শক্নাইরবশিং,

খুরুমজরি!

ঙসিগী সেসনগী পান্দম অসি য়াম্না চুনৈ অমসুং তুংগী মীরোলগী তুংলমচৎকা য়াম্না মরী লৈনৈ। নিউ দিল্লি জি-২০ মীফম মনুংদা, এস.দি.জিশিং ফংবা য়াংশিন্নবা ঐখোয়না বারানসী এক্সন প্লান চৎনখ্রে।

ব্রাজিলনা প্রসিদেন্ত ওইবা মখাদা ২০৩০ ফাওবগী মনুংদা রিন্যুএবল ইনর্জি পুথোকপা শরুক অহুম হেনগৎনবা অমসুং ইনর্জি লিক্না শীজিন্নবা শরুক অনি হেনগৎনবা ঐখোয়না ৱারেপ লৌরে অমসুং হায়রিবা পান্দমশিং অসি ফংনবা মরুওইবা থবকশিং পায়খৎলে অমসুং মসি ঐখোয়না তরাম্না ওক্লি।

হিরম অসিগী মতাংদা, স্তেনেবল দিবলপমেন্ত এজেন্দা ফংনবা ভারতকী থবকশিং অদোমগী মফমদা খঙহনবা ঐনা পাম্মী। হৌখিবা চহি ১০ দা ঐখোয়না ইমুং মিল্লিয়ন ৪০ হেনবগী য়ুমশিং শাখ্রে।

হৌখিবা চহি ৫ দা, ইমুং মিল্লিয়ন ১২০ হেনবদা অফবা থক্নবা ঈশিং ফংহনখ্রে। ইমুং মিল্লিয়ন ১০০ হেনবদা মৈখু চেন্দবা চাক থোংনবা গ্যাস ফংহল্লে অমসুং ইমুং মিল্লিয়ন ১১৫ হেনবদা তোইলেতশিং শারে।

মরুপশিং,

ঐখোয়গী থবকশিং অসি চাউখৎপা অমসুং থোং মান্নবদা য়ুম্ফম ওইবা ভারতকী মমাংঙৈগী ৱাখল্লোন্দা য়ু্ফম ওইবনি। পৃথিবী অসি ইমানি হায়না খনবা, তুরেলশিংনা থৱায় হাপ্লি হায়না খনবা অমসুং উ পাম্বীশিং ঈশ্বরগুম্বনি হায়না খনবা ঐখোয়গী থাজনবী অমা লৈরি।

মহৌশাগী অকোয়বগী ফিবম ঙাক-শেনবা অসি ঐখোয়গী তৌফম থোকপা থৌদাংনি হায়না ঐখোয়না থাজৈ। হান্না থানখিবা মতমদগী ঙনখৎনা, পেরিস এগ্রিমেন্তগী মখাদা লৈবাক অসিগী পাংথোক্কনি হায়খিবা থবকশিং পাংথোকপা অহানবা জি-২০ লৈবাক ভারতনা ওইরে।

হৌজিক ঐখোয় অচৌবা পান্দমশিং ফংনবা মাইকৈদা য়াংনা চঙশিল্লি। ২০৩০ ফাওবগী মনুংদা রিন্যুএবল ইনর্জি গিগাৱাত ৫০০ পুথোক্নবা ঐখোয়না পান্দম থম্লি। ঐখোয়না মাংজৌননা গিগাৱাত ২০০ পুথোকপা ঙম্লে।

ঐখোয়গী মীয়ামগী ইহৌ অমা ওইনা গ্রিন ত্রান্সসিসন অমা পুরক্লে। মালেমদা খ্বাইদগী চাউবা য়ুমথক্তা সোলার পেনেল থম্নবগী থৌরম অমগীদমক চাউরাক্না ইমুং মিল্লিয়ন ১০ রোম রেজিস্তার তৌরে।

