ಕೇಂದ್ರ ರೈಲ್ವೇ ಮತ್ತು ಜಲಶಕ್ತಿ ರಾಜ್ಯ ಸಚಿವರಾದ ಶ್ರೀ ವಿ. ಸೋಮಣ್ಣ ಅವರು ತಮ್ಮ ಎರಡು ದಿನಗಳ ಪ್ರಯಾಗರಾಜ್‌ ಭೇಟಿ ಸಂದರ್ಭದಲ್ಲಿ, ಮಹಾಕುಂಭ 2025ರ ಸಂದರ್ಭದಲ್ಲಿ ಸಂಗಮ ಪ್ರದೇಶದಲ್ಲಿರುವ ಮೇಳ ಶಿಬಿರಗಳನ್ನು ಪರಿಶೀಲಿಸಿದರು. ಪ್ರಯಾಗರಾಜ್‌ ವಿಭಾಗೀಯ ರೈಲ್ವೆ ವ್ಯವಸ್ಥಾಪಕ ಶ್ರೀ ಹಿಮಾಂಶು ಬಡೋನಿ ಹಾಗೂ ಇತರೆ ಅಧಿಕಾರಿಗಳು ಪರಿಶೀಲನೆಯ ಸಮಯದಲ್ಲಿ ಹಾಜರಿದ್ದರು.

ಮಹಾಕುಂಭ 2025ಕ್ಕೆ ಭೇಟಿ ನೀಡುವ ಯಾತ್ರಾರ್ಥಿಗಳಿಗೆ ಅನುಕೂಲವಾಗುವಂತೆ ಸಂಗಮ ಪ್ರದೇಶದಲ್ಲಿ ಸ್ಥಾಪಿಸಲಾದ ಮೇಳ ಶಿಬಿರವನ್ನು ಕೇಂದ್ರ ಸಚಿವರು ಪರಿಶೀಲಿಸಿದರು. ತಪಾಸಣೆಯ ಸಂದರ್ಭದಲ್ಲಿ ಸಚಿವರು ಪ್ರಯಾಣಿಕರೊಂದಿಗೆ ಸಂವಾದ ನಡೆಸಿ ಅವರ ಯೋಗಕ್ಷೇಮವನ್ನು ವಿಚಾರಿಸಿದರು. ಟಿಕೆಟ್ ಕೌಂಟರ್‌ ಗಳು ಮತ್ತು ವಿಚಾರಣಾ ಕೇಂದ್ರಗಳಲ್ಲಿ ಕಾರ್ಯನಿರ್ವಹಿಸುವ ಸಿಬ್ಬಂದಿಯಿಂದ ಲಭ್ಯವಿರುವ ಸೌಲಭ್ಯಗಳ ಬಗ್ಗೆ ಅವರು ಪ್ರತಿಕ್ರಿಯೆ ಪಡೆದರು. ಮಹಾಕುಂಭದ ಸಂದರ್ಭದಲ್ಲಿ ಸೇವೆ ಮತ್ತು ನೆರವು ನೀಡುವಲ್ಲಿ ಅತ್ಯುತ್ತಮವಾಗಿ ಕಾರ್ಯನಿರ್ವಹಿಸುತ್ತಿರುವ ಸಿಬ್ಬಂದಿಯನ್ನು ಸಚಿವರು ಶ್ಲಾಘಿಸಿದರು. ಭೇಟಿಯ ವೇಳೆ ಮೇಳ ಶಿಬಿರದಲ್ಲಿ ಟಿಕೆಟ್‌ ಗಾಗಿ ಸರತಿ ಸಾಲಿನಲ್ಲಿ ನಿಂತಿದ್ದ ಪ್ರಯಾಣಿಕರೊಂದಿಗೆ ಮಾತನಾಡಿ, ರೈಲ್ವೆ ಸೇವೆಗಳು ಮತ್ತು ವ್ಯವಸ್ಥೆಗಳ ಕುರಿತು ಪ್ರತಿಕ್ರಿಯೆ ಪಡೆದರು. ರೈಲ್ವೇ ವ್ಯವಸ್ಥೆಯ ಬಗ್ಗೆ ಪ್ರಯಾಣಿಕರು ಮೆಚ್ಚುಗೆ ವ್ಯಕ್ತಪಡಿಸಿದರು.

