نوجوانوں کے امور اور کھیلوں نیز محنت اور روزگار  کے مرکزی وزیر ڈاکٹر منسکھ مانڈویہ آج صبح دو روزہ دورے پر ناگالینڈ پہنچے۔

دیما پور ہوائی اڈے پر ان کی آمد پر، ایم ایل اے اور مشیر برائے ہنر مندی، روزگار اور ایکسائز اور یوتھ ریسورسز اینڈ اسپورٹس مواتوشی لونگکو میر نے ان کا پرتپاک خیرمقدم کیا۔

ڈاکٹر مانڈویہ بعد میں ایک ہیلی کاپٹر کے ذریعے ریاستی راجدھانی کوہیما روانہ ہوگئے جہاں انہوں نے دوپہر کو کوہیما راج بھون میں ناگالینڈ کے گورنر لا گنیشن سے ملاقات کی۔

بعد ازاں، کوہیما میں اندرا گاندھی اسٹیڈیم میں محکمہ برائے محنت اور روزگار اور نوجوانوں کے وسائل اور کھیلوں کے محکمے کے افسران سے خطاب کرتے ہوئے ڈاکٹر منسکھ مانڈویہ نے کہا کہ وزیر اعظم نریندر مودی کی قیادت میں بھارت کھیلوں کے شعبے میں غیر معمولی تبدیلی کا مشاہدہ کررہا ہے۔

انہوں نے کہا کہ پہلے کے مقابلے میں، جب حکومتیں کھیلوں پر بہت کم توجہ دیتی تھیں، موجودہ حکومت کھیلوں اور گیمز کو ہر سطح پر فروغ دینے کی کوشش کر رہی ہے اور یہ یقینی بنا رہی ہے کہ ان کے فوائد ملک کے ہر شہری تک پہنچیں۔

مرکزی وزیر نے مودی حکومت کی کھیلوں کی ترقی کی مختلف اسکیموں، جیسے کھیلو انڈیا اسکیم، ٹارگٹ اولمپک پوڈیم اسکیم (ٹوپس)، کیرتی پروجیکٹ، فٹ انڈیا موومنٹ، اور نیشنل اسپورٹس ریپوزیٹری سسٹم (این ایس آر ایس) وغیرہ کی مثالیں پیش کیں۔

ہارن بل فیسٹیول کے اس سال کے ایڈیشن میں مدعو کرنے پر ناگالینڈ حکومت کا شکریہ ادا کرتے ہوئے ڈاکٹر منسکھ مانڈویہ نے کہا کہ یہ فیسٹیول وزیر اعظم نریندر مودی کے "ایک بھارت شریشٹھ بھارت" کے تصور کی حقیقی عکاسی کرتا ہے۔

اس پروگرام میں دیگر کے علاوہ ناگالینڈ کے وزیر اعلیٰ کے مشیر اور ناگالینڈ اولمپکس ایسوسی ایشن کے سکریٹری جنرل، ابو میتھا اور حکومتِ ناگالینڈ کے نوجوانوں کے وسائل اور کھیلوں کے محکمے کے مشیر، ایس کیوشو یمکھونگ بھی شریک تھے۔

اندرا گاندھی اسٹیڈیم پہنچنے کے بعد، ڈاکٹر مانڈویہ نے مائی بھارت یوتھ رضاکاروں کے ساتھ اسٹیڈیم کے احاطے میں "ایک پیڑ ماں کے نام" مہم کے تحت پودے بھی لگائے۔

 دورے پر آئے ہوئے وزیر موصوف کل ہارن بل فیسٹیول میں شرکت کریں گے اور کوہیما میں اہم مقامات کا دورہ کریں گے، جن میں دولتِ مشترکہ وار سیمیٹری بھی شامل ہے۔

******

ش ح ۔   م  ع ۔  م  ص

 (U: 3621)

(Release ID: 2082006) Visitor Counter : 17