நாடு முழுவதும் விளையாட்டில் மக்கள் பங்கேற்றல் மற்றும்  விளையாட்டு திறமையை ஊக்குவித்தல் என்ற இரட்டை நோக்கங்களுடன் 2016-17-ம் ஆண்டில் 'கேலோ இந்தியா – தேசிய விளையாட்டு மேம்பாட்டுத் திட்டம்' தொடங்கப்பட்டது. இந்த திட்டம் 2017-18 முதல் 2019-20 வரை மூன்று ஆண்டுகளுக்கு ரூ .1756 கோடி நிதி ஒதுக்கீட்டில் சீரமைக்கப்பட்டு ஒப்புதல் அளிக்கப்பட்டது.

இந்த திட்டம் ரூ .328.77 கோடி பட்ஜெட்டில் 2020-21 வரை ஒரு வருடத்திற்கு இடைக்கால நீட்டிப்பைப் பெற்றது, மேலும் ரூ .3790.50 கோடி நிதி ஒதுக்கீட்டில் 2021-22 முதல் 2025-26 வரை கூடுதலாக ஐந்து ஆண்டுகளுக்கு மீண்டும் திருத்தப்பட்டு நீட்டிக்கப்பட்டுள்ளது.

பல்வேறு மாநில அரசுகளுடன் இணைந்து நாடு முழுவதும் விளையாட்டு வளர்ச்சியில், கேலோ இந்தியா திட்டம் குறிப்பிடத்தக்க பங்களிப்பை அளித்துள்ளது. ரூ.3073.97 கோடி செலவில் 323 புதிய விளையாட்டு உள்கட்டமைப்பு திட்டங்களுக்கு ஒப்புதல் அளித்ததுடன், குழந்தைகளுக்கு பயிற்சி அளித்தல், முன்னாள் விளையாட்டு வீரர்களுக்கு ஆதரவளித்தல் மற்றும் அடிமட்ட விளையாட்டு உள்கட்டமைப்பை மேம்படுத்துதல் ஆகியவற்றை நோக்கமாகக் கொண்ட 1041 கேலோ இந்தியா மையங்களை (கே.ஐ.சி) நிறுவியது ஆகியவை, முக்கிய சாதனைகளில் அடங்கும்.

கூடுதலாக, 32 கேலோ இந்தியா மாநில சிறப்பு மையங்கள் (KISCEs) அறிவிக்கப்பட்டுள்ளன, மேலும் 301 அகாடமிகள் அங்கீகாரம் பெற்றுள்ளன. கேலோ இந்தியா திட்டத்தின் கீழ் வழங்கப்படும் விளையாட்டு வசதிகளை நாட்டின் அனைத்து குடிமக்களுக்கும் பயன்படுத்திக் கொள்ளலாம்.இன்றைய தேதியில் 2781 கேலோ இந்தியா தடகள வீரர்களுக்குப் பயிற்சி, உபகரணங்கள், மருத்துவ கவனிப்பு மற்றும் மாதாந்திர சில்லறை செலவுத் தொகை  (OPA) ஆகியவை வழங்கப்படுகின்றன.

விளையாட்டு மேம்பாட்டுக்கான சம வாய்ப்புகளை உறுதி செய்யும் வகையில், நாட்டின் கிராமப்புற மற்றும் நகர்ப்புறப் பகுதிகளில் கேலோ இந்தியா திட்டம் செயல்படுத்தப்படுகிறது.

மாநிலங்களவையில் இன்று கேள்வி ஒன்றுக்கு எழுத்து மூலம் அளித்த பதிலில், மத்திய இளைஞர் நலன் மற்றும் விளையாட்டுத் துறை அமைச்சர் டாக்டர் மன்சுக் மாண்டவியா இந்தத் தகவலைத் தெரிவித்துள்ளார்.

***

TS/MM/AG/DL

(Release ID: 2078720) Visitor Counter : 6