#IFFIWood, 27 नोव्‍हेंबर 2024

 

भारतीय पॅनोरमा विभागांत रावसाहेब (मराठी) आनी श्रीकांत (हिंदी) ह्या दोन प्रभावी चित्रपटांक लागून भारताच्या 55व्या आंतरराष्ट्रीय चित्रपट महोत्सवाक व्हड प्रतिसाद मेळ्ळो. दोगांयनी आपल्या आकर्शक कथन आनी खाशेल्या अंदाजान  प्रेक्षकांक मोहित केले

राष्ट्रीय पुरस्कार फावो जाल्लो चित्रपट निर्मातो निखिल महाजन हाणें दिग्दर्शित केल्लो रावसाहेब मनीस-जनावर संघर्शाच्या गंभीर प्रस्नाचेर उजवाड घालता. इफफींत पत्रकारांक संबोधीत करतना महाजनान म्हणलें, रावसाहेब फकत एक सिनेमा न्हय; हें वास्तव जगांतल्या संकश्टाचें प्रतिबिंब. आमी थ्रिलर फॉर्मेटांतल्यान ह्या मुद्द्याक तात्काळपण जोडपाक सोदताले आनी व्हडलें संवाद सुरू करतना प्रेक्षकांक गुंतवपाक सोदताले.” अंदूंच्या गोल्डन पीकॅक पुरस्कारा खातीरय ह्या सिनेमाची सर्त आसा.

महाराष्ट्रांतल्या ताडोबा टायगर रिझर्व्हच्या धोक्याच्या फाटभुंयेर घडिल्ल्या ह्या चित्रपटांत मनीसपण आनी सैम हांचे मदलो नाजूक समतोल दाखोवपा खातीर पर्यावरणीय थ्रिलर कथन वापरला. केंद्रीय पात्र म्हूण रानाची भुमिका भासाभास करतना महाजनान म्हणलें, “हें चित्रपट खऱ्या रानांत, महाराष्ट्रांतल्या चंद्रपूरांतल्या ताडोबा टायगर रिझर्व्हांत शुटींग केल्लें, देखून चित्रपटाच्या सेटिंगाक प्रामाणीकपण मेळटा. रानांत सगळेकडेन वाग आशिल्ले आनी व्हडल्या पंगडा वांगडा गोळीबार करप हो धोक्याची वाठार आशिल्लो, देखून प्रामाणीकपणान सांगपाचें जाल्यार थंय गोळीबार करप हेंय सगळ्यांत कठीण आव्हान आशिल्लें. आमी रानाचें चित्रण अशें केलें की तें काणयेचो एक अभिन्न वाटो  जालो.

“आमी फकत एकाच देखाव्यांत वाग दाखोवंक शकले, तरी लेगीत ताच्या हाजिरेची सतत जाणविकाय निर्माण करची पडली. ध्वनी रचना आनी दृश्य घटकां वरवीं आमी ताण आनी सस्पेन्साचें वातावरण तयार केलें.

महाराष्ट्राच्या विदर्भांतल्या मनीस-रानवटी जनावरांच्या संघर्शाचेर दोन वर्सांच्या व्हड संशोधनाचेर आदारून हो चित्रपट खऱ्या घडणुकां वयल्यान घडला. रावसाहेब ह्या विशयाचेर पक्षपात करिनासतना जायते विषय  मांडटा. मनीस आनी सैम हांचे मदल्या सहअस्तित्वाची गरज आनी समतोल संबंद हांचेर भर दिवन हो विशय वास्तववादी आनी वस्तुनिश्ठपणान मांडप हो आमचो हेत आशिल्लो अशें महाजन हांणी स्पश्ट केलें.

आयज इफ्फींत प्रदर्शीत जाल्लो आनीक एक चित्रपट ‘श्रीकांत’ हो लवचीकपण आनी आशेचो प्रवास. नदरेक अपंगत्व आशिल्लो वेवसायीक आनी बोलांत इंडस्ट्रीजचो संस्थापक श्रीकांत बोल्ला हाच्या जिविताचेर आदारिल्लो हो हिंदी चित्रपट मनशाच्या भावनांची  आनी निश्चयाची प्रेरणादायक गवाय. तुशर हिरानंदानी हाणें दिग्दर्शीत केल्ल्या आनी निधी हिरानंदनी हाणें तयार केल्ल्या ह्या चित्रपटांत विनोद आनी नाटकाचे घटक एकठांय करून श्रीकांताच्या समाजीक मर्यादां आड जाल्ले संघर्श आनी जैतांचें चित्रण केलां. तशेंच ह्या वर्सा आयसीएफटी युनेस्को गांधी पदका खातीरय हो  सिनेमा  सर्तीत आसा.

पत्रकार परिशदेंत उलयतना निधी हिरानंदनी हांणी जिद्दीची सार्वत्रिक कथा अशें ह्या चित्रपटाचे वर्णन केलें. “समाजांत घाल्लीं आडमेळीं मोडून, समकक्ष म्हणून पळोवपाक आनी प्रामाणीक जिवीत जगपाक मनशाचो संघर्श. महामारीच्या आव्हानां वयल्यान आमी भायर सरतना आशा आनी विस्वास परतून हाडपी काणी सांगप म्हत्वाचें अशें आमकां दिसलें. 

‘सांद की आंख’ सारक्या चित्रपटांक लागून नामना मेळिल्ल्या दिग्दर्शक तुशहर हिरानंदनीन इफ्फींत परत येवपाक मेळ्ळे म्हूण  उमेद उक्तायली. “श्रीकांताची ही काणी फकत दिव्यांगत्व आशिल्ल्या व्यक्तीं खातीर न्हय, तर आपल्या सपनांचो फाटलाव करपी कोणाकूय एक प्रेरणा आसा. आमी ताका एक रिलेटेबल मनीस म्हणून चित्रीत केलो, ताचे संघर्श आनी अपेसाचे खीण लेगीत दाखयले, जाका लागून कथनाक प्रामाणीकपण येता. " .

श्रीकांताक लवचीकपण आनी निर्धाराचें प्रतीक म्हणून सादर करून हो चित्रपट नदरेक अपंगत्व आशिल्ल्यां विशीं पूर्वकल्पीत गजालीक  आव्हान दिता, “हो फकत दिव्यांगत्त्वाचेर न्हय तर मनीसपणाच्या आत्म्या विशींचो चित्रपट” अशें तुषार हिरानंदनी हांणी जोडलें.

रावसाहेब आनी श्रीकांत ह्या दोगांयनी बदलाची प्रेरणा दितनाच गंभीर समाजीक आनी पर्यावरणीय प्रस्नांक फुडो करपी कथा सांगपाची तांक दाखयल्या. 

पत्रकार परिशद पळयात हांगा:

 

* * *

PIB IFFI CAST AND CREW | Subhash/Manali/Darshana | IFFI 55

(रिलीज़ आईडी: 2078812) आगंतुक पटल : 47