କେନ୍ଦ୍ର ଖଣି ମନ୍ତ୍ରୀ ଶ୍ରୀ ଜି. କିଶନ ରେଡ୍ଡୀ କୋଣାର୍କସ୍ଥିତ ପ୍ରସିଦ୍ଧ ସୂର୍ଯ୍ୟ ମନ୍ଦିରଠାରେ ଆୟୋଜିତ ଜିଲ୍ଲା ଖଣିଜ ପ୍ରତିଷ୍ଠାନ (ଡିଏମଏଫ) ପ୍ରଦର୍ଶନୀ ପରିଦର୍ଶନ କରିଛନ୍ତି । ଓଡ଼ିଶା ସରକାରଙ୍କ ସହଯୋଗରେ ଖଣି ମନ୍ତ୍ରଣାଳୟ ଦ୍ୱାରା ଆୟୋଜିତ ଏହି ପ୍ରଦର୍ଶନୀ ଗତ ୧୮ ତାରିଖରୁ ଆଜି ପର୍ଯ୍ୟନ୍ତ ଅନୁଷ୍ଠିତ ହୋଇଯାଇଛି । କେନ୍ଦ୍ର ମନ୍ତ୍ରୀଙ୍କ ଗସ୍ତ ସମୟରେ, ମାନ୍ୟବର ମନ୍ତ୍ରୀ ବିଭିନ୍ନ ସ୍ୱୟଂ ସହାୟକ ଗୋଷ୍ଠୀ (ଏସଏଚଜି) ର ସଦସ୍ୟମାନଙ୍କ ସହ ଆଲୋଚନା କରିଥିଲେ ଏବଂ ପ୍ରଦର୍ଶନୀରେ ପ୍ରଦର୍ଶିତ ଅନେକ ଅଭିନବ ଉତ୍ପାଦ ଏବଂ ସମାଧାନର ନିରୀକ୍ଷଣ କରିଥିଲେ, ଯାହା ଖଣି ପ୍ରଭାବିତ ଜନସମୁଦାୟ ଉପରେ ଡିଏମଏଫ ପାଣ୍ଠିର ପରିବର୍ତ୍ତନଶୀଳ ପ୍ରଭାବକୁ ପ୍ରଦର୍ଶିତ କରିଥିଲା।

‘ଦୀର୍ଘସ୍ଥାୟୀ ବିକାଶ ଦ୍ୱାରା ଜନ ସମୁଦାୟର ସଶକ୍ତିକରଣ’ ବିଷୟବସ୍ତୁକୁ ନେଇ ଡିଏମ୍ଏଫ୍ ସମର୍ଥିତ ସ୍ୱୟଂ ସହାୟକ ଗୋଷ୍ଠୀ (ଏସଏଚଜି), ଜିଓଲୋଜିକାଲ୍ ସର୍ଭେ ଅଫ୍ ଇଣ୍ଡିଆ (ଜିଏସଆଇ), ହିନ୍ଦୁସ୍ତାନ କପର୍ ଲିମିଟେଡ୍ (ଏଚସିଏଲ), ନାଲକୋ, ଏଚଜେଡଏଲ/ବେଦାନ୍ତ ଏବଂ ଓଡ଼ିଶା ସରକାରଙ୍କ କାର୍ଯ୍ୟକୁ ପ୍ରଦର୍ଶିତ କରୁଥିବା ୧୮ଟି ଆକର୍ଷଣୀୟ ଷ୍ଟଲ୍ ପ୍ରଦର୍ଶନୀକୁ ଜୀବନ୍ତ କରିଥିଲା। ଏହି ଉତ୍ପାଦଗୁଡ଼ିକ ପରିବେଶ ଅନୁକୂଳ ଏବଂ ସ୍ଥାୟୀ ସମାଧାନ ଉପରେ ଧ୍ୟାନ କେନ୍ଦ୍ରିତ କରିଥିଲା, ଯେଉଁଥିରେ ଏସଏଚଜି ଦ୍ୱାରା ହସ୍ତନିର୍ମିତ ସାମଗ୍ରୀ, ହସ୍ତତନ୍ତ ପୋଷାକ, ଜୀବନ୍ତ ସୂତା ଏବଂ ଡିଏମଏଫ ଦ୍ୱାରା ପାଣ୍ଠି ଯୋଗାଣ ହେଉଥିବା ସ୍ଥାୟୀ ଭିତ୍ତିଭୂମି ପ୍ରକଳ୍ପର ମଡେଲ ସାମିଲ ଥିଲା। ଏହି ପ୍ରଦର୍ଶନୀଗୁଡ଼ିକ ଖଣି ପ୍ରଭାବିତ ଜନସମୁଦାୟଗୁଡ଼ିକର ସୃଜନଶୀଳତା ଏବଂ ଦୃଢ଼ତା ଉପରେ ଆଲୋକପାତ କରିଥିଲା। ପରିବେଶ ଅନୁକୂଳ ଏବଂ ସ୍ଥାନୀୟ ଭାବରେ ପ୍ରସ୍ତୁତ ଉତ୍ପାଦଗୁଡ଼ିକ ଏଥିରେ ଦେଖିବାକୁ ମିଳିଥିଲା।

