म्हायती आनी वितरावणी मंत्रालय
55व्या भारतीय आंतरराष्ट्रीय चित्रपट महोत्सवांत नवज्योत बांदिवडेकर हांका ‘घरात गणपती’ ह्या मराठी फिल्मा खातीर भारतीय फीचर फिल्माचो ‘बेस्ट डेब्यू डायरेक्टर’ पुरस्कार फावो जालो
बांदिवडेकरान कुटुंबीक बंधनांची गुंतागुंत कुशळटायेन धरल्या, मार्मिक भावनिक अनुनाद हाका लागून चित्रपट पयलेच खेपे उल्लेखनीय थारता: जूरी
#IFFIWood, 28 नोव्हेंबर 2024
55व्या भारतीय आंतरराष्ट्रीय चित्रपट महोत्सव 2024त नवज्योत बांदिवडेकर हांका ‘घरात गणपती’ ह्या मराठी फिल्मा खातीर भारतीय फीचर फिल्माचो ‘बेस्ट डेब्यू डायरेक्टर’ पुरस्कार फावो जालो. बांदिवडेकराच्या दिग्दर्शनाच्या पदार्पणाच्या परिणामाचेर हो पुरस्कार भर दिता आनी ताका चित्रपट मळार एक नवी पिळगी प्रतिभावान दिग्दर्शक म्हणून पळयता.
भारतीय सिनेमाच्या विकासांत तरणाट्या प्रतिभेन दिल्ल्या योगदानाची वळख करून दिवन भारतभरांतल्या तरणाट्या चित्रपट निर्मितीच्या प्रतिभेक प्रोत्साहन दिवपा खातीर राष्ट्रीय चित्रपट विकास म्हामंडळ, म्हायती आनी प्रसारण मंत्रालयान इफ्फीच्या ह्या अंदूच्या आवृत्ती खातीर भारतीय फिचर फिल्माचो उत्कृश्ट पदार्पण दिग्दर्शक पुरस्कार नव्यान स्थापन केला.
55व्या इफफी 2024 च्या समारोप सुवाळ्या वेळार प्रमाणपत्र आनी पांच लाख रुपया रोख इनाम आशिल्लो हो पुरस्कार नवज्योत बांदिवाडेकाराक ताच्या मराठी फिल्म ‘घरात गणपती’ वरवीं ताणें केल्ल्या सशक्त कथाकथना खातीर भेटयलो.
परंपरा आनी आधुनीक संवेदना हांचो मेळ घालपी हृदयस्पर्शी कथा सादर करपाची तांक आशिल्ल्यान दिग्दर्शक म्हणून बांदिवडेकराची तोखणाय समीक्षकांनी केली. ‘बांदिवडेकरान कुटुंबीक बंधनांची गुंतागुंत कुशळटायेन धरल्या. कुटुंबाच्या जिणेंतल्या सूक्ष्मतायेचेर भर दितनाच मार्मिक भावनेकताय तिगोवन दवरल्या, ताका लागून पयल्या यत्नांत हो चित्रपट हिट जाला,” अशी जूरीन तोखणाय केली.
पूर्वावलोकन समितीन शिफारस केल्ल्या पांचूय चित्रपटांचें नियाळ घेतले उपरांत जूरीन एकमतान बांदिवडेकराक ताच्या अपवादात्मक वावराक लागून वेंचून काडलो. ‘घरात गणपती’ची कुशळटायेन रचणूक केल्ले कथानक आनी घटमूट सादरीकरणाविशी जूरीन आपल्या उल्लेखांत तोखणाय केल्या. वेगवेगळ्या पिळग्यां मदीं ल्हान ल्हान फरक आसून लेगीत कुटुंबांतलो एकचार प्रभावीपणान दाखयला अशें जूरीन तोखणायेंत नमूद केलां.
उत्कृश्ट पदार्पण दिग्दर्शक वर्गा खातीर जूरींत श्री संतोष सिवान (अध्यक्ष), सिनेमाटोग्राफर आनी दिग्दर्शक; श्री. सुनील पुराणीक, अभिनेतो, दिग्दर्शक आनी निर्मातो; श्री. शेखर दास, फिल्म दिग्दर्शक आनी पटकथा लेखक; श्री. एम.व्ही.रघु, सिनेमाटोग्राफर आनी दिग्दर्शक; श्री. विनीत कानोजिया, फिल्म निर्मातो, लेखक आनी संपादक हांचो आस्पाव आसलो .
भारताच्या सगळ्या चित्रपट आनी कला समाजांतल्या नामनेच्या वेवसायिकांचो आस्पाव आशिल्ले पूर्वावलोकन समितीन 117 पात्र नोंदीं मदल्यान पांच चित्रपटांची निवड केली. ‘बेस्ट डेब्यू डायरेक्टर ऑफ इंडियन फिचर फिल्म’ वर्गा खातीर सर्त केल्लीं फिल्मां पळयात.
“घरात गणपती वेगवेगळ्या सुखी तशेंच अराजक परिस्थितींतल्यान सगळ्या कुटुंबांतल्या वांगड्यांचे परस्पर संबंद चित्रित करता,” अशें नवज्योत बांदिवडेकर हांणी कांय दिसां आदीं गोंयांतल्या इफ्फी मजगती पीआयबीन आयोजीत केल्ले पत्रकार परिशदे वेळार सांगले.
* * *
PIB IFFI CAST AND CREW | Subhash/Utkarsha/Darshana | IFFI 55
(Release ID: 2078805)
Visitor Counter : 4