பிரதமரின் கிசான்  திட்டம் என்பது நிலம் வைத்திருக்கும் விவசாயிகளின் நிதித் தேவைகளை பூர்த்தி செய்வதற்காக பிரதமரால் பிப்ரவரி 2019 இல் தொடங்கப்பட்ட ஒரு மத்திய துறை திட்டமாகும். இந்தத் திட்டத்தின் கீழ், ஒவ்வொரு நான்கு மாதங்களுக்கும் மூன்று சம தவணைகளில் ஆண்டுக்கு ரூ .6,000 / - நிதி, நேரடி பணப்பயன் பரிமாற்றம்  முறையில் நாடு முழுவதும் உள்ள விவசாய குடும்பங்களின் வங்கிக் கணக்குகளுக்கு மாற்றப்படுகிறது. இந்தத் திட்டம் உலகின் மிகப்பெரிய நேரடி பயன்  திட்டங்களில் ஒன்றாகும்.

விவசாயிகளை மையமாகக் கொண்ட டிஜிட்டல் உள்கட்டமைப்பு இடைத்தரகர்களின் எந்த ஈடுபாடும் இல்லாமல் திட்டத்தின் பலன்கள் நாடு முழுவதும் உள்ள அனைத்து விவசாயிகளையும் சென்றடைவதை உறுதி செய்துள்ளது. பயனாளிகளை பதிவு செய்வதிலும் சரிபார்ப்பதிலும் முழுமையான வெளிப்படைத்தன்மை பராமரிக்கப்படுகிறது. மத்திய அரசு இதுவரை 18 தவணைகளில் ரூ .3.46 லட்சம் கோடிக்கு மேல் வழங்கியுள்ளது.

பிரதமரின் கிசான் திட்டத்தின் பலன்களை அனைத்து மாநில விவசாயிகளும் பெற்று வருகின்றனர்.

பிரதமரின் கிசான்  போர்ட்டலில் மாநிலங்கள்/யூனியன் பிரதேசங்களிலிருந்து பெறப்பட்ட சரிபார்க்கப்பட்ட தரவுகளின் அடிப்படையில், திட்டத்தின் பலன்கள் நேரடி பலன் பரிமாற்றம்  முறையில் பயனாளிகளுக்கு மாற்றப்படுகின்றன. இந்தத் திட்டம் ஆரம்பத்தில் ஒரு நம்பிக்கை அடிப்படையிலான அமைப்பில் தொடங்கியது. அங்கு பயனாளிகள் சுய சான்றிதழ் அடிப்படையில் மாநிலங்களால் பதிவு செய்யப்பட்டனர். ஆரம்பத்தில், சில மாநிலங்களில் ஆதார் இணைப்பு நிபந்தனை  தளர்த்தப்பட்டது.  பின்னர், இதை நிவர்த்தி செய்ய,  பல தொழில்நுட்ப தலையீடுகள் அறிமுகப்படுத்தப்பட்டன. மேலும், ஆதார் அடிப்படையிலான பணம் செலுத்துதல் மற்றும் இ-கேஒய்சி ஆகியவற்றுடன் நில இணைப்பும் கட்டாயமாக்கப்பட்டது. இந்த நிபந்தனைகளை பூர்த்தி செய்யாத விவசாயிகளின் சலுகைகள் நிறுத்தப்பட்டன. இந்த விவசாயிகள் தங்கள் கட்டாயத் தேவைகளை நிறைவு செய்யும்போது, அவர்கள் தங்கள் உரிய தவணைகளுடன் திட்டத்தின் பலன்களைப் பெறுவார்கள்.

 

வருமான வரி செலுத்துவோர், உயர் வருவாய் பிரிவினர், அரசு ஊழியர்கள் போன்ற தகுதியற்ற விவசாயிகளிடமிருந்து தொகை வசூலிப்பு சம்பந்தப்பட்ட மாநில அரசுகளால் தொடங்கப்பட்டுள்ளது. நாடு முழுவதும் இதுவரை தகுதியற்ற பயனாளிகளிடமிருந்து மொத்தம் ரூ.335 கோடி வசூலிக்கப்பட்டுள்ளது.

மக்களவையில் இன்று கேள்வி ஒன்றுக்கு எழுத்து மூலம் அளித்த பதிலில் மத்திய வேளாண் மற்றும் விவசாயிகள் நலத்துறை இணையமைச்சர் திரு. பகீரத் சவுத்ரி இந்தத் தகவலைத் தெரிவித்தார்.

***

KPV/DL

 

(Release ID: 2080402) Visitor Counter : 38