ঐখোয়না ঐখোয় ইশা খক্তগী খন্দে। ঐখোয়না মীওইবা খুন্নাইগী য়াইফনবা খল্লি। মালেমগী থাক্তা তুংকোইনা চৎনবা য়াবা পুন্সি মহিং অমা য়োকখৎনবা, ঐখোয়না মিসন লাইফ নত্ত্রগা লাইফস্তাইল ফোর ইনভাইরোনমেন্ত হৌদোক্লে। চীঞ্জাক মাংহনবনা কার্বোন পুথোকপা হেনগৎহনবদা নত্তনা, চাবা ফংদবদগী চারা হেনবশু হেনগৎহল্লি। হিরম অসিদশু ঐখোয়না থবক পায়খৎলে।

ঐখোয়না ইন্তরনেসনেল সোলার এল্লাইন্স হৌদোক্লে। মসিদা লৈবাক ১০০ হেন্না শরুক য়ারে। “নুমিৎ অমা মালেম অমা গ্রিত অমা” থৌরাংগী মখাদা ইনর্জি পীথোক-পীশিন তৌনবদা ঐখোয়না মতেং পাংলি।

ভারতনা গ্রিন হায়দ্রোজেন ইন্নোবেসন সেন্তর অমা অমসুং গ্লোবেল বাইওফ্যুএল এল্লাইন্স লিংখৎলে। ঐখোয়না ভারত্তা অমোৎপদগী ইনর্জি পুথোক্নবা খোঙজং অমশু পায়খৎলি। ক্রিতিকেল মিনরেলশিংগা মরী লৈনবা খুদোংচাদবশিং কোকহন্নবা ঐখোয়না সর্কুলার এপ্রোচ অমদা মীৎয়েং চঙলে।

এক পের মা কে নামগী মখাদা, চহি অসিদা ঐখোয়না ভারত্তা উ পাম্বী বিল্লিয়ন অমা থারে। ভারতনা কোলিএসন ফোর দিজাস্তর রেসিলিয়েন্ত ইনফ্রাস্ত্রকচর হৌদোক্লে। থবক অসিগী মখাদা, অমা-অতা থোকখ্রবা মতুংদা শেমজিন-শাজিনবদা ঐখোয়না মীৎয়েং চঙলে।

মরুপশিং,

গ্লোবেল সাউথকী লৈবাকশিং অমসুং মরুওইনা চাউখৎলক্লিবা অপীকপা ইথৎ লৈবাকশিংগী শেন-থুমগী ফিবম ফগৎহনবা অসি মরুওইবা অমনি। দিজিতেলগী যুগ অমদা অমসুং এ.আইগী ইথিল হেনগৎলক্লিবা অসিদা, থোং মান্নবা অমসুং চুনবা ইনর্জি য়ানশিন্নবা অসি হেন্না মরুওইবনি।

মরম অদুনা, গ্লোবে সাউথতা ইনর্জিগী অওনবা পুরক্নবা মমল হোংবা অমসুং থাজবা য়ারবা ক্লাইমেত ফাইনান্স অসি অমুক্কা হেন্না মরুওইরে। মতম চানা চাউখৎলবা লৈবাকশিংনা তেক্নোলোজি অমসুং শেনফম পীনবা মখোয়গী থাজবশিং থবক ওইনা পাংথোকপা অসিশু তঙাইফদবনি।

গ্লোবেল সাউথ য়াওনা মরুপ-মপাং ওইরিবা লৈবাকশিংদা লৈবাক অসিগী মাইপাক্লবা থবকশিং ভারতনা শরুক য়ারি। ৩শুবা গ্লোবেল সাউথ সম্মিৎতা, ঐখোয়না গ্লোবেল দিবলপেম্ত কম্পেক্ত অমা লাউথোক্লে। থবক অসিদা শরুক য়ানবা অমসুং ঐখোয়গী থবকশিংদা ঐখোয়গা লোয়ননা চৎমিন্ননবা ঐখোয়না অদোমগী মফমদা তকশিল্লি।

অদোম থাগৎচরি।

দিসক্লেমর : মসি প্রধান মন্ত্রীগী ৱারোলদগী চাউরাক্না হন্দোকপনি। অশেংবা ৱারোল হিন্দীদা পীখি।

***