ଜାନୁଆରୀ ୨୧ ସୁଦ୍ଧା, ଏହି ପ୍ରଦର୍ଶନୀ ଏକ ଗୁରୁତ୍ୱପୂର୍ଣ୍ଣ ମାଇଲଖୁଣ୍ଟ ହାସଲ କରିଥିଲା, ଯେଉଁଥିରେ ସମସ୍ତ ଅଂଶଗ୍ରହଣକାରୀ ଏସଏଚଜି ଦ୍ୱାରା ସାମୂହିକ ଭାବରେ ୯ ଲକ୍ଷ ଟଙ୍କାରୁ ଅଧିକ ଆୟ କରାଯାଇଥିଲା। ଏହା ଆର୍ଥିକ ସଶକ୍ତିକରଣକୁ ପ୍ରୋତ୍ସାହିତ କରିବାରେ ଏହି ପଦକ୍ଷେପଗୁଡ଼ିକର ପ୍ରଭାବ ଉପରେ ଅଧିକ ଗୁରୁତ୍ୱ ଦେଇଥିଲା। ଏହି ପ୍ରଦର୍ଶନୀକୁ ଖଣି ମନ୍ତ୍ରଣାଳୟର ଯୁଗ୍ମ ସଚିବ ସୁଶ୍ରୀ ଫରିଦା ଏମ୍. ନାୟକ ଗତ ୧୮ରେ ଉଦଘାଟନ କରିଥିଲେ, ଯେଉଁଥିରେ ଖଣି ମନ୍ତ୍ରଣାଳୟ, ନାଲକୋ ଏବଂ ଓଏମସିର ବରିଷ୍ଠ ଅଧିକାରୀମାନେ ଉପସ୍ଥିତ ଥିଲେ। ଏହି କାର୍ଯ୍ୟକ୍ରମ ସ୍ଥାୟୀ ଅଭିବୃଦ୍ଧି ଏବଂ ଗୋଷ୍ଠୀ କଲ୍ୟାଣ ପାଇଁ ମନ୍ତ୍ରଣାଳୟର ପ୍ରତିବଦ୍ଧତାକୁ ରେଖାଙ୍କିତ କରିଛି।

