ರೈಲ್ವೆ ಸಚಿವಾಲಯದೊಂದಿಗೆ ಸರ್ಕಾರಿ ರೈಲ್ವೆ ಪೊಲೀಸ್ ಮುಖ್ಯಸ್ಥರ 5ನೇ ಅಖಿಲ ಭಾರತ ಸಮ್ಮೇಳನವು ಇಂದು ನವದೆಹಲಿಯ ವಿಜ್ಞಾನ ಭವನದಲ್ಲಿ ಯಶಸ್ವಿಯಾಗಿ ಮುಕ್ತಾಯಗೊಂಡಿತು. ರೈಲ್ವೆ ಸಂರಕ್ಷಣಾ ಪಡೆ (RPF) ಇದರ ಸಂಯೋಜನೆಯನ್ನು ಮಾಡಿತ್ತು. ಪ್ರಯಾಣಿಕರ ಸುರಕ್ಷತೆ, ಅಪರಾಧ  ಕಡಿಮೆ ಮಾಡುವ  ಕಾರ್ಯತಂತ್ರಗಳು ಮತ್ತು  ಸುಧಾರಿತ ರೈಲ್ವೆ ಭದ್ರತೆಗಾಗಿ  ಅಗತ್ಯವಿರುವ  ಮಾನವ ಸಂಪನ್ಮೂಲದ ಕುರಿತು  ಚರ್ಚಿಸಲು ಈ ಸಮ್ಮೇಳನವು  ಹಿರಿಯ ಅಧಿಕಾರಿಗಳು ಮತ್ತು ಭದ್ರತಾ ಮುಖಂಡರನ್ನು ಒಟ್ಟುಗೂಡಿಸಿತು.

ಭದ್ರತಾ ಮೂಲಸೌಕರ್ಯಗಳ ಆಧುನೀಕರಣ

ರೈಲ್ವೆ ಮಂಡಳಿಯ ಅಧ್ಯಕ್ಷರು ಮತ್ತು ಮುಖ್ಯ ಕಾರ್ಯನಿರ್ವಹಣಾ ಅಧಿಕಾರಿಗಳಾದ ಶ್ರೀ ಸತೀಶ್ ಕುಮಾರ್ ಅವರ ಪ್ರಮುಖ ಭಾಷಣದೊಂದಿಗೆ ಸಮ್ಮೇಳನವು ಪ್ರಾರಂಭವಾಯಿತು. ದೇಶಾದ್ಯಂತ ಲಕ್ಷಾಂತರ ರೈಲ್ವೆ ಪ್ರಯಾಣಿಕರ ಸುರಕ್ಷತೆಯನ್ನು ಖಚಿತಪಡಿಸಿಕೊಳ್ಳುವಲ್ಲಿ GRP ಮತ್ತು RPF ನಡುವಿನ ಸಹಯೋಗದ  ಮಹತ್ವವನ್ನು ಅವರು  ಒತ್ತಿ ಹೇಳಿದರು.  ಪ್ರಯಾಣಿಕರ  ದೂರುಗಳು ಮತ್ತು ಪ್ರಕರಣಗಳ ನೋಂದಣಿಯ ಮೇಲೆ  ವಿಶೇಷ ಗಮನ ಹರಿಸುವಂತೆ  ಅವರು ಕರೆ ನೀಡಿದರು.  ಆಪರೇಷನ್ ನನ್ಹೆ ಫರಿಶ್ಟೆ, ಆಪರೇಷನ್ AAHT ಮತ್ತು ಮೇರಿ ಸಹೇಲಿಯಂತಹ ವಿವಿಧ ಉಪಕ್ರಮಗಳ ಮೂಲಕ ರೈಲ್ವೆಯಲ್ಲಿ ಮಹಿಳೆಯರು ಮತ್ತು ಮಕ್ಕಳ  ಸುರಕ್ಷತೆಯನ್ನು ಖಚಿತಪಡಿಸಿಕೊಳ್ಳಲು RPF  ನಡೆಸುತ್ತಿರುವ  ಪ್ರಯತ್ನಗಳನ್ನು  ಶ್ಲಾಘಿಸಿದರು. RPF  ಮಹಾನಿರ್ದೇಶಕ  ಶ್ರೀ ಮನೋಜ್ ಯಾದವ್ ಅವರು ತಮ್ಮ  ಸ್ವಾಗತ ಭಾಷಣದಲ್ಲಿ,  ಹೊಸ ಸವಾಲುಗಳನ್ನು ಎದುರಿಸಲು,  ವಿಶೇಷವಾಗಿ ಹೆಚ್ಚುತ್ತಿರುವ ಪ್ರಯಾಣಿಕ ಅಪರಾಧಗಳನ್ನು ನಿರ್ವಹಿಸುವಲ್ಲಿ  ಭದ್ರತಾ ಮೂಲಸೌಕರ್ಯವನ್ನು ಆಧುನೀಕರಿಸುವ ಅಗತ್ಯವನ್ನು ಒತ್ತಿ ಹೇಳಿದರು.

