ಕೇಂದ್ರ ಗೃಹ ಮತ್ತು ಸಹಕಾರ ಸಚಿವರಾದ ಶ್ರೀ ಅಮಿತ್‌ ಶಾ ಅವರು ನವದೆಹಲಿಯಲ್ಲಿ ಭಾರತೀಯ ಬೀಜ್‌ ಸಹಕಾರಿ ಸಮಿತಿ ಲಿಮಿಟೆಡ್‌ (ಬಿಬಿಎಸ್‌ಎಸ್‌ಎಲ್‌) ಪರಿಶೀಲನಾ ಸಭೆಯ ಅಧ್ಯಕ್ಷತೆ ವಹಿಸಿದ್ದರು. ಸಭೆಯಲ್ಲಿ ಕೇಂದ್ರ ಸಹಕಾರ ಖಾತೆ ರಾಜ್ಯ ಸಚಿವರಾದ ಶ್ರೀ ಕೃಷ್ಣ ಪಾಲ್‌ ಮತ್ತು ಶ್ರೀ ಮುರಳೀಧರ್‌ ಮೊಹೋಲ್‌ ಭಾಗವಹಿಸಿದ್ದರು. ಸಹಕಾರ ಸಚಿವಾಲಯದ ಕಾರ್ಯದರ್ಶಿ ಡಾ. ಆಶಿಶ್‌ ಕುಮಾರ್‌ ಭೂತಾನಿ, ಸಹಕಾರ ಸಚಿವಾಲಯದ ಹೆಚ್ಚುವರಿ ಕಾರ್ಯದರ್ಶಿ ಶ್ರೀ ಪಂಕಜ್‌ ಕುಮಾರ್‌ ಬನ್ಸಾಲ್‌ ಮತ್ತು ಬಿಬಿಎಸ್‌ಎಸ್‌ಎಲ್‌ನ ಅಧ್ಯಕ್ಷ ರು ಮತ್ತು ವ್ಯವಸ್ಥಾಪಕ ನಿರ್ದೇಶಕರು ಈ ಸಂದರ್ಭದಲ್ಲಿಉಪಸ್ಥಿತರಿದ್ದರು.

ಸಭೆಯನ್ನುದ್ದೇಶಿಸಿ ಮಾತನಾಡಿದ ಶ್ರೀ ಅಮಿತ್‌ ಶಾ, ಪ್ರಧಾನಮಂತ್ರಿ ಶ್ರೀ ನರೇಂದ್ರ ಮೋದಿ ಅವರ ‘‘ಸೆಹಕಾರ್‌ ಸೇ ಸಮೃದ್ಧಿ’’ ದೃಷ್ಟಿಕೋನವನ್ನು ಸಾಕಾರಗೊಳಿಸುವಲ್ಲಿ ಮತ್ತು ರೈತರನ್ನು ಸಬಲೀಕರಣಗೊಳಿಸುವಲ್ಲಿ ಭಾರತೀಯ ಬೀಜ್‌ ಸಹಕಾರಿ ಸಮಿತಿ ಲಿಮಿಟೆಡ್‌ (ಬಿಬಿಎಸ್‌ಎಸ್‌ಎಲ್‌) ನಿರ್ಣಾಯಕ ಪಾತ್ರ ವಹಿಸಿದೆ ಎಂದು ಹೇಳಿದರು. ಬಿಬಿಎಸ್‌ಎಸ್‌ಎಲ್‌ ಭಾರತದ ಸಾಂಪ್ರದಾಯಿಕ ಬೀಜಗಳ ಸಂಗ್ರಹಣೆ ಮತ್ತು ಸಂರಕ್ಷಣೆಯತ್ತ ಗಮನ ಹರಿಸಬೇಕು ಎಂದು ಅವರು ಒತ್ತಿ ಹೇಳಿದರು. ಸಭೆಯಲ್ಲಿ, ಶ್ರೀ ಅಮಿತ್‌ ಶಾ ಅವರು 2025-26ರ ವೇಳೆಗೆ ಹೆಚ್ಚುವರಿ 20,000 ಸಹಕಾರಿ ಸಂಘಗಳೊಂದಿಗೆ ಸಂಪರ್ಕ ಸಾಧಿಸುವ ಗುರಿಯನ್ನು ಬಿಬಿಎಸ್‌ಎಸ್‌ಎಲ್‌ಗೆ ನಿಗದಿಪಡಿಸಿದರು. ಕಡಿಮೆ ನೀರು ಮತ್ತು ಕೀಟನಾಶಕಗಳ ಅಗತ್ಯವಿರುವ ಇಂತಹ ಬೀಜ ಉತ್ಪಾದನೆಯ ಮೇಲೆ ಬಿಬಿಎಸ್‌ಎಸ್‌ಎಲ್‌ ಹೆಚ್ಚು ಗಮನ ಹರಿಸಬೇಕು ಎಂದು ಶ್ರೀ ಅಮಿತ್‌ ಶಾ ಹೇಳಿದರು.

