লৌউ-শিংউ অমসুং লৌমীশিংগী য়াইফ থৌরাং, অমদি খুঙ্গং চাওখৎ থৌরাংগী কেন্দ্র মন্ত্রী শ্রী সিবরাজ সিংহ চৌহান্না ঙসি নই দিল্লীগী PUSA দা পাঙথোকপা গ্লোবেল সোইল কন্ফরেন্স ২০২৪ দা ভিদিও কন্ফরেন্সিংগী খুত্থাঙদা ৱা ঙাংখ্রে‍। ভারতকী নাৎকী মচং ওইবা লাইৱাদি থৱায় পান্বা পুম্নমক্কী মরক্তা মান্নবা ৱাখল্লোন অমা লৈমিন্নবদা থাজবা থম্বনি হায়না কেন্দ্রগী লৌউ-শিংউ মন্ত্রীনা হায়খি‍। ঐখোয়গী মুনি রিসিশিংনা মীপুম খুদিংমক্কী মফমদা অমত্তা ওইবা ৱাখল্লোন অমা লৈ; অসুম্না মালেম পুম্বা অসি অমত্তনি, অমদি ঐখোয়না মীপুম খুদিংমক ঐখোয় মশেলনি হায়না লৌগদবনি হায়না তাকপি তম্বিরম্মি‍। ৱাখল্লোন অসি মীওইবখক্তদা লোইবা নত্তে, মসিনা শা-উচেকশিংবুসু কোনশিল্লি‍। লৈবাক লৈহাওসু থৱায় পান্দবা নত্তে, অহিংবগুম্বনি হায়রদুনা মহাক্না ৱাখল্লোন অসি লৈবাক লৈহাওদসু য়াওরি হায়খি‍।

ঐখোয়গী হকচাঙ অসি পোৎলম কয়ানা শেম্লকপনি, মখোয়গী মনুংদা লৈবাক লৈহাওসিসু মরুওইবা মচল অমনি অমদি লৈবাক লৈহাও লৈরবদি থৱায় পান্বসু লৈরিবনি হায়না শ্রী চৌহান্না হায়খি‍। করিগুম্বা লৈবাক লৈহাওনা মশা ফৎত্রবদি, থৱায় পান্বশিংসু মশা মউ ফনা লৈবা ঙম্লোই‍। ঐখোয় অমনা অমবু শৌগৎনরিবনি, মরম অসিনা লৈবাক লৈহাও মশা ফনা থম্বা মরু ওই‍। ঙসি, মালেম পুম্বনা লৈবাক লৈহাও মশা ফনা থম্নবগী মতাঙদা নুংনাংবা পোক্নরি‍। মালেম অসি ঐখোয় খক্তগী নত্তে; শা-উচেক অমসুং পাম্বীশিংগীসু মসিদা মঙম লৈ‍, হায়না শ্রী চৌহান্না মখা তাখি‍। লৈবাক লৈহাও মশা ফনা থম্বা হায়বসি ঙসি নুংনাংনিংঙাই ওইবা ৱাফম অমা ওইরি‍। ভারতনা নীংতম্লবা মতুংদগী হৌজিক ফাওবদা, লৌউ-শিংউগী লমদা শিংথানিংঙাই ওইনা খুমাঙ চাওশিল্লক্লি‍। মতম অমদা, লৈবাকসিদা চানবা চেঙ-চাক মরাঙ কায়দবা মতম অমা লৈরম্মি, অমদি অতোপ্পা লৈবাকশিংদগী চিঞ্জাক পুশিল্লকপা তারম্মি‍। অদুম ওইনমক, গ্রীন রিভোলুসন্না ভারত্তা মশক থোক্না অওনবা পুরকখি, হায়না কেন্দ্র মন্ত্রীনা মখা তাখি‍। চাথোক লৈবা মহৈ মরোং অমসুং মখোয়গী মখলশিং শীজিন্নবা, হেন্না ফবা ঈথৈ লৌখোং লৈহন্বা, অমসুং মতমগী লৌউ-শিংউগী পথাপ শীজিন্নবনা ভারত মচা মিলিয়ন কয়াগী ফুদ সিক্যুরিতী লৈহল্লে‍। মসিগী মতুংদা, রেনবো রিভোলুসন্না হোর্তিকলচর, দেরী, এক্বাকলচর, পোল্ত্রী, অমসুং অতৈ সেক্তরশিংগী খুত্থাঙদা লৌউ-শিংউদা খেন্নবা মওং মতৌ মখা তানা পুরক্তুনা লৌউ-শিংউবু ভারতকী শেন্মিৎলোনগী মরুওইবা য়ুম্বী অমা ওইহল্লে‍। হৌজিক্তি ভারতনা চহিদা ফুদগ্রেন মিলিয়ন তন ৩৩০ পুথোক্তুনা মালেমগী চিঞ্জাক্কী লল্লোন ইতিক্তা মশক থোক্না থৌদাং য়ারি অমসুং এক্সপোর্ত আর্নিংদা বিলিয়ন $৫০ গী শেন্থোক লাক্লি হায়বা ৱাফমসি ময়ামগী মফমদা পাউদম্বদা ঐগী ইফমদা নুংঙাইবা পোকই,” হায়না কেন্দ্রগী লৌউ-শিংউ মন্ত্রীনা হায়খি‍।

