داخلی امور اور تعاون کے مرکزی وزیر  جناب امت شاہ نے تریپورہ کی راجدھانی اگرتلہ میں نارتھ ایسٹ ڈیولپمنٹ فائنانس کارپوریشن (این ای ڈی ایف آئی) کے زیر اہتمام نارتھ ایسٹ بینکرز کانکلیو 2024 سے خطاب کیا۔ اس موقع پر شمال مشرقی خطے کے مواصلات اور ترقی کے مرکزی وزیر جناب جیوترادتیہ ایم سندھیا، تریپورہ کے وزیر اعلیٰ پروفیسر (ڈاکٹر) مانک ساہا، اروناچل پردیش کے وزیر اعلیٰ پیما کھانڈو، شمال مشرقی ترقی کے مرکزی وزیر مملکت ڈاکٹر سکانتا مجومدار، مرکزی داخلہ سکریٹری، جناب گووند موہن اور متعدددیگر معززین موجود تھے۔

مرکزی وزیر داخلہ  نے اپنے خطاب میں کہا کہ 1.4 بلین کی آبادی اور متنوع جغرافیائی حالات کے ساتھ ہندوستان کے لئے ہر علاقے، ریاست، گاؤں اور فرد کی اقتصادی ترقی کو یقینی بناتے ہوئے معیشت کو فروغ دینا ضروری ہے۔ انہوں نے کہا کہ جب تک ہم ملک کے 140 کروڑ عوام کی معاشی ترقی مکمل نہیں کر لیتے تب تک ہم ترقی یافتہ قوم نہیں بن سکتے۔ جناب شاہ نے مزید کہا کہ ایک ترقی یافتہ قوم کا تصور یہ ہے کہ ہر شخص اپنے خاندان کی دیکھ بھال کرنے کے قابل ہو، ہر شخص کو بنیادی سہولیات میسر ہوں اور ہر شخص ملک کی ترقی میں شراکت دار بنے۔ انہوں نے کہا کہ ایسی ہی قوم ترقی یافتہ قوم بن سکتی ہے۔

جناب امت شاہ نے کہا کہ کسی بھی ملک کو آگے بڑھنے کے لیے یکساں ترقی ضروری ہے اور ہمارے بینکروں کو اس بنیادی اصول کو اپنانا چاہیے۔ انہوں نے کہا کہ شمال مشرق کی ترقی ہم سب کی قومی ذمہ داری ہے۔ جناب شاہ نے بینکروں سے درخواست کی کہ وہ شمال مشرق کو صرف کاروبار، ممکنہ اور منافع کے نقطہ نظر سے نہ دیکھیں بلکہ ذمہ داری سمجھیں۔ انہوں نے اس بات پر روشنی ڈالی کہ وزیر اعظم جناب نریندر مودی جی کی قیادت میں، شمال مشرق اگلے 25 برسوں  میں ہندوستان کی ترقی اور اعتماد کا گیٹ وے بن جائے گا، جو پوری قوم کے اعتماد کے گیٹ وے کے طور پر کام کرے گا۔ انہوں نے یقین ظاہر کیا کہ شمال مشرق بنیادی ڈھانچے کی ترقی میں بھی تمام ریکارڈ توڑ دے گا۔

داخلی امور اور تعاون کے مرکزی وزیر نے شمال مشرقی بینکرس کنکلیو کے شرکاء سے مالی شمولیت، اقتصادی ترقی اور بنیادی ڈھانچے کی ترقی میں مدد کرنے کی اپیل کی اور اس بات پر زور دیا کہ ان کا نقطہ نظر ان شعبوں کے لئے حساس ہونا چاہیے۔ انہوں نے شمال مشرق میں فنانس، بنیادی ڈھانچہ، زراعت، ایم ایس ایم ای اور ذاتی قرضوں کے لئے الگ الگ معیار طے کئے جانے  پر زور دیا۔ جناب شاہ نے کہا کہ اسٹیٹ بینک آف انڈیا کو شمال مشرقی مالیات کے لیے مخصوص رہنما خطوط تیار کرنا چاہیے، مثبت نقطہ نظر کے ساتھ خطے کی موجودہ صلاحیت پر غور کرنا چاہیے۔ انہوں نے اس بات پر زور دیا کہ خطے میں بے پناہ امکانات ہیں اور شمال مشرق ہندوستان کی برآمدات کا گیٹ وے بن گیا ہے۔

جناب امت شاہ نے کہا کہ کچھ سال پہلے بنگلہ دیش اور ہندوستان کے درمیان انکلیو کا تبادلہ ہوا تھا۔ آزادی کے بعد، ہندوستان کے کچھ حصے بنگلہ دیش کے اندر تھے اور بنگلہ دیش کے کچھ حصے ہندوستان کے اندر تھے، جس کی وجہ سے بنیادی ڈھانچے کی تعمیر اور دیکھ بھال میں خاصی مشکلات پیش آئیں۔ وزیر اعظم مودی جی نے پہل کی اور آزادی کے 75 سال بعد، آئینی ترامیم کی گئیں اور بنگلہ دیش کے ساتھ دونوں ممالک کے درمیان انکلیو کے تبادلے کے لیے بات چیت ہوئی۔ اس کے نتیجے میں، آج ہماری آبی گزرگاہیں چٹاگانگ سے جڑی ہوئی ہیں اور چٹاگانگ بندرگاہ کے ذریعے، اب پورے شمال مشرق کے پاس دنیا کو مصنوعات بھیجنے کے لیے راستے کھلے ہیں۔ انہوں نے کہا کہ پہلے نقل و حمل کی لاگت 12 سے 15 فیصد تھی جس کی وجہ سے شمال مشرق سے ملک کے باہر مصنوعات برآمد کرنا ناممکن تھا، لیکن آج شمال مشرق میں جو بھی پیداوار ہوتی ہے، عالمی منڈی چٹاگانگ بندرگاہ کے ذریعے کھلی ہے۔