ಇದೇ ವೇಳೆ ಅವರು, ಸಣ್ಣ  ರೈತರು ಸಾಧ್ಯವಾದಷ್ಟು ಹೆಚ್ಚಿನ ಇಳುವರಿಯನ್ನು ಸಾಧಿಸುವುದನ್ನು ಖಚಿತಪಡಿಸಿಕೊಳ್ಳಲು ಪ್ರಯತ್ನಗಳನ್ನು ಮಾಡಬೇಕು ಮತ್ತು ಅವರ ಬೆಳೆಗಳ ಪಕ್ವತೆಯ ಅವಧಿಯನ್ನು ವಿಸ್ತರಿಸಬೇಕು ಎಂದು ಒತ್ತಿ ಹೇಳಿದರು. ಭಾರತದ ಸಾಂಪ್ರದಾಯಿಕ ಪೌಷ್ಟಿಕ ಬೀಜಗಳ ಸಂಗ್ರಹ ಮತ್ತು ಸಂರಕ್ಷ ಣೆಗಾಗಿ ಬಿಬಿಎಸ್‌ಎಸ್‌ಎಲ್‌ ವೇಗವಾಗಿ ಕಾರ್ಯನಿರ್ವಹಿಸುತ್ತಿದೆ ಎಂದು ಕೇಂದ್ರ ಗೃಹ ಸಚಿವರು ಮತ್ತು ಸಹಕಾರ ಸಚಿವರು ಹೇಳಿದರು. ಇಫ್ಕೋ ಮತ್ತು ಕ್ರಿಬ್ಕೊ ನಮ್ಮ ದೇಶೀಯ ಮತ್ತು ಹೈಬ್ರಿಡ್‌ ಬೀಜಗಳ ಪೌಷ್ಠಿಕಾಂಶದ ಮೌಲ್ಯವನ್ನು ಮೌಲ್ಯಮಾಪನ ಮಾಡಬೇಕು ಎಂದು ಅವರು ಒತ್ತಿ ಹೇಳಿದರು. ಬೇಳೆಕಾಳುಗಳು ಮತ್ತು ಎಣ್ಣೆಕಾಳುಗಳ ಉತ್ಪಾದನೆಯನ್ನು ಹೆಚ್ಚಿಸುವುದರ ಜೊತೆಗೆ ಅವುಗಳ ಪೌಷ್ಠಿಕಾಂಶದ ಮೌಲ್ಯವನ್ನು ಕಡಿಮೆ ಮಾಡದೆ ಈಗ ಕಡಿಮೆ ಬಳಕೆಯಲ್ಲಿರುವ ಸಾಂಪ್ರದಾಯಿಕ ಪೌಷ್ಟಿಕ ಬೀಜಗಳನ್ನು ಉತ್ತೇಜಿಸುವುದು ಮತ್ತು ಸಂರಕ್ಷಿಸುವುದು ಬಿಬಿಎಸ್‌ಎಸ್‌ಎಲ್‌ನ ಆದ್ಯತೆಯಾಗಿದೆ ಎಂದು ಶ್ರೀ ಅಮಿತ್‌ ಶಾ ಹೇಳಿದರು.

ಇಫ್ಕೊ ಮತ್ತು ಕ್ರಿಬ್ಕೊ ತಮ್ಮ ಪ್ರಯೋಗಾಲಯಗಳನ್ನು ಈ ಕ್ಷೇತ್ರದಲ್ಲಿಅನುಕರಣೀಯ ಮತ್ತು ಅತ್ಯುತ್ತಮವಾಗಿಸಲು ಶ್ರಮಿಸಬೇಕು ಎಂದು ಕೇಂದ್ರ ಸಹಕಾರ ಸಚಿವರು ಗಮನಿಸಿದರು. ಎಲ್ಲಾ ಸಹಕಾರಿ ಸಂಸ್ಥೆಗಳು ಪ್ರಮಾಣೀಕೃತ ಬೀಜಗಳೊಂದಿಗೆ ಕೃಷಿ ಮಾಡಲು ರೈತರನ್ನು ಪ್ರೋತ್ಸಾಹಿಸಬೇಕು ಎಂದು ಅವರು ಉಲ್ಲೇಖಿಸಿದರು.

