Ha ka jingtrei borbah ban kyntiew ia ka jingseng kam lajong ki longkmie ha ka thain shatei lammihngi, ka Tnad Skill Development and Entrepreneurship (MSDE), Ha ka jingiatreilang bad ka NITI Aayog ka la plie paidbah ia ka Swavalambini – ka prokram seng kam lajong ki longkmie – ha Assam, Meghalaya bad Mizoram. Kane ka sienjam ka thmu ban pynkupbor ia ki samla pule kynthei ha ki jaka pule ba kham shalor ba la jied ha ka thain shatei lammihngi da kaba pynbiang ia ki rukom pyrkhat kum ki nongseng kam lajong, ki jingdon jingem bad ka jingialam lynti kaba ki donkam ban jop ia ka jingiaid lynti jong ki ha ka jingseng kam lajong.

Ha ka sien ba nyngkong ka MSDE lyngba ka Indian Institute of Entrepreneurship (IIE) ha ka jingiatreilang bad ka NITI Aayog la wanrah ia ka kam kaba ai jingsngewthuh, kyntiew, ai jingialam lynti, ai jingkyrshan pisa.  Kito kiba la lah ban tei ia ki kam jong ki kin ioh jingithuh bad ioh khusnam, kaba pynthikna ba ki khana jingjop jong ki kin ai mynsiem ia kiwei pat. Kane ka sienjam kan ai ka rukom treikam kaba shai kumno ba ngin kyntiew ia ki kam ba ialam da ki longkmie ha India.

Ha kane ka prokram ba la pynlong lyngba ka bor internet la sakhi ka jingplie paidbah ia ka sienjam ha 9 tylli ki college bad ki skul bah da u Jayant Chaudhary, Myntri Khynnah ba dei khmih ia ka Tnad Development and Entrepreneurship (MSDE) bad Myntri Khynnah ba dei khmih ia ka Tnad Pule Puthi, Sorkar India. U Atul Kumar Tiwari, Secretary, MSDE lem bad kiwei ki ophisar jong ka Tnad ki la iadonlang ha kane ka jingialang plie paidbah.

Ia kane ka prokram la pyntreikam ha kylleng ki jaka pule ba kham shalor, kynthup ia ka Gauhati University, North-Eastern Hill University (NEHU), Kiang Nangba Government College, RiBhoi College, Mizoram University, Government Champai College, Lunglei Government College, Handique College bad Dispur College, bad kiwei kiwei.

Ha ka jingai jingkren halor ka sienjam wanrah jingkylla, u Jayant Chaudhary u la ong: ‘ka prokram Swavalambini Women Entrepreneurship kadei ka jingkut jingmut ban pynkupbor, iarap bad kyntiew ia ki samla kynthei kum ki nongseng kam bad ki nongialam ha ki por ban wan. Ka prokram ka thmu ban kyntiew ia ki sap da kaba phaikhmat ha ka thain kaba bun ki lad bad yn ai ka jingkyrshan ba donkam ban kyntiew ia ki jingthmu jong ki sha ki kam ba lah ban iaineh.”

“Ka sorkar jong ngi ka la iai kyrshan ia ka jingseng kam lajong ba ialam da ki longkmie lyngba ki prokram ba kongsan kum ka Start-Up India, Stand-Up India, PM Mudra Yojana, bad ka rynsan seng kam lajong ki longkmie. Ka Mang Tyngka 2025-26 jong ka sorkar pdeng ba dang shu pynbna shen ka la pynkhlain shuh shuh ia ka jingkut jingmut jong ka, lyngba ka jingkyntiew ia ka jingbei tyngka bad ki polisi ba biang na ka bynta ki start-up, kynthup ka jingbei tyngka 10,000 klur bad ka jingbteng sa 100% ka jingpyllait khajna halor ki jingiohnong jong ki start-up sa san snem. Lyngba ka jingai jingkyrshan, ka jingai jingmut, bad ka jingbei tyngka, ka Swalambini ka pyni ia ka bynta ba thymmai ha ka jingiaid lynti jong ngi sha ka jingseng kam lajong ba ialam da ki longkmie, kaba kongsan na ka bynta ka jingkylla jong ka ri,” u la bynrap.

