പ്രധാനമന്ത്രി ശ്രീ നരേന്ദ്ര മോദി ജനുവരി 15 ന് മഹാരാഷ്ട്ര സന്ദർശിക്കും. രാവിലെ 10:30 ന് മുംബൈയിലെ നേവൽ ഡോക്ക്‌യാർഡിൽ കമ്മീഷൻ ചെയ്യുന്ന മൂന്ന് മുൻനിര നാവിക യുദ്ധക്കപ്പലുകളായ ഐഎൻഎസ് സൂറത്ത്, ഐഎൻഎസ് നീലഗിരി, ഐഎൻഎസ് വാഗ്ഷീർ എന്നിവ പ്രധാനമന്ത്രി രാഷ്ട്രത്തിന് സമർപ്പിക്കും. അതിനുശേഷം, ഉച്ചകഴിഞ്ഞ് 3:30 ന് അദ്ദേഹം നവി മുംബൈയിലെ ഖാർഘറിൽ ഇസ്‌കോൺ ക്ഷേത്രം ഉദ്ഘാടനം ചെയ്യും.

പ്രതിരോധ നിർമ്മാണത്തിലും സമുദ്ര സുരക്ഷയിലും ആഗോള നേതാവാകുക എന്ന ഇന്ത്യയുടെ ദർശനം സാക്ഷാത്കരിക്കുന്നതിൽ മൂന്ന് പ്രധാന നാവിക പോരാളികളുടെ വരവ് ഒരു സുപ്രധാന കുതിച്ചുചാട്ടത്തെ അടയാളപ്പെടുത്തുന്നു. P15B ഗൈഡഡ് മിസൈൽ ഡിസ്ട്രോയർ പ്രോജക്റ്റിലെ നാലാമത്തെയും അവസാനത്തെയും കപ്പലായ INS സൂറത്ത്, ലോകത്തിലെ ഏറ്റവും വലുതും ഏറ്റവും നൂതനവുമായ ഡിസ്ട്രോയറുകളിൽ ഒന്നാണ്.  75% തദ്ദേശീയ ഉള്ളടക്കമുള്ള ഈ കപ്പലിൽ അത്യാധുനിക ആയുധ-സെൻസർ പാക്കേജുകളും വിപുലമായ നെറ്റ്‌വർക്ക് കേന്ദ്രീകൃത കഴിവുകളും സജ്ജീകരിച്ചിരിക്കുന്നു. 
കൂടാതെ  P17A സ്റ്റെൽത്ത് ഫ്രിഗേറ്റ് പ്രോജക്റ്റിലെ ആദ്യ കപ്പലായ INS നീലഗിരി, ഇന്ത്യൻ നാവികസേനയുടെ യുദ്ധക്കപ്പൽ ഡിസൈൻ ബ്യൂറോ രൂപകൽപ്പന ചെയ്തിട്ടുള്ളതാണ്, കൂടാതെ തദ്ദേശീയ ഫ്രിഗേറ്റുകളുടെ അടുത്ത തലമുറയെ പ്രതിഫലിപ്പിക്കുന്ന വിധത്തിൽ മെച്ചപ്പെട്ട അതിജീവനം, കടൽ സംരക്ഷണം, സ്റ്റെൽത്ത് എന്നിവയ്‌ക്കായുള്ള നൂതന സവിശേഷതകൾ ഇതിൽ ഉൾപ്പെടുത്തിയിട്ടുണ്ട്. P75 സ്കോർപീൻ പദ്ധതിയുടെ ആറാമത്തെയും അവസാനത്തെയും അന്തർവാഹിനിയായ INS വാഗ്ഷീർ, അന്തർവാഹിനി നിർമ്മാണത്തിൽ ഇന്ത്യയുടെ വളർന്നുവരുന്ന വൈദഗ്ധ്യത്തെ പ്രതിനിധീകരിക്കുന്നു, ഫ്രാൻസിലെ നേവൽ ഗ്രൂപ്പുമായി സഹകരിച്ചാണ് ഇത് നിർമ്മിച്ചിരിക്കുന്നത്.

ഇന്ത്യയുടെ സാംസ്കാരിക പൈതൃകം ഉയർത്താനുള്ള പ്രതിബദ്ധതയ്ക്ക് അനുസൃതമായി, നവി മുംബൈയിലെ ഖാർഘറിൽ ഇസ്‌കോൺ പദ്ധതിയായ ശ്രീ ശ്രീ രാധ മദൻമോഹൻജി ക്ഷേത്രം പ്രധാനമന്ത്രി ഉദ്ഘാടനം ചെയ്യും. ഒൻപത് ഏക്കറിൽ വ്യാപിച്ചുകിടക്കുന്ന പദ്ധതിയിൽ നിരവധി പ്രതിഷ്ഠകളുള്ള ഒരു ക്ഷേത്രം, ഒരു വേദ വിദ്യാഭ്യാസ കേന്ദ്രം, നിർദ്ദിഷ്ട മ്യൂസിയങ്ങൾ, ഓഡിറ്റോറിയം, രോഗശാന്തി കേന്ദ്രം എന്നിവ ഉൾപ്പെടുന്നു. വേദോപദേശങ്ങളിലൂടെ സാർവത്രിക സാഹോദര്യം, സമാധാനം, ഐക്യം എന്നിവ പ്രോത്സാഹിപ്പിക്കുക എന്നതാണ് ഇതിന്റെ ലക്ഷ്യം.

***

SK