steshon rel ha kaba ki rel kyrpang jong ka Mela, ba don u logo mahakumbh, ki iaid mynsngi bad mynmiet. Ka jingpyntreikam 330 tylli ki rel ha kano kano ka sngi da ka tnad rel kadei ka dak jong ka jingkut jingmut ban ai jingshakri ia ki briew jong ka ri. Kane ka la jan ryngkat bad 360 tylli ki rel ba pyniaid ha ka Mauni Amavasya ha u bnai ba ladep, ha kaba ka jingbun briew ka jur bha.

La ai jingmut ia ki nongleit nongwan ban peit ia ki tyllong khubor jong ka tnad rel na ka bynta ki jingtip bad ban kiar na ki jingtip ba ialam bakla.

*****