ದೇಶಾದ್ಯಂತ 34 ರಾಜ್ಯಗಳು ಮತ್ತು ಕೇಂದ್ರಾಡಳಿತ ಪ್ರದೇಶಗಳ 20,000 ಕ್ಕೂ ಹೆಚ್ಚು ವಿವಿಧ ಸಹಕಾರಿ ಸಂಘಗಳು ಬಿಬಿಎಸ್‌ಎಸ್‌ಎಲ್‌ನ ಷೇರುದಾರರಾಗಿದ್ದಾರೆ ಎಂದು ಶ್ರೀ ಅಮಿತ್‌ ಶಾ ಒತ್ತಿ ಹೇಳಿದರು. ಬೀಜ ಉತ್ಪಾದನೆ, ಸಂಶೋಧನೆ ಮತ್ತು ಪ್ರಚಾರಕ್ಕಾಗಿ ಕೆಲಸ ಮಾಡುವ ಎಲ್ಲಾ ಸರ್ಕಾರಿ ವಿಶ್ವವಿದ್ಯಾಲಯಗಳ ವಿಜ್ಞಾನಿಗಳು ಮತ್ತು ಪ್ರಯೋಗಾಲಯಗಳನ್ನು ಬಿಬಿಎಸ್‌ಎಸ್‌ಎಲ್‌ ಬಳಸಿಕೊಳ್ಳಬೇಕು ಎಂದು ಅವರು ಹೇಳಿದರು. ಬೀಜ ಉತ್ಪಾದನೆಯನ್ನು ಹೆಚ್ಚಿಸಲು ಸಂಬಂಧಿಸಿದ ಗುರಿಗಳನ್ನು ಸಾಧಿಸಲು 10 ವರ್ಷಗಳ ಮಾರ್ಗಸೂಚಿ ಮತ್ತು ಅದರ ನಿಯಮಿತ ಪರಿಶೀಲನೆಯನ್ನು ಸಿದ್ಧಪಡಿಸಲು ಕೇಂದ್ರ ಸಹಕಾರ ಸಚಿವರು ಒತ್ತಿ ಹೇಳಿದರು.

2024ರ ಮುಂಗಾರು ಅವಧಿಯಲ್ಲಿ, ಬಿಬಿಎಸ್‌ಎಸ್‌ಎಲ್‌ 6 ರಾಜ್ಯಗಳಲ್ಲಿ5,596 ಹೆಕ್ಟೇರ್‌ ಪ್ರದೇಶದಲ್ಲಿಅಡಿಪಾಯ ಮತ್ತು ಪ್ರಮಾಣೀಕೃತ ಬೀಜಗಳನ್ನು ಉತ್ಪಾದಿಸುತ್ತಿದೆ. ಈ ಯೋಜನೆಯಡಿ 8 ಬೆಳೆಗಳ 49 ಪ್ರಭೇದಗಳಿಂದ ಅಂದಾಜು 1,64,804 ಕ್ವಿಂಟಾಲ್‌ ಬೀಜಗಳನ್ನು ಉತ್ಪಾದಿಸುವ ನಿರೀಕ್ಷೆಯಿದೆ. ಬಿಬಿಎಸ್‌ಎಸ್‌ಎಲ್‌ 2032-33ರ ವೇಳೆಗೆ ಒಟ್ಟು 18,000 ಕೋಟಿ ರೂ.ಗಳ ವಹಿವಾಟು ಸಾಧಿಸುವ ಮಹತ್ವಾಕಾಂಕ್ಷೆಯ ಗುರಿಯನ್ನು ನಿಗದಿಪಡಿಸಿದೆ. ತನ್ನ ಕಾರ್ಯಾಚರಣೆ ಪ್ರಾರಂಭವಾದಾಗಿನಿಂದ, ಬಿಬಿಎಸ್‌ಎಸ್‌ಎಲ್‌ 41,773 ಕ್ವಿಂಟಾಲ್‌ ಬೀಜಗಳನ್ನು ಮಾರಾಟ ಮಾಡಿದೆ / ವಿತರಿಸಿದೆ, ಮುಖ್ಯವಾಗಿ ನಾಲ್ಕು ಬೆಳೆಗಳಾದ ಗೋಧಿ, ನೆಲಗಡಲೆ, ಓಟ್ಸ್‌ ಮತ್ತು ಬೆರ್ಸೀಮ್‌ - ಇವುಗಳ ಮಾರುಕಟ್ಟೆ ಮೌಲ್ಯವು ಸುಮಾರು 41.50 ಕೋಟಿ ರೂಪಾಯಿ ಇದೆ.

*****