ಮೇಳ ಶಿಬಿರದಲ್ಲಿ ಮಾಧ್ಯಮದವರೊಂದಿಗೆ ಸಂವಾದ ನಡೆಸಿದ ಕೇಂದ್ರ ಸಚಿವರು, ಕಳೆದ ಮೂರು ವರ್ಷಗಳಿಂದ ಯಾತ್ರಾರ್ಥಿಗಳ ಅನುಕೂಲ ಮತ್ತು ಸೇವೆಗಾಗಿ ರೈಲ್ವೆ ಸಿದ್ಧತೆ ನಡೆಸಿದೆ. ಮಹಾ ಕುಂಭ 2025ರ ಸಮಯದಲ್ಲಿ, 3,100 ವಿಶೇಷ ರೈಲುಗಳು ಮತ್ತು 10,000 ಸಾಮಾನ್ಯ ರೈಲುಗಳು ಸೇರಿದಂತೆ 13,000 ಕ್ಕೂ ಹೆಚ್ಚು ರೈಲುಗಳನ್ನು ರೈಲ್ವೆಯು ನಿರ್ವಹಿಸುತ್ತಿದೆ. ಮಹಾಕುಂಭವು ದೇಶ ಮತ್ತು ರೈಲ್ವೆ ಎರಡಕ್ಕೂ ಐತಿಹಾಸಿಕ ಘಟನೆಯಾಗಿದೆ ಎಂದು ಅವರು ಒತ್ತಿ ಹೇಳಿದರು. ರೈಲ್ವೆ ಅಧಿಕಾರಿಗಳು ಮತ್ತು ಸಿಬ್ಬಂದಿ ಸಂಪೂರ್ಣ ಸಾಮರ್ಥ್ಯ ಮತ್ತು ಸಮರ್ಪಣಾ ಮನೋಭಾವದಿಂದ ಹಗಲಿರುಳು ಕೆಲಸ ಮಾಡುತ್ತಿದ್ದಾರೆ. ಪ್ರಧಾನಮಂತ್ರಿ ಶ್ರೀ ನರೇಂದ್ರ ಮೋದಿಯವರ ಸಮರ್ಥ ನಾಯಕತ್ವದಲ್ಲಿ ಮಹಾಕುಂಭ 2025 ರ ಯಶಸ್ವಿ ಆಯೋಜನೆಯು ಸಾಧ್ಯವಾಯಿತು ಎಂದು ಅವರು ಹೇಳಿದರು. ಈ ನಿಟ್ಟಿನಲ್ಲಿ ಉತ್ತರ ಪ್ರದೇಶ ಸರ್ಕಾರದ ಪ್ರಯತ್ನವನ್ನೂ ಅವರು ಶ್ಲಾಘಿಸಿದರು.

ಶ್ರೀ ಸೋಮಣ್ಣ ಅವರು ನಿನ್ನೆ ಪ್ರಯಾಗರಾಜ್ ಜಂಕ್ಷನ್ ನಿಲ್ದಾಣದ ಪರಿಶೀಲನೆ ನಡೆಸಿದರು. ಭೇಟಿಯ ಸಂದರ್ಭದಲ್ಲಿ ಅವರು ವೈದ್ಯಕೀಯ ವೀಕ್ಷಣಾ ಕೊಠಡಿ, ವೈದ್ಯಕೀಯ ಬೂತ್‌, ಪ್ರಯಾಣಿಕರ ಶೆಲ್ಟರ್‌ ಗಳು ಮತ್ತು ಮೇಳದ ಗೋಪುರವನ್ನು ಪರಿಶೀಲಿಸಿದರು. ಮೌನಿ ಅಮಾವಾಸ್ಯೆಯಂದು ನಿಗದಿಪಡಿಸಲಾದ ಮಹಾಕುಂಭದ ಅತಿದೊಡ್ಡ ಪವಿತ್ರ ಸ್ನಾನದ ಉತ್ಸವದ ಸಿದ್ಧತೆಗಳನ್ನು ಅವರು ಪರಿಶೀಲಿಸಿದರು. ಪ್ರಯಾಗರಾಜ್ ವಿಭಾಗವು ಈ ದಿನದಂದು 150 ಮೇಳ ವಿಶೇಷ ರೈಲುಗಳನ್ನು ಓಡಿಸಲು ಯೋಜಿಸಿದೆ, ಇದು ಭಾರತೀಯ ರೈಲ್ವೆಗೆ ಹೊಸ ದಾಖಲೆಯಾಗಿದೆ.