ಹೊಸ ಕ್ರಿಮಿನಲ್ ಕಾನೂನುಗಳು ರೈಲ್ವೆ ಪೊಲೀಸ್ ವ್ಯವಸ್ಥೆಯನ್ನು  ಬದಲಾಯಿಸುತ್ತಿವೆ

ರೈಲ್ ಮದದ್ ಪೋರ್ಟಲ್‌ ನಲ್ಲಿ ದಾಖಲಾದ ಪ್ರಯಾಣಿಕರ ದೂರುಗಳು ಮತ್ತು  ನಿಜವಾಗಿ ದಾಖಲಾಗಿರುವ ಪ್ರಕರಣಗಳ  ತುಲನಾತ್ಮಕ ವಿಶ್ಲೇಷಣೆಯು ಚರ್ಚೆಗಳ  ಒಂದು  ಮುಖ್ಯ ಭಾಗವಾಗಿತ್ತು. ರೈಲ್ವೆಯಲ್ಲಿ ನಡೆಯುವ  ಗಂಭೀರ ಅಪರಾಧಗಳನ್ನು ಪರಿಣಾಮಕಾರಿಯಾಗಿ ನಿಭಾಯಿಸಲು  ಈ ಪ್ರಕ್ರಿಯೆಗಳನ್ನು  ಸುವ್ಯವಸ್ಥಿತಗೊಳಿಸುವ ಅಗತ್ಯವನ್ನು ಇದು  ಸ್ಪಷ್ಟಪಡಿಸಿದೆ. ಹೊಸ ಕ್ರಿಮಿನಲ್ ಕಾನೂನುಗಳ ಅನುಷ್ಠಾನವು  ಹೆಚ್ಚಿನ ಒತ್ತು ಪಡೆಯಿತು.  ಝೀರೋ FIRಗಳನ್ನು  ಸಮರ್ಥವಾಗಿ ನಿರ್ವಹಿಸುವ  ಮತ್ತು  e-FIR ವ್ಯವಸ್ಥೆಗಳನ್ನು  ಸಂಯೋಜಿಸುವ  ಮಹತ್ವವನ್ನು  ಎತ್ತಿ ತೋರಿಸಲಾಯಿತು. ಇದು  ವೇಗವಾಗಿ ಅಪರಾಧ ವರದಿ ಮಾಡಲು,  ಸಾಕ್ಷ್ಯಗಳ  ನಿರ್ವಹಣೆಯನ್ನು  ಸುಧಾರಿಸಲು  ಮತ್ತು  ರಾಜ್ಯಗಳಲ್ಲಿ  ಪರಿಣಾಮಕಾರಿ ತನಿಖೆ ನಡೆಸಲು  ಸಹಾಯ ಮಾಡುತ್ತದೆ.

GRP ಮಾನವಶಕ್ತಿ ಮತ್ತು ಮೂಲಸೌಕರ್ಯ

ರೈಲ್ವೆಗಳ ವಿವಿಧ ಮೂಲಭೂತ ಸೌಕರ್ಯ ಮತ್ತು ಮಾನವ ಸಂಪನ್ಮೂಲ ಸಂಬಂಧಿತ ವಿಷಯಗಳ ಕುರಿತು  ಸಮಗ್ರ ಚರ್ಚೆ  ನಡೆಯಿತು. ವೈವಿಧ್ಯಮಯ ಭೌಗೋಳಿಕ ಪರಿಸ್ಥಿತಿಗಳು ಮತ್ತು ರೈಲ್ವೆ ಕಾರ್ಯಾಚರಣೆಗಳ  ಜಟಿಲತೆಯನ್ನು  ಗಣನೆಗೆ ತೆಗೆದುಕೊಂಡು  GFP ಯ  ಮಾನವ ಸಂಪನ್ಮೂಲ ಮತ್ತು ಮೂಲಭೂತ ಸೌಕರ್ಯಗಳ ಅಗತ್ಯಗಳನ್ನು ನಿರ್ಧರಿಸಲು ಏಕರೂಪದ ಮಾನದಂಡಗಳನ್ನು ರೂಪಿಸುವ ಸಾಧ್ಯತೆಯನ್ನು ಭಾಗವಹಿಸಿದವರು ಪರಿಶೋಧಿಸಿದರು. ಈ ಮಾನದಂಡಗಳನ್ನು  ನಿಗದಿತ ಸಮಯದೊಳಗೆ  ನಿರ್ಧರಿಸಲು  ಒಂದು ಸಮಿತಿಯನ್ನು  ರಚಿಸಲಾಗಿದೆ.  ಭಾರತದ  ವಿಶಾಲ ರೈಲ್ವೆ ಜಾಲದ  ಭದ್ರತಾ ಬೇಡಿಕೆಗಳನ್ನು  ಪೂರೈಸಲು  ವ್ಯವಸ್ಥಿತ,  ಹೊಂದಿಕೊಳ್ಳುವ ಚೌಕಟ್ಟಿನ ಅಗತ್ಯವನ್ನು  ಈ ಅಧಿವೇಶನವು  ಬಲವಾಗಿ  ಒತ್ತಿ ಹೇಳಿತು.