ତୃତୀୟ ଜାତୀୟ ଖଣି ମନ୍ତ୍ରୀ ସମ୍ମିଳନୀର ଦ୍ୱିତୀୟ ଦିବସ

ତୃତୀୟ ଜାତୀୟ ଖଣି ମନ୍ତ୍ରୀଙ୍କ ସମ୍ମିଳନୀର ଦ୍ୱିତୀୟ ଦିନ କୋଣାର୍କ ଇକୋ ରିଟ୍ରିଟଠାରେ ଅନୁଷ୍ଠିତ ହୋଇଥିଲା, ଯେଉଁଥିରେ ସହଯୋଗ ଓ ନବସୃଜନକୁ ପ୍ରୋତ୍ସାହନ ସହିତ ଜ୍ଞାନ ବିନିମୟ ଲାଗି ଅତ୍ୟନ୍ତ ଫଳପ୍ରଦ ଅଧିବେଶନ ଅନୁଷ୍ଠିତ ହୋଇଥିଲା। ପ୍ରମୁଖ ବିଶେଷତ୍ୱ ମଧ୍ୟରେ ୧୧ଟି ରାଜ୍ୟ ଦ୍ୱାରା ବିସ୍ତୃତ ଉପସ୍ଥାପନା, ସେମାନଙ୍କ ନିଲାମ ପ୍ରକ୍ରିୟା, ଅଭିନବ ଅଭ୍ୟାସ ଏବଂ ସ୍ୱଚ୍ଛତା ଓ ଦକ୍ଷତା ସୁନିଶ୍ଚିତ କରିବା ସହିତ ସମ୍ବଳର ସର୍ବାଧିକ ଉପଯୋଗ ପାଇଁ ରଣନୀତି ପ୍ରଦର୍ଶିତ କରାଯାଇଥିଲା।

କେନ୍ଦ୍ର ମନ୍ତ୍ରୀ ଶ୍ରୀ ଜି. କିଶନ ରେଡ୍ଡୀ ତାଙ୍କ ଅଭିଭାଷଣରେ ବିଶେଷ କରି ଗ୍ରାମାଞ୍ଚଳ ଏବଂ ଅର୍ଦ୍ଧ ସହରାଞ୍ଚଳରେ ନିଯୁକ୍ତି ସୁଯୋଗ ସୃଷ୍ଟି କରିବାରେ ଖଣି କ୍ଷେତ୍ରର ଗୁରୁତ୍ୱପୂର୍ଣ୍ଣ ଭୂମିକା ଉପରେ ଗୁରୁତ୍ୱାରୋପ କରିଥିଲେ। ବେଆଇନ ଖନନ ପ୍ରତି ସରକାରଙ୍କ ଶୂନ୍ୟ-ସହନଶୀଳତା ଆଭିମୁଖ୍ୟକୁ ସେ ଦୋହରାଇଥିଲେ ଏବଂ ତଦାରଖ ଓ ପ୍ରବର୍ତ୍ତନ ପ୍ରଣାଳୀକୁ ସୁଦୃଢ଼ କରିବା ପାଇଁ ଅତ୍ୟାଧୁନିକ ପ୍ରଯୁକ୍ତିବିଦ୍ୟା ଗ୍ରହଣ କରିବାକୁ ଅଂଶୀଦାରମାନଙ୍କୁ ଅନୁରୋଧ କରିଥିଲେ। ଶ୍ରୀ ରେଡ୍ଡୀ ପରିବେଶ ପୁନରୁଦ୍ଧାର ଏବଂ ଦୀର୍ଘସ୍ଥାୟିତ୍ୱ ସୁନିଶ୍ଚିତ କରିବା ପାଇଁ ଦାୟିତ୍ୱପୂର୍ଣ୍ଣ ଖଣି ବନ୍ଦ ଅଭ୍ୟାସର ଆବଶ୍ୟକତା ଉପରେ ମଧ୍ୟ ଗୁରୁତ୍ୱାରୋପ କରିଥିଲେ। ଖଣି କାର୍ଯ୍ୟକଳାପର ପରିବେଶଗତ ପ୍ରଭାବକୁ ହ୍ରାସ କରିବା ପାଇଁ ବନୀକରଣ ପ୍ରୟାସ, ସୌର ଶକ୍ତି ଗ୍ରହଣ ଏବଂ ଦୀର୍ଘସ୍ଥାୟୀ ବର୍ଜ୍ୟ ପରିଚାଳନା ସମେତ ସବୁଜ ପଦକ୍ଷେପକୁ ଏକୀକୃତ କରିବା ସକାଶେ ସେ ସରକାରଙ୍କ ପ୍ରତିବଦ୍ଧତା ଉପରେ ଆଲୋକପାତ କରିଥିଲେ।