ಮಹಾಕುಂಭ-2025 ಜನವರಿ 13 ರಂದು ಪುಷ್ಯ ಹುಣ್ಣಿಮೆಯಂದು ಪವಿತ್ರ ಸ್ನಾನದೊಂದಿಗೆ ಪ್ರಯಾಗರಾಜ್‌ ನಲ್ಲಿ ಪ್ರಾರಂಭವಾಯಿತು. ಮಕರ ಸಂಕ್ರಾಂತಿಯಂದು, ಪವಿತ್ರ ಸಂಗಮದಲ್ಲಿ ಮಹಾ ಕುಂಭದ ಮೊದಲ ಅಮೃತ ಸ್ನಾನವು (ಪವಿತ್ರ ಸ್ನಾನ) 3.5 ಕೋಟಿ ಯಾತ್ರಾರ್ಥಿಗಳಿಂದ ನಿರೀಕ್ಷೆಗೂ ಮೀರಿದ ಭಾಗವಹಿಸುವಿಕೆಗೆ ಸಾಕ್ಷಿಯಾಯಿತು. ಇಲ್ಲಿಯವರೆಗೆ 9 ಕೋಟಿಗೂ ಹೆಚ್ಚು ಭಕ್ತರು ಮಹಾಕುಂಭದ ಪವಿತ್ರ ಸ್ನಾನದಲ್ಲಿ ಪಾಲ್ಗೊಂಡಿದ್ದಾರೆ.

ಭವ್ಯ ಮತ್ತು ದೈವಿಕವಾದ ಮಹಾಕುಂಭ-2025 ಯಾತ್ರಿಕರ ಭಾಗವಹಿಸುವಿಕೆಯಲ್ಲಿ ಎಲ್ಲಾ ದಾಖಲೆಗಳನ್ನು ಮುರಿಯುತ್ತಿದೆ. ಮಕರ ಸಂಕ್ರಾಂತಿಯ ಮೊದಲ ಅಮೃತ ಸ್ನಾನದಂದು, 3.5 ಕೋಟಿಗೂ ಹೆಚ್ಚು ಭಕ್ತರು ಸಂಗಮದಲ್ಲಿ ಸ್ನಾನ ಮಾಡಿದರು, ಇದು ಪ್ರಯಾಗರಾಜ್ ವಿಭಾಗದಿಂದ 101 ಮೇಳ ವಿಶೇಷ ರೈಲುಗಳ ಕಾರ್ಯಾಚರಣೆಯಿಂದ ಬೆಂಬಲಿತವಾಯಿತು, ಇದೊಂದು ದಾಖಲೆಯಾಗಿದೆ. ಇದೇ ಮಾದರಿಯಲ್ಲಿ ಮೌನಿ ಅಮವಾಸ್ಯೆಯ ಅತಿ ದೊಡ್ಡ ಅಮೃತ ಸ್ನಾನಕ್ಕೆ ರೈಲ್ವೇ ಇಲಾಖೆ ಸಮಗ್ರ ಸಿದ್ಧತೆ ನಡೆಸುತ್ತಿದೆ. ಮೇಳ ಪ್ರಾಧಿಕಾರದ ಅಂದಾಜಿನ ಪ್ರಕಾರ ಅಂದು 10 ಕೋಟಿ ಯಾತ್ರಿಕರು ಸಂಗಮದಲ್ಲಿ ಪವಿತ್ರ ಸ್ನಾನ ಮಾಡುತ್ತಾರೆ, ಅವರಲ್ಲಿ ಶೇ.10-20 ರಷ್ಟು ಜನರು ರೈಲಿನಲ್ಲಿ ಬರುವ ನಿರೀಕ್ಷೆಯಿದೆ. ಸುಗಮ ಬೋರ್ಡಿಂಗ್ ಮತ್ತು ಡಿಬೋರ್ಡಿಂಗ್ ಪ್ರಕ್ರಿಯೆಗಳನ್ನು ಖಚಿತಪಡಿಸಿಕೊಳ್ಳಲು ಕಲರ್-ಕೋಡೆಡ್ ಟಿಕೆಟ್‌‌ ಗಳು ಮತ್ತು ಹೆಚ್ಚುವರಿ ವಸತಿ ಪ್ರದೇಶಗಳನ್ನು ಒಳಗೊಂಡಂತೆ ಅವರ ಪ್ರಯಾಣವನ್ನು ಸುಲಭಗೊಳಿಸಲು ಭಾರತೀಯ ರೈಲ್ವೇಯು ಸಮಗ್ರ ವ್ಯವಸ್ಥೆಗಳನ್ನು ಮಾಡಿದೆ.