ತಮ್ಮ  ಮುಕ್ತಾಯದ  ಮಾತುಗಳಲ್ಲಿ,  RPF  ಮಹಾನಿರ್ದೇಶಕ  ಶ್ರೀ ಮನೋಜ್ ಯಾದವ್  ಅವರು  ಸಮ್ಮೇಳನದಲ್ಲಿ  ಕಂಡುಬಂದ ಸಹಭಾಗಿತ್ವದ  ಮನೋಭಾವವನ್ನು  ಮೆಚ್ಚುಗೆಯಿಂದ  ಸ್ಮರಿಸುತ್ತಾ,  "ಈ ಸಮ್ಮೇಳನವು  ರೈಲ್ವೆ  ಭದ್ರತೆಯನ್ನು  ಬಲಪಡಿಸುವ  ನಮ್ಮ ಸಾಮೂಹಿಕ ಸಂಕಲ್ಪವನ್ನು ಮತ್ತಷ್ಟು ದೃಢಪಡಿಸಿದೆ. ಮಾನವ ಸಂಪನ್ಮೂಲಕ್ಕೆ ಸಂಬಂಧಿಸಿದ ಸವಾಲುಗಳನ್ನು ಎದುರಿಸುವ ಮೂಲಕ, ನಮ್ಮ ವ್ಯವಸ್ಥೆಗಳನ್ನು ಆಧುನೀಕರಿಸುವ ಮೂಲಕ ಮತ್ತು  ಅಪರಾಧಗಳಿಗೆ  ಪ್ರತಿಕ್ರಿಯಿಸುವ  ನಮ್ಮ  ಯಾಂತ್ರಿಕ ವ್ಯವಸ್ಥೆಯನ್ನು ಸುಧಾರಿಸುವ  ಮೂಲಕ,  ಲಕ್ಷಾಂತರ  ಪ್ರಯಾಣಿಕರಿಗೆ  ಸುರಕ್ಷಿತ  ಪ್ರಯಾಣವನ್ನು  ಖಚಿತಪಡಿಸಿಕೊಳ್ಳುವ  ನಿಟ್ಟಿನಲ್ಲಿ ನಾವು  ನಿರ್ಣಾಯಕ ಹೆಜ್ಜೆಗಳನ್ನು  ಇಡುತ್ತಿದ್ದೇವೆ.  ಈ  ಪ್ರಯಾಣದಲ್ಲಿ  ರಾಜ್ಯ  GRPಗಳ  ಪಾತ್ರ  ಮತ್ತು  ಭಾರತೀಯ  ರೈಲ್ವೆಯೊಂದಿಗಿನ ಅವರ  ಸಹಭಾಗಿತ್ವವು ಅತ್ಯಂತ ಮಹತ್ವದ್ದಾಗಿದೆ ಮತ್ತು ರೈಲ್ವೆ  ಸುರಕ್ಷತೆಗಾಗಿ  ನಾವು  ಒಟ್ಟಾಗಿ  ಹೊಸ  ಮಾನದಂಡಗಳನ್ನು  ನಿರ್ಮಿಸುವುದನ್ನು  ಮುಂದುವರಿಸಬೇಕು"  ಎಂದು  ಹೇಳಿದರು.

ಸಮ್ಮೇಳನವು ಭವಿಷ್ಯದ ಸಾಧ್ಯತೆಗಳತ್ತ ನೋಟ ಬೀರುವ ಮೂಲಕ ಮುಕ್ತಾಯಗೊಂಡಿತು. ಭಾಗವಹಿಸಿದವರು ಕಾರ್ಯಗತಗೊಳಿಸಬಹುದಾದ ಪರಿಹಾರಗಳ ಕುರಿತು ಒಮ್ಮತಕ್ಕೆ ಬಂದರು.  ಇವುಗಳಲ್ಲಿ ಮುಂದುವರಿದ ತಂತ್ರಜ್ಞಾನಗಳನ್ನು ಅಳವಡಿಸಿಕೊಳ್ಳುವುದು,  ಹಿತ  ಆಸಕ್ತ  ಪಕ್ಷಗಳ  ನಡುವೆ  ಹೆಚ್ಚಿನ  ಸಮನ್ವಯ  ಮತ್ತು  ಪ್ರಯಾಣಿಕರ  ಸುರಕ್ಷತೆಯ  ಮೇಲೆ  ಪ್ರಮುಖ ಆದ್ಯತೆಯಾಗಿ  ಒತ್ತು  ನೀಡುವುದು  ಒಳಗೊಂಡಿವೆ.

 

*****

(Release ID: 2085939) Visitor Counter : 11