ଏହି ସମ୍ମିଳନୀରେ ପରିବେଶ, ଜଙ୍ଗଲ ଏବଂ ଜଳବାୟୁ ପରିବର୍ତ୍ତନ ମନ୍ତ୍ରଣାଳୟ (ଏମଓଇଏଫସିସି) ର ଗୁରୁତ୍ୱପୂର୍ଣ୍ଣ ଯୋଗଦାନ ମଧ୍ୟ ପ୍ରଦର୍ଶିତ ହୋଇଥିଲା, ଯାହା ଜଙ୍ଗଲ ସଂରକ୍ଷଣ ଏବଂ ପରିବେଶ ସୁରକ୍ଷା ବିଷୟରେ ମୂଲ୍ୟବାନ ଦୃଷ୍ଟିକୋଣ ପ୍ରଦାନ କରିଥିଲା। ପରିବେଶ ସଂରକ୍ଷଣ ସହିତ ଆର୍ଥିକ ଅଭିବୃଦ୍ଧିକୁ ସନ୍ତୁଳିତ କରୁଥିବା ନୀତିଗୁଡ଼ିକୁ କାର୍ଯ୍ୟକାରୀ କରିବାରେ ରାଜ୍ୟ ଏବଂ ଅଂଶୀଦାରମାନଙ୍କୁ ମାର୍ଗଦର୍ଶନ କରିବା ଏହି ଇନପୁଟ୍‌ଗୁଡ଼ିକର ଉଦ୍ଦେଶ୍ୟ ଥିଲା। ଏହାବ୍ୟତୀତ, ଖଣି ସୁରକ୍ଷା ମହାନିର୍ଦ୍ଦେଶାଳୟ (ଡିଜିଏମଏସ) ଖଣି କାର୍ଯ୍ୟରେ ଶ୍ରମିକଙ୍କ ସୁରକ୍ଷାକୁ ବୃଦ୍ଧି କରିବା ପାଇଁ ସୁରକ୍ଷା ମାନକ, ବୈଷୟିକ ପ୍ରଗତି ଏବଂ ତାଲିମ କାର୍ଯ୍ୟକ୍ରମ ଉପରେ ଗୁରୁତ୍ୱପୂର୍ଣ୍ଣ ତଥ୍ୟ ପ୍ରଦାନ କରାଯାଇଥିଲା।

ଏହି ମଞ୍ଚ ରାଜ୍ୟ ଓ ଅନ୍ୟ ଅଂଶୀଦାରମାନଙ୍କ ପାଇଁ ବିଚାର ବିନିମୟ କରିବା, ଆହ୍ୱାନର ମୁକାବିଲା କରିବା ଏବଂ ଭାରତର ଖଣି କ୍ଷେତ୍ରର ନିରନ୍ତର ବିକାଶ ପାଇଁ ସହଭାଗିତା ସୃଷ୍ଟି କରିବା ନିମନ୍ତେ ଏକ ଅନନ୍ୟ ସୁଯୋଗ ଭାବେ କାର୍ଯ୍ୟ କରିଛି। ନବସୃଜନକୁ ଆଗେଇ ନେବା, ଦକ୍ଷତାରେ ଉନ୍ନତି ଆଣିବା ଏବଂ ଖଣି କାର୍ଯ୍ୟକଳାପର ଲାଭ ଶେଷ ମାଇଲ ପର୍ଯ୍ୟନ୍ତ ପହଞ୍ଚାଇବା ଲାଗି ମନ୍ତ୍ରଣାଳୟ ନିଜର ଲକ୍ଷ୍ୟରେ ନିରନ୍ତର ଭାବେ କାମ କରୁଛି ।

*******

P.S/Swadhin