مرکزی وزیر داخلہ نے کہا کہ پچھلے 10 برسوں  میں شمال مشرق کی اقتصادی ترقی کے لئے رابطے میں انقلاب تقریباً مکمل ہو چکا ہے۔ اسرو کے ذریعے، مقامی وسائل کے صحیح اور مؤثر استعمال کے لیے بہترین پروگرام تیار کیے گئے ہیں اور شمال مشرق میں بھی امن و استحکام حاصل کیا گیا ہے۔ وزیر اعظم جناب نریندر مودی جی نے شمال مشرق کو جذبات، معیشت اور ماحولیات کے نقطہ نظر سے بااختیار بنایا ہے۔  پچھلے 10 برسوں  میں نریندر مودی جی خود 65 بار شمال مشرق کا دورہ کر چکے ہیں، اور مرکزی وزراء نے شمال مشرق میں 700 سے زیادہ راتیں گزاری ہیں۔ یہ اس بات کی عکاسی کرتا ہے کہ شمال مشرق حکومت ہند کی اولین ترجیح ہے۔

جناب امت شاہ نے کہا کہ پچھلے 10 برسوں  میں ہندوستان کے بینکنگ سیکٹر میں دیوالیہ پن کے کئی کامیاب قوانین بنائے گئے ہیں۔ ہندوستان میں بینکوں نے 10 لاکھ کروڑ کے ناقص قرضوں کی وصولی کو ایم یو ڈی آر اے لون، سوا ندھی  لون اور دیگر اسکیموں کے ذریعے مکمل کیا ہے۔ وزیر داخلہ نے بتایا کہ پبلک سیکٹر کے 10 بینکوں کو بڑے بینکوں میں ضم کر دیا گیا ہے۔ پہلے، پبلک سیکٹر کے بینک خسارے میں چل رہے تھے، لیکن 24-2023 میں، ان بینکوں نے 1.5 لاکھ کروڑ کا منافع کمایا اور ان کا این پی اے 2.8 فیصد سے کم ہو گیا ہے۔ انہوں نے مزید کہا کہ مستقبل کی کاروباری سرمایہ کاری کے لئے، شمال مشرق سے بہتر کوئی منزل نہیں ہے، کیونکہ اگلے 10 برسوں  میں اس کی اوسط شرح نمو 20فیصد متوقع ہے۔ جناب شاہ نے اس بات پر زور دیا کہ مالیاتی پالیسی کو مزید لچکدار بنایا جانا چاہیےاور شمال مشرق کے ہر شعبے اور صنعت کو آگے بڑھنے کے لئے ایک اچھا پیکیج فراہم کیا جانا چاہیے۔

جناب امت شاہ نے کہا کہ یو پی آئی کا سب سے بڑا فائدہ شمال مشرق کو ہوگا۔ ہندوستان کے 95فیصد گاؤں اب جی-3 اور جی-4 کنیکٹیویٹی سے لیس ہیں، اور شمال مشرق میں بھی 80فیصد کنیکٹیویٹی مکمل ہو چکی ہے۔ مزید برآں، شمال مشرق میں بے شمار بنیادی ڈھانچے کے منصوبے چلائے گئے ہیں، 20 سے زیادہ پانی پر مبنی منصوبے مکمل کیے گئے ہیں اور امن قائم ہوا ہے۔ انہوں نے کہا کہ آنے والے دنوں میں اس خطے میں بہت سی صنعتیں آنے کا امکان ہے۔ ٹاٹا گروپ کے 27,000 کروڑ کا سیمی کنڈکٹر پروجیکٹ اس بات کی نشاندہی کرتا ہے کہ بڑے صنعتی گروپ شمال مشرق میں امکانات کے متلاشی ہیں۔ وزیر داخلہ نے مزید کہا کہ خطے میں 50,000 میگاواٹ پن بجلی کی صلاحیت کو ابھی تک مکمل طور پر تلاش نہیں کیا گیا ہے اور دریائے برہم پترملک کو سستی بجلی  بلا رکاوٹ فراہم کر سکتا ہے۔

داخلی امور اور تعاون کے مرکزی  وزیر نے کہا کہ شمال مشرق میں بے پناہ امکانات موجود ہیں  اور اس خطے کو اعداد و شمار کے ذریعے نہیں بلکہ حساسیت کے لحاظ سے دیکھا جانا چاہیے۔ اس کی ترقی کو صرف کاروبارکے اعتبارسے نہیں دیکھا جانا چاہئے، بلکہ ایک قومی ذمہ داری کے طور پر دیکھا جانا چاہئے۔ جناب شاہ نے کہا کہ تمام بینکروں کو شمال مشرقی خطے کی ہر ریاست میں 100 فیصد صلاحیت کو تلاش کرنا چاہئے اور ایک ترقی یافتہ شمال مشرقی اور ایک ترقی یافتہ ہندوستان کی تعمیر کی سمت میں آگے بڑھنا چاہئے۔

***

ش ح۔ ک ا۔ ع ر

U .NO.4445