భారతీయ రైల్వేలు తన క్రీడా విభాగమైన రైల్వే స్పోర్ట్స్ ప్రమోషన్ బోర్డ్ (ఆర్ఎస్‌పీబీ) ద్వారా 1928 నుంచీ దేశవ్యాప్తంగా క్రీడలను ప్రోత్సహిస్తోంది. హాకీ, టెన్నిస్, ఇతర వ్యాయామ క్రీడలకూ మద్దతు అందిస్తూ ఆర్ఎస్‌పీబీ తన కార్యకలాపాలను చిన్నగా ప్రారంభించింది. క్రీడలపట్ల దేశం నలుమూలలా ఆదరణ లభించేటట్టు చేయడంలో ముఖ్య పాత్రను రైల్వే పోషిస్తోంది. దీని పరిధిలో 29 క్రీడా విభాగాలున్నాయి. వాటిలో 18 ఆటలు వ్యక్తిగత ఆటలు, 11 ఆటలేమో జట్టుగా ఆడే ఆటలు. ఆర్ఎస్‌పీబీకి 28 జాతీయ క్రీడా సమాఖ్యలతోనూ, యూఎస్ఐసీ (వరల్డ్ రైల్వేస్ స్పోర్ట్స్ అసోసియేషన్)తోనూ అనుబంధం ఉంది.

ఉద్యోగాలివ్వడం ద్వారా అనేక మంది క్రీడాకారులకు భారతీయ రైల్వేలు మద్దతు పలుకుతున్నది. ఇంత వరకు చూస్తే, 29 క్రీడాంశాలకు చెందినవారు క్రీడాకారులు, క్రీడాకారిణులు కలుపుకొని మొత్తం 9000 మందికి పైగా భారతీయ రైల్వేల ఛత్రఛాయలో ఉన్నారు. వారిలో సుమారు 3000 మంది క్రియాశీల క్రీడాకారులు. అంతర్జాతీయ స్థాయిలో ప్రతిష్ఠాత్మక ఈవెంట్లలో ఐఆర్ క్రీడాకారులు ప్రశంసనీయమైన ఆటతీరు కనబరిచారు.

యువజన వ్యవహారాలు, క్రీడల మంత్రిత్వ శాఖ 2024వ సంవత్సరానికి జాతీయ క్రీడాపురస్కారాలను ప్రకటించింది. ప్రతిష్ఠాత్మక అర్జున పురస్కారాన్ని 32 మంది క్రీడాకారులకు ప్రకటించగా అందులో అయిదుగురు క్రీడాకారులు ఇండియన్ రైల్వేలకు చెందిన వారే ఉండడం గర్వకారణం. ఆయా ఆటగాళ్లు, వారు పాల్గొన్న ఈవెంట్ల వివరాలు ఈ కింది విధంగా ఉన్నాయి:

1.    జ్యోతి యర్రాజి, దమరై (అథ్లెటిక్స్- విభాగం: 100 మీ. హర్డిల్స్)

2.    అన్ను రాణి, పీఎల్‌డబ్ల్యూ (అథ్లెటిక్స్- విభాగం: జావెలిన్ త్రో)

3.    సలీమా టెటె, ఎస్ఈఆర్ (హాకీ)

4.    స్వప్నిల్ సురేశ్ కుసాలే, సీఆర్ (షూటింగ్-50 మీ. 3పీ)

5.    అమన్, ఎన్ఆర్ (కుస్తీ-57 కి.గ్రా. ఫ్రీస్టయిల్)

ఈ అయిదు అర్జున అవార్డులను కలుపుకొంటే మొత్తం 183 అర్జున, 28 పద్మ శ్రీ, 12 ధ్యాన్ చంద్, 13 ద్రోణాచార్య పురస్కార విజేతలతోపాటు 9 మేజర్ ధ్యాన్ చంద్ ఖేల్ రత్న పురస్కార గ్రహీతలు రైల్వేల్లో ఉన్నారు. ఇంత పెద్ద సంఖ్యలో పురస్కార విజేతలు మన దేశంలో మరే సంస్థలోనూ లేరు. తాజా పురస్కార విజేతలు తమ అవార్డులను భారత రాష్ట్రపతి చేతుల మీదుగా 2025 జనవరి 17న రాష్ట్రపతి భవన్‌లో నిర్వహించే ఒక ప్రత్యేక కార్యక్రమంలో అందుకోనున్నారు.

ఈ మెరికలను రైల్వే అభినందనలను తెలియజేస్తూ, రాబోయే కాలంలో కూడా ఇంకా పైకెదగాలని కోరుకుంటూ శుభాకాంక్షలు వ్యక్తం చేస్తోంది.

***