لوک سبھا اسپیکر جناب اوم برلا نے آج اس بات پر زور دیا کہ ہندوستانی الیکشن کمیشن کے پاس آزادانہ، منصفانہ، آزاد اور غیر جانبدارانہ انتخابات کرانے کا بہترین ریکارڈ ہے۔ انھوں نے مزید کہا کہ ہندوستان ایک متحرک جمہوریت ہے جس میں تقریباً ایک ارب ووٹر ہیں۔ ہندوستان میں انتخابی عمل میں خواتین کی شرکت کی حوصلہ افزائی کو اجاگر کرتے ہوئے انھوں نے ذکر کیا کہ اس طرح کی شرکت ہمارے انتخابی عمل میں شمولیت کو ظاہر کرتی ہے۔

جناب برلا نے یہ باتیں آج لندن میں برطانیہ کی پارلیمنٹ کے ہاؤس آف کامنز کے اسپیکر، عالی جناب سر لنڈسے ہویل کے ساتھ اپنی ملاقات کے دوران کہیں۔ اس بات کا ذکر کرتے ہوئے کہ ہندوستان آئین کو اپنانے کے 75 سال مکمل ہونے کا جشن منا رہا ہے، جناب برلا نے کہا کہ ہندوستان کے آئین نے ملک میں انقلابی سماجی و اقتصادی تبدیلیاں لائی ہیں۔ انھوں نے امید ظاہر کی کہ ہندوستان اپنی آزادی کے سوویں سال یعنی 2047 تک ایک ترقی یافتہ ملک ہوگا۔

اس بات کا ذکر کرتے ہوئے کہ ہندوستان میں جمہوریت کی جڑیں نچلی سطح سے لے کر پارلیمنٹ تک بہت گہری ہیں، جناب برلا نے کہا کہ ملک پالیسی مداخلتوں کے ذریعے معیشت، سیاست اور سماج میں صنفی فرق کو ختم کر رہا ہے۔ ایک پارلیمانی جمہوریت کے طور پر ہندوستان کی کامیابیوں پر روشنی ڈالتے ہوئے، جناب برلا نے زور دیا کہ تنوع کے باوجود، ہندوستان پارلیمانی مکالمے اور بات چیت کے ذریعے سماج کے مختلف طبقات کی امیدوں اور خواہشات کو پورا کرنے میں کامیاب رہا ہے۔

ہندوستان کی پارلیمنٹ میں ڈیجیٹل ٹیکنالوجی کے استعمال کا ذکر کرتے ہوئے، لوک سبھا اسپیکر نے کہا کہ ڈیجیٹل ٹیکنالوجی کے استعمال نے قانون سازوں کو با اختیار بنایا ہے اور انھیں اپنی پارلیمانی ذمے داریوں کو زیادہ مؤثر طریقے سے نبھانے میں مدد کی ہے۔ اسپیکر نے کہا کہ ریاستی قانون ساز اسمبلیاں بھی اپنے کام کو بہتر بنانے کے لیے نئی ٹیکنالوجیز کو اپنا رہی ہیں۔ ہندوستان اور برطانیہ کے درمیان پارلیمانی تعاون کو مضبوط بنانے پر زور دیتے ہوئے جناب برلا نے دونوں ممالک کے درمیان پارلیمانی علم، بہترین طرز عمل اور تجربات کے زیادہ سے زیادہ تبادلے پر زور دیا۔ جناب برلا نے کہا کہ دونوں ممالک کے نوجوان اور خواتین ارکان پارلیمنٹ کو زیادہ سے زیادہ بات چیت کرنی چاہیے۔

جناب برلا نے بتایا کہ لوک سبھا سکریٹریٹ میں پارلیمانی ریسرچ اینڈ ٹریننگ انسٹی ٹیوٹ فار ڈیموکریسیز (پی آر آئی ڈی ای) پارلیمانی تربیت فراہم کرنے والے عالمی معیار کے اداروں میں سے ایک کے طور پر ابھرا ہے۔ انھوں نے قانون سازوں کی استعداد کار میں اضافے کے ذریعے پارلیمانی تعاون کو مضبوط بنانے پر تبادلہ خیال کیا۔

اس چیز کا مشاہدہ کرتے ہوئے کہ لوگوں سے عوام کے تعلقات دونوں ممالک کے درمیان گرمجوشی سے دوطرفہ تعلقات کی بنیاد ہیں، جناب برلا نے اپنے خیال کا اظہار کیا کہ اس دوستی نے تعلقات کو مزید مضبوط اور کثیر جہتی بنا دیا ہے۔ انہوں نے کہا کہ ہندوستان اور برطانیہ کے درمیان سائنس اور ٹیکنالوجی، تحقیق اور اختراعات اور خلا کے شعبوں میں دو طرفہ تعلقات مضبوط ہوئے ہیں اور اس سے دونوں ممالک کے لوگوں کو فائدہ ہوا ہے۔ ہندوستان اور برطانیہ کے درمیان تاریخی، ثقافتی اور اقتصادی تعلقات کا حوالہ دیتے ہوئے، جناب برلا نے اطمینان کا اظہار کرتے ہوئے کہا کہ دونوں ممالک خوراک اور صحت کی سلامتی کے انسانی مسائل کو حل کرنے اور موسمیاتی تبدیلی جیسے بڑھتے ہوئے چیلنجوں کا جواب تلاش کرنے میں مل کر کام کر رہے ہیں۔

اس موقع پر لوک سبھا اسپیکر نے عالی جناب سر لنڈسے ہویل کو نئے سال کی نیک خواہشات پیش کیں اور انھیں دوسری بار ہاؤس آف کامنز کے اسپیکر منتخب ہونے پر مبارکباد دی۔

*********

ش ح۔ ف ش ع

U: 5008