U Myntri Sorkar Pdeng ba dei khmih ia ki tnad Kam Pohiing bad Cooperation, Amit Shah u la ai jingkren ha ka North East Bankers Conclave 2024, ba la pynlong da ka North East Development Finance Corporation (NEDFI) ha Agartala, ka nongbah jong ka Tripura. Ha kane ka sngi u Myntri ki tnad Communications bad Development of the North East Region, Jyotiraditya M. Scindia, u Myntri Rangbah ka Tripura (Dr.) Manik Saha, u Myntri Rangbah ka Arunachal Pradesh Pema Khandu, U Myntri Khynnah ka tnad Northeast Development Dr. Sukanta Majumdar, u Secretary ka tnad kam Pohiing jong ka Sorkar Pdeng Govind Mohan ha ryngkat kiwei kiwei ki kynrem ki lyndan ki la iadon lang

Ha ka jingai jingkren, u Myntri ki tnad Kam Pohiing bad Cooperation u la ong ba na ka bynta ka India kaba don 1.4 billion ngut ki briew bad ki jinglong jingman bapher bapher, ka long kaba donkam bha ban kyntiew ia ka ioh ka kot ha ryngkat ka jingpynthikna ia ka jingkiew ka ioh ka kot jong man ka thain, jylla, shnong bad briew. U la ong ba katba ngim pat lah ban kyntiew ia ka ioh ka kot jong ki 140 klur ngut ki briew jong ka ri, ngin ym lah ban long ka ri kaba la kiew shaphrang. U Shah u la ong ba ka ka ri kaba la kiew shaphrang ka dei kata ha kaba man u briew u lah ban sumar ia la ka longing, baroh ki briew ki ioh ia ki jingdonkam bad man u briew u nohsynniang sha ka roi ka par jong ka ri. U la ong ba ka dei kane ka jai tri kaba lah ban long ka ri kaba la kiew shaphrang.

U Amit Shah u la ong ba ka roi ka par kaba ryntih ka long kaba donkam khnang ba ka ri kan kiew shaphrang bad ba ki briew kiba trei ha ki kam bank ki dei ban sngapthuh ia kane. U la ong ba ka jingkyntiew ia ka thain shatei lammihngi ka dei ka jingbahkhlieh jong baroh kawei ka ri. U la kyntu ia ki briew kiba trei ha ki kam bank ba kin ym peit ia ka thain shatei lammihngi na ka liang ban pynmih pisa bad ki lad kiba don hynrei ki dei ban peit ia ka da ka jingbahkhlieh. U la ong ba hapoh ka jingialam jong u Myntri Rangbah Duh Narendra Modi, ka thain shatei lammihngi kan long ka khyrdop na ka bynta ka roi ka par bad ka jingshaniah jong ka Indi ha kine ki 25 snem ban wan ka ban long ka khyrdop jong ka jingshaniah ia baroh kawei ka ri. U la ong ba u ngeit skhem ba ka thain shatei lammihngi kan pynkhein lut ia ki rekod kiba iadei bad ka jingkyntiew ia ki jingdon jingem ruh.

U Myntri u la kyntu ia ki nongiashim bynta ha ka Northeast Bankers Conclave ba kin iarap ha ka jingai bynta ia baroh ha ki kam pisa, ka jingkyntiew ia ka ioh ka kot bad ka jingkyntiew ia ki jingdon jingem. U la ong ba dei ban don da kawei pat ka rukom peit ia ka ioh ka kot, ki jingdon jingem, ka kam rep, ki MSME bad ki jingai ram ha ka thain shatei lammihngi. U Shah u la ong ba ka State Bank of India ka dei ban wanrah ia ki rukom treikam ba kyrpang na ka bynta ki kam pisa ha ka thain shatei lammihngi da kaba peit ia ka bor treikam ha ka thain da ka jingkyrmen. U la ong ba ki don shibun ki lad ha ka thain bad ba kane ka thain ka la long ka khyrdop na ka bynta ka jingshalan mar ka India.

U Amit Shah u la ong ba ha kine ki snem ba la dep, ki enclave hapdeng ka Bangladesh bad India ki dei kiba la iasam. Hadien ka jingioh jinglaitluid ka ri,  ki don ki bynta jong ka India kiba don hapoh ka Bangladesh bad ki don ki bynta jong ka Bangladesh kiba don hapoh ka India bad ba kane ka la wanrah ia ki jingeh ha ka jingtei bad ka jingpeit ia ki jingdon jingem. U Myntri Rangbah Duh u la shimti ia ka kam bad hadien 75 snem ba la ioh ia ka jinglaitluid, la wanrah ia ki jingpynkylla ha ka Riti Synshar bad la don ki jingiakren bad ka Bangladesh ban iasam ia ki enclave hapdeng kin ear tylli ki ri. Namar kane, mynta ki lad ka leit ka wan jong ngi lyngba ki jaka shong um ki iasoh bad ka Chittagong bad lyngba ka kad Chittagong baroh kawei ka thain shatei lammihngi ka don ka lad ban phah ia ki mar sha kylleng ka pyrthei. U la ong ba mynshuwa ki jinglut jingsep na ka bynta ka jingpynkit mat ka ju long 12 haduh 15%, kaba la buh jingeh ban shalan mar shabar ka ri na ka thain shatei lammihngi, hynrei mynta ki mar kiba pynmih ha ka thain shatei lammihngi ki don ka lad ban poi sha ki iew ha kylleng ka pyrthei lyngba ka kad Chittagong.

