مرکزی وزیر داخلہ اور امداد باہمی کے وزیرجناب امت شاہ نے آج گجرات کے احمدآباد میں احمد آباد میونسپل کارپوریشن (اے(اے ایم سی)کے651؍کروڑ روپے کی لاگت کے  مختلف ترقیاتی منصوبوں کا افتتاح کیا اورسنگ بنیا د رکھا۔ اس تقریب  میں گجرات کے وزیر اعلیٰ جناب بھوپندر پٹیل سمیت متعدد معزز شخصیات نے شرکت کی۔

اپنے خطاب کے دوران جناب امت شاہ نے زور دے کر کہا کہ رانیپ کے باشندوں کو درپیش ایک اہم مسئلہ اب حل ہو گیا ہے۔ انہوں نے ناران پورہ، وڈج، رانیپ، چاندلوڈیا، اور گھاٹلوڈیا کے رہائشیوں کو فائدہ پہنچانے کے لیے سڑک کے دونوں طرف تفریحی پارکس اور بازاروں کی ترقی کا اعلان کیا۔ انہوں نے رانیپ میں ایک بڑی سڑک کی تعمیر میں اے ایم سی کی جانب سے کی گئی اہم سرمایہ کاری پر روشنی ڈالی، جس سے علاقے کے منظر نامے میں تبدیلی کی امید ہے۔

جناب شاہ نے یقین دہانی کرائی کہ علاقے کی مجموعی ترقی 2029 تک مکمل ہو جائے گی۔ انہوں نے چین پور اور ڈی کیبن میں طویل عرصے سے زیرالتوا ترقیاتی منصوبوں کے آغاز کا بھی اعلان کیا، جس سے رانیپ، نوا رانیپ، چین پور اور ڈی کیبن کے درمیان سفر کے فاصلے میں نمایاں طور پر کمی ہو جائے گی۔ انہوں نے رانیپ کے 350 سوسائٹیوں میں بارش کے پانی کو ذخیرہ کرنے کے لیے باوڑی بنانے کی پہل کا آغاز کیا، اور اس بات کی یقین دہانی کرائی کہ اس کی فنڈنگ مرکزی اور صوبائی حکومتوں اور احمد آباد میونسپل کارپوریشن (اے ایم سی )کی طرف سے کی جائے گی، اس منصوبے کے تحت کوئی سوسائٹی کسی قسم کی لاگت برداشت نہیں کرے گی۔ انہوں نے رہائشیوں کو وزیراعظم جناب  نریندر مودی کی جانب سے شروع کی گئی پہل "پردھان منتری سولر روف ٹاپ یوجنا(پی ایم سوریہ گھر) کواپنانے کی ترغیب دی، جو بجلی کی بچت اور اخراجات کو کم کرنے کے لیے شمسی توانائی کے استعمال کو فروغ دیتی ہے۔  جناب  شاہ نے گاندھی نگر کے رہائشیوں سے کہا کہ وہ ماحولیات کی تبدیلی اور مستقبل کی آبی ضروریات کو مدنظر رکھتے ہوئے باوڑیوں کی تعمیر اور سولر روف ٹاپس دونوں کو اپنائیں۔ مرکزی وزیر داخلہ نے کہا کہ وزیراعظم جناب نریندر مودی ہمیشہ 25 سال آگے  کے وژن کے ساتھ منصوبے بناتے ہیں۔ انہوں نے کہا کہ یہ اسکیمیں زمین کے درجہ حرارت، ماحولیاتی تبدیلی اور آنے والے وقت میں پانی کی ضروریات کو مدنظر رکھتے ہوئے تیار کی گئی ہیں۔

 اس کے علاوہ  جناب امت شاہ نے بچیوں کو دودھ فراہم کرنے کے لیے ایک اسکیم شروع کرنے کا اعلان کیا اور آنگن واڑی میں بچوں کے لیے غذائیت سے بھرپور کھانا یقینی بنانے کے لیے حکومتی کوششوں پر روشنی ڈالی۔ انہوں نے گاندھی نگر لوک سبھا حلقہ میں اسی طرح کی کوششوں کی کامیابی کا حوالہ دیتے ہوئے لوگوں کو آنگن واڑی کو اپنانے اور اس اقدام کی حمایت کرنے کی ترغیب دی، جہاں اب 30؍فیصد آنگن واڑی کو برادری کی حمایت حاصل ہے۔

وزیر اعظم جناب نریندر مودی اور گجرات کے وزیر اعلیٰ بھوپیندر پٹیل کے تعاون کے لیے ان کا شکریہ ادا کرتے ہوئے جناب شاہ نے خطے میں جاری ترقیات کی ستائش کی۔ انہوں نے لوگوں سے پریاگ راج میں مہا کمبھ کا دورہ کرنے کی بھی اپیل کرتے ہوئے اسے زندگی میں ایک بار ہونے والا تجربہ اور دنیا کا سب سے بڑا میلہ قرار دیا۔

*****

(ش ح۔   م ع ن۔م ش)

UR-5571