Ka sienjam ka thmu ban ai jinghikai kaba ryntih lyngba ka Entrepreneurship Awareness Programme (EAP) kaba wanrah 600 ngut ki samla pule kynthei sha ka jingseng kam lajong kum ka lad kamai ja kpoh kaba seisoh lyngba ka session kaba 2 sngi ba kynthup ia ki nongrim jong ka jingseng kam lajong bad ki kabu. Na ka bynta 300 ngut ki samla pule ba shah jied, ka Women Entrepreneurship Development Programme (EDP) ka don ka jingai jinghikai kaba 40 kynta ba kynthup ki bynta ba kongsan ba iadei bad ka khaii pateng kum ka jingai jinghikai bad ka jingkyntiew ia ki sap, ka jingioh ram, ka jingpyniasoh bad ki iew, ka jingkyrshan ha kaba iadei bad ki kyndon ba dei ban bud bad ka jingkyrshan ha ki kam ain, ki jingai jingshakri kiba iadei bad ka kam khaii pateng, bad ki lad ban pyniasoh bad ki briew. Hadien kane yn don ka jingkyrshan kaba hynriew bnai ha ka jingialam lynti ka ban iarap ia ki nongiashim bynta ba kin pynkylla ia ki jingthmu jong ki sha ki kam kiba iaineh.

Ka National Education Policy (NEP) 2020 ka la buh nongrim na ka bynta ka jingai jinghikai kaba iadei bad ka jingseng kam lajong da kaba ban jur ia ka jingpyniasoh ia ka sap, ka jingiatreilang bad ki karkhana bad ka jingsngewthuh ia ka kam. Ka Swalambini kan tei halor kane ka nongrim, kaba pynthikna ba ki samla kynthei khamtam ha ki jylla ka thain shatei lammihngi ki ioh ka jingai jingmut ba donkam bad ka jingiarap pisa ban pynkylla ia ki jingthmu jong ki sha ki kam ba lah ban pyniar, ka ban plié ia ki lad kiba don na ka bynta ki longkmie ba seng kam lajong ha kine ki thain.

Ha ka jingithuh ia ka bynta ba kongsan jong ki nongai jinghikai ha ka jingkyntiew ia ka rukom pyrkhat kum ki nongseng kam lajong, ka prokram kan phaikhmat ruh ban kyntiew ia ki sap jong ki nonghikai ha ki jaka pule ba kham shalor lyngba ka Faculty Development Programme (FDP), kaba 5 sngi, ka ban iarap ia ki ban ai jinghikai bad ai jingmut ia ki samla pule ha ka jingseng kam lajong. Ki nonghikai kin ioh ia ki jinghikai ba la saindur ban pynbiang ia ki da ki jingtip ba thymmai tam, ki rukom pynkhlain ia ka kam khaii pateng bad ka rukom ai jinghikai.

Ka bynta ba kyrpang jong ka prokram kadei ka sienjam Award to Rewards, ka ban rakhe bad ai jingithuh ia ki longkmie kiba ioh jingjop ha ka jingseng kam lajong na ka Swalambini. Kane kan ai mynsiem ia ka pateng ban wan jong ki longkmie kiba long ki nongialam ha ka kam, kaba pynkhlain shuh shuh ia ka khubor ba ki kam ba ialam da ki longkmie kilong kiba donkam bha ban saindur ia ka lawei jong ka ioh ka kot jong ka ri. Kane ka prokram kan pyndonkam ruh ia ki workshop, ka jingialam lynti, ka jingpynbiang pisa khnang ban don ki kam kiba iaineh kiba longkhlieh da ki longkmie.

Ka prokram Swavalambini kan plié ki lad na ka bynta ki longkmie ha ka kam khaii pateng, ka jingangnud ban iohi ba 10% ki nongioh jinghikai EDP kiba sdang ia ki kam kiba seisoh. Da ka jingwanrah ia ka jingngeit ha ka jingseng kam lajong hapoh ki jaka pule ba kham shalor, kane ka sienjam kadei kaba kongsan ha ka lynti kaba dei ban rakhe bad kyntiew ia ka pateng ban wan jong ki longkmie kum ki nongialam.

***