U Myntri ka tnad Kam Pohiing u la ong ba ha kine ki 10 snem ba la dep, ka la don ka jingkylla ha ki lad ka leit ka wan na ka bynta ka jingkyntiew ka ioh ka kot jong ka thain shatei lammihngi ia kaba la jan pyndep. Lyngba ka ISRO, la wanrah ia ki prokram ban pyndonkam ia ki jingdon jingem ha ka rukom kaba seisoh, ka la don ruh ka jingwanrah ia ka shongsuk shongsain ha ka thain shatei lamming. U Myntri Rangbah Duh u la pynkupbor ia ka thain shatei lammihngi ha kaba iadei bad ki jingsngew, ka ioh ka kot bad ka kam kaba iadei bad ka mariang. Ha kine ki 10 snem ba la dep, u Myntri Rangbah Duh u la leit jngoh ia ka thain shatei lammihngi 65 sien bad ki myntri sorkar pdeng ki la pynlut palat 700 miet ha ka thain shatei lammihngi. Kane ka pyni ia kajingpeit bniah ka Sorkar Pdeng ia ka thain shatei lammihngi

U Amit Shah u la ong ba ha kine ki 10 snem ba la dep, ki la don shibun ki ain kiba la wanrah ha ki kam bank jong ka India. Ki bank jong ka India ki la lah ban ioh biang 10 lak klur na ki jingai ram bym seisoh lyngba ki skhim kum ki jingai ram MUDRA, ki jingai ram SVANidhi bad kiwei kiwei. U Myntri u la ong ba 10 tylli ki bank ki dei kiba la pyniasoh noh bad ki bank kiba kham heh. Ha ki por ba la dep, ki bank ki treikam ha ka jingduhnong hynrei ha u 2023-24 kine ki bank ki la iohnong haduh 1.5 lak klur bad ki NPA jong ki ki la hiar hapoh 2.8%. U la ong ba na ka bynta ki jingbei tyngka ha ki kam khaii ha ki por ban wan ka jaka kaba biang tam ka dei ka thain shatei lammihngi namar la kyrmen ba kan don ka jingkiew ka roi ka par kaba 20% ha kine ki 10 snem ban wan. U Shah u la ong ba ka polisi kaba iadei bad ka ioh ka kot ka dei ban long kaba kham laitluid bad dei ban don ka jingtyrwa kaba bha ha man ka kam  bad ka karkhana ha ka thain shatei lammihngi ba kine ki kiew shaphrang.

U Amit Shah u la ong ba ka jingioh jingmyntoi kaba heh tam na ka UPI kan dei na ka bynta ka thain shatei lammihngi. 95% ki shnong jong ka India mynta ki don ka 3G bad ka 4G, bad ka jingpyniasoh kaba la pyndep ha ka thain shatei lammihngi ka long 80%. Shuh shuh ki la don ki projek na ka bynta ki jingdon jingem ha ka thain shatei lammihngi ha kaba 20 tylli ki projek kiba idei bad ka um ki dei kiba la pyndep, bad la wanrah ruh ia ka shongsuk shongsain. U la ong ba ha ki por ban wan, kin don bun ki karkhana ki ban wan ha ka thain. Ka jaka pynmih semiconductor kaba T 27000 klur jong ka Tata Group ka pyni ba ki kompani ba heh ki la sdang peit ia ki lad kiba don ha ka thain shatei lammihngi. U Myntri u la ong ba ka lad ban pynmih 50,000 MW ka bording ha ka thain ka dei ka bym pat pyndonkam bha bad ba ka Wah Brahmaputra ka lah ban pynbiang ia ka bording ka bym kut ia ka ri.

U Myntri ki tnad Kam Pohiing bad Cooperation u la ong ba ka lad kaba heh tam ka don ha ka thain shatei lammihngi bad bay m dei ban peit ia ka thain na ka liang jong ka statistics hynrtei dei ban peit na ka liang jong ka jingsngewlem bad ka jingsngewthuh. Ym dei ban peit ia ka jingkyntiew ia ka thain na ka liang jong ka jingkamai pisa hynrei ka dei ban long ka jingbahkhlieh jong ka ri. U Shah u la ong ba kito kiba trei ha ki kam bank ki dei ban peit lut ia ki lad kiba don ha baroh ki jylla jong ka thain shatei lammihngi bad ki dei ban iaid shakhmat ban tei ia ka thain shatei lammihngi kaba la kiew shaphrang bad ka India kaba la kiew shaphrang.

****