کوئلے اور کانوں کے مرکزی وزیر جناب جی کشن ریڈی نے 14 جنوری 2025 کو ریاض میں مستقبل معدنیات فورم 2025 کے وزارتی گول میز اجلاس میں شرکت کی، جس کی میزبانی سعودی عرب کر رہا ہے۔ گول میز اجلاس میں دیگر متعلقہ پہلوؤں کے علاوہ اہم معدنیات اور قدر سازی کے مواقع میں سپلائی چین کی تعمیر پر توجہ مرکوز کی گئی۔ اپنی مداخلت کے دوران، جناب ریڈی نے ملک کے قابل تجدید توانائی کے اہداف کو پورا کرنے کے لیے صاف ستھری توانائی کے نظام کی بڑھتی ہوئی صلاحیتوں کے لیے ضروری اہم معدنیات کی دستیابی کو یقینی بنانے کے لیے حکومت ہند کی طرف سے دی جانے والی  اہمیت پر روشنی ڈالی ۔ ہندوستان میں قدرتی وسائل کی قدر بڑھانے کے  بے پناہ امکانات  کے ساتھ، مرکزی وزیر نے عالمی سرمایہ کار برادری کو ملک کی وسیع کان کنی کی صنعت میں سرمایہ کاری کرنے کی دعوت دی ۔ انہوں نے کہا کہ پوری سپلائی چین میں ویلیو ایڈیشن لوگوں کے لیے زیادہ خوشحالی کی کلید ہے ۔

فورم کے موقع پر جناب ریڈی نے سعودی عرب کے صنعت اور معدنی وسائل کے وزیر جناب بندر بن ابراہیم الخریف سے ملاقات کی۔ جناب ریڈی نے وسیع پیمانے پر بات چیت کی اور دونوں ممالک کے درمیان تجارتی اور سرمایہ کاری کے تعلقات کو بڑھانے پر زور دیا۔ مرکزی وزیر نے برازیل، اٹلی اور مراکش کے وزراء سے بھی الگ الگ ملاقات کی جس کے دوران انہوں نے اقتصادی اور تکنیکی تعاون کی اہمیت پر زور دیا ، خاص طور پر معدنیات کے شعبے میں ۔ بعد میں، دن کے وقت، انہوں نے مقامی ہندوستانی تارکین  وطن کے ساتھ بات چیت کی ۔

آج مرکزی وزیر نے کنگ عبدالعزیز انٹرنیشنل کانفرنس سینٹر میں فیوچر منرلز فورم کی افتتاحی تقریب میں شرکت کی، جہاں شراکت دار ممالک اور عالمی کمپنیوں کی طرف سے نمائش کا بھی اہتمام کیا گیا ہے۔ جناب ریڈی نے انڈیا پویلین کا دورہ کیا، جسے کانوں کی وزارت نے کول انڈیا، جی ایس آئی، این ایم ڈی سی ، نالکو اور ایم ای سی ایل کے ساتھ مل کر تیار کیا  ہے ۔ مرکزی وزیر 14 جنوری 2025 سے ریاض ، سعودی عرب کے سرکاری دورے پر ہیں ۔

********

ش ح۔ا ک۔ رب

U-5238