ಮೌನಿ ಅಮಾವಾಸ್ಯೆ ಹಬ್ಬದ ಸಂದರ್ಭದಲ್ಲಿ, ಪವಿತ್ರ ಸ್ನಾನಕ್ಕೆ ಅನುಕೂಲವಾಗುವಂತೆ ಭಾರತೀಯ ರೈಲ್ವೇ ವ್ಯಾಪಕ ಸಿದ್ಧತೆಗಳನ್ನು ಮಾಡಿದೆ. ಈ ದಿನ, 150 ಮೇಳ ವಿಶೇಷ ರೈಲುಗಳನ್ನು ನಿರ್ವಹಿಸಲಾಗುವುದು, ಹೆಚ್ಚಿನ ಸಂಖ್ಯೆಯ ಯಾತ್ರಾರ್ಥಿಗಳಿಗೆ ಸುಗಮ ಪ್ರಯಾಣವನ್ನು ಖಾತ್ರಿಪಡಿಸುತ್ತದೆ. ಈ ಹೆಚ್ಚಿನ ರೈಲುಗಳು ಪ್ರಯಾಗರಾಜ್ ಜಂಕ್ಷನ್‌ ನಿಂದ ಆರಂಭವಾಗುತ್ತವೆ, ಅಲ್ಲದೇ ವಿಭಾಗದ ಇತರ ನಿಲ್ದಾಣಗಳು ವಿವಿಧ ದಿಕ್ಕುಗಳಲ್ಲಿ ವಿಶೇಷ ರೈಲುಗಳನ್ನು ನಿರ್ವಹಿಸುತ್ತವೆ. ನಿಯಮಿತ ರೈಲು ಸೇವೆಗಳು ಅವುಗಳ ವೇಳಾಪಟ್ಟಿಯ ಪ್ರಕಾರ ನಡೆಯುತ್ತವೆ. ಒಂದೇ ದಿನದಲ್ಲಿ ಒಂದೇ ನಿಲ್ದಾಣದಿಂದ 150ಕ್ಕೂ ಹೆಚ್ಚು ವಿಶೇಷ ರೈಲುಗಳನ್ನು ಓಡಿಸುವುದು ದಾಖಲೆಯಾಗಲಿದೆ. ಕುಂಭ 2019 ರ ಸಮಯದಲ್ಲಿ, ಮೌನಿ ಅಮಾವಾಸ್ಯೆಯಂದು ಸುಮಾರು 85 ಮೇಳ ವಿಶೇಷ ರೈಲುಗಳನ್ನು ಓಡಿಸಲಾಯಿತು, ಇದು ಹಿಂದಿನ ಸಂದರ್ಭಗಳಲ್ಲಿ ಕಾರ್ಯನಿರ್ವಹಿಸಿದ ವಿಶೇಷ ರೈಲುಗಳ ಸಂಖ್ಯೆಗಿಂತ 65 ಹೆಚ್ಚು.

*****