రాయిసీనా హిల్స్ మీదుగా అస్తమించే సూర్యుడి భవ్య నేపథ్యంలో... 2025 జనవరి 29న భారత 76వ గణతంత్ర దినోత్సవాల ముగింపును సూచించే బీటింగ్ రిట్రీట్ వేడుక సందర్భంగా తీయనైన భారతీయ రాగాలాపన జడివానలో తడిసిముద్దవడానికి విజయ్ చౌక్ సన్నద్ధమైంది. భారతీయ సైన్యం (ఐఏ), భారతీయ నౌకాదళం (ఐఎన్), భారతీయ వైమానిక దళం (ఐఏఎఫ్)లతోపాటు కేంద్ర సాయుధ పోలీసు బలగాల (సెంట్రల్ ఆర్మ్‌డ్ పోలీస్ ఫోర్సెస్-సీఏపీఎఫ్) బ్యాండ్ మేళం బృందాలు … కవాతు నేపథ్యంలో 30 భారతీయ రాగాలను ఆలపించనున్నాయి. శ్రోతల్లో రాష్ట్రపతి శ్రీమతి ద్రౌపది ముర్ము, ఉపరాష్ట్రపతి శ్రీ జగ్‌దీప్ ధన్‌ఖడ్, ప్రధానమంత్రి శ్రీ నరేంద్ర మోదీ, రక్షణ మంత్రి శ్రీ రాజ్‌నాథ్ సింగ్, ఇతర కేంద్ర మంత్రులు, ఉన్నతాధికారులతోపాటు ప్రజలు కూడా ఈ కార్యక్రమంలో భాగం కానున్నారు.

‘కదం కదం బఢాయె జా’ (అడుగులో అడుగేస్తూ సాగి పో..) స్వరాన్ని అన్ని బ్యాండ్లూ కలసి వినిపించడంతో ఈ వేడుకను ప్రారంభిస్తారు. దాని తరువాత  ‘అమర్ భారతీ’, ‘ఇంద్ర ధనుష్’, ‘జై జనం భూమీ’, ‘నాటీ ఇన్ హిమాలయన్ వేలీ’, ‘గంగా జమునా’లతోపాటు ‘వీర్ సియాచిన్’ వంటి మనోహర బాణీలను వినిపించనున్నారు. సీఏపీఎఫ్ బ్యాండు ‘విజయ్ భారత్’, ‘రాజస్థాన్ ట్రూప్స్’, ‘ఏ వతన్ తేరే లియే’, ఇంకా ‘భారత్ కే జవాన్’ పాటలను ఆలపిస్తారు.

వైమానిక దళం బ్యాండేమో ‘గేలెక్సీ రైడర్’, ‘స్ట్రయిడ్’, ‘మిలీనియమ్ ఫ్లైట్ ఫాంటసీ’ వంటి స్వరాలను వినిపిస్తుంది. ఇక నౌకాదళ బ్యాండు తన వంతుగా ‘రాష్ట్రీయ ప్రథమ్’, ‘నిషక్ నిష్పద్’, ‘ఆత్మనిర్భర్ భారత్’, ‘స్వతంత్రతా కా ప్రకాశ్ ఫైలావో’, ‘రిదమ్ ఆఫ్ ద రీఫ్’లతోపాటు ‘జయ్ భారతీ’లను అందించనున్నది. దీని తరువాత వైమానిక దళం బ్యాండు ‘వీర్ సపూత్’, ‘తాకత్ వతన్’, ‘మేరా యువ భారత్’, ‘ధ్రువ్’లతోపాటు ‘ఫౌలాద్ కా జిగర్’లతో అలరించనున్నది.

అనంతరం, సామూహిక బ్యాండు ‘ప్రియం భారతమ్’, ‘ఏ మేరే వతన్ కె లోగోఁ’లను, ఇంకా ‘డ్రమర్స్ కాల్’ ధ్వనులను మోగించనుంది. కార్యక్రమంలో ఆఖరున బగ్లర్లు నిత్యనూతన జనప్రియ గీతం ‘సారే జహాఁ సె అచ్ఛా’ను వినిపిస్తారు.
 

కార్యక్రమానికి ముఖ్య నిర్వాహకునిగా కమాండర్ మనోజ్ సెబాస్టియన్ ఉంటారు.  వైమానిక దళ బ్యాండు సంచాలకుడు సుబేదార్ మేజర్ (గౌరవనీయ కెప్టెన్) బిశ్వ్ బహాదుర్ వ్యవహరిస్తారు. అలాగే భారతీయ సైన్యం (ఐఏ) బ్యాండు కండక్టర్‌గా ఎం. ఆంటోనీ ఎంసీపీఓ ఎంయూఎస్ II, భారత వైమానిక దళం (ఐఏఎఫ్) బ్యాండు కండక్టర్‌గా వారంట్ ఆఫీసర్ అశోక్ కుమార్ వ్యవహరిస్తారు. సెంట్రల్ ఆర్మ్‌డ్ పోలీస్ ఫోర్సెస్ (సీఏపీఎఫ్) బ్యాండు నిర్వాహకునిగా హెడ్ కానిస్టేబుల్ జీడీ మహాజన్ కైలాష్ మాధవ్ రావ్ ఉంటారు.
పైప్స్ అండ్ డ్రమ్స్ బ్యాండ్ సభ్యులు సుబేదార్ మేజర్ అభిలాష్ సింగ్ సూచనలకు కళాకారులు అనుసరిస్తారు. బగ్లర్లు నాయబ్ సుబేదార్ భూపాల్ సింగ్ నాయకత్వంలో తమ ప్రతిభను చాటనున్నారు.

***