কেমিকেল হার শীজিন্নবা অমসুং মসিদা তাংবা হেল্লকপা, মহৌশাগী লনশিং মওং মরিল নাইদনা শীজিন্নবা, অমসুং নোংদম নাইদবা নোং-চিংগী ফীভম্না লৈবাক লৈহাওদা অকন্বা শাফু পীরি হায়নসু শ্রী চৌহান্না মখা তাখি‍। পাঙথোকখিবা স্তদী কয়াগী মতুং ইন্না, ঐখোয়গী লৈবাক লৈহাওগী চাদা ৩০দি মাঙলে হায়রি‍। লৈবাক লৈহাও চেন্থখিবা, থুমহি চেল্লকপা, অমোৎ অকায়না থল্লকপা কয়াসিনা লৈবাক লৈহাওদা য়াওফম থোকপা নাইত্রোজেন অমসুং মাইক্রো ন্যুত্রিএন্তশিংগী চাং হন্থহল্লে‍। শিংনবশিং অসিনা পোত্থোক পুথোকপদা শোকহন্বতা নত্তনা, তুংদা লৌমীশিংগী পুন্সি হিংনবগী লম্বীদা শোকহল্লক্কনি অমসুং চিঞ্জাক্কী ৱাথোক লাক্কনি, হায়না কেন্দ্র মন্ত্রীনা হায়খি‍। ঐখোয়গী লৈঙাক্না লৈবাক লৈহাও য়োকখৎনবা থৌশিল কয়া পায়খৎলে, অমসুং মসিনা মরম ওইরগা লৈহাও লৈবগী চাংসু হেনগৎলক্লে‍। সোইল হেল্থ কার্দ শাবগী থবক ২০১৫দা প্রধান মন্ত্রী শ্রী নরেন্দ্র মোদীগী লুচিং মখাদা হৌদোকখি‍। কার্দ মিলিয়ন ২২০ হেন্না শাদুনা লৌমীশিংদা খুৎশিন্নখ্রে‍। অদুগা লৌমীশিংনা হৌজিক্তি করম্বা হার শীজিন্নগনি অমদি কয়া য়াম্না শীজিন্নগনি হায়বদু সোইল হেল্থ কার্দকী মতেঙনা খঙবা ঙম্লে‍। প্রধান মন্ত্রী ক্রিসি সিঞ্চাই য়োজনা – পর দ্রোপ মোর ক্রোপকী মখাদা, ঐখোয়না ঈশিং লিক্না শীজিন্নবা, অমাঙ অতা হন্থহন্বা অমসুং পীক ন্যুত্রিএন্ত রেজিদ্যুশিং হন্থহন্বদা মীৎয়েঙ থম্লি‍। অৱাং নোংপোক্কী ওইনা ওর্গানিক বেসিক দিভেলপমেন্ত কম্পাইলেসন অমা শেমখ্রে অমসুং হায়রিবা স্তেত ৮ সিদা সেন্সিতিব ওইবা মফমশিংগী ইকোলোজী অমসুং বাইওদাইভর্সিতী ঙাক্তুনা থম্বগা লোয়ননা ওর্গানিক লৌঔউ-পথাপ শীজিন্নবা পুক্নিং থৌগৎলি‍।‍ মহৌশাগী লৌউ-পথাপ্পু মিসন অমা ওইহন্নবগী থবকসু ভারত্তা পায়খৎলি‍। কেমিকেল হারনা লৈবাক লৈহাও মাঙহন্বতা নত্তনা মীওইবা অমসুং শা-উচেকশিংগী মশাবুসু শোকহল্লি হায়নসু মহাক্না ফোঙদোকখি‍। লৈবাক্কী লৈহাও ফনা থম্নবা, ইন্তিগ্রেতেদ ন্যুত্রিএন্ত অমদি ৱাতর মেনেজমেন্তকী থৌওংশিং শীজিন্নবা তাইই‍। ঐখোয়না লৈবাক্কী লৈহাও চেন্বগী চাং হেনগৎহন্নবা, লৈবাক লৈহাও চেন্থবা হন্থহন্নবা, অমসুং ঈশিং তুংশিন্নবা কেপাসিতী হেনগৎহন্নবগীদমক মাইক্রো ইরিগেসন, ক্রোপ দাইভর্সিফিকেসন, এগ্রো-ফোরেত্রীনচিংবা তোঙান তোঙানবা থৌওংশিংগী খুত্থাঙদা পায়খৎপা য়াবা থৌরাং পুম্নমক পায়খৎপা তাই‍।

সাইন্তিফিক ইনোভেসনগী সোলুসন অমসুং এক্সতেন্সন সিস্তেমগী থৌদাং অকন্বা মওংদা চঙশিন্বা মরুওই হায়না শ্রী সিবরাজ সিংহ চৌহান্না হায়খি‍। ভারতকী ক্রিসি ববিজ্ঞান কেন্দ্রনা এগ্রিকলচরেল তেক্নোলোজী মেনেজমেন্ত এজেন্সীশিংগা খুৎশম্নরগা লৌমীশিংদা ৱাখল লৌশিং অমসুং স্কিল ফংহন্নবা থবক পায়খৎলি‍। সাইন্স অমসুং লৌমীশিংগী মরক্তা লৈরিবা লেবতগী লম ফাওবগী অরাপ্পা অসি হন্থহন্বা তাই‍। সাইন্তিস্তশিংদগী লৌমীশিংদা অচুম্বা ইনফোর্মেসন মতম চানা ফংহন্নবা থৌরাংশিং ঐখোয়না লেপ্পা লৈতনা পায়খৎলি‍। মায়কৈ অসিদা ক্রিসি বিজ্ঞান কেন্দ্রনসু থৌরাং কয়া পায়খৎওই‍। ঐখোয়না মোদর্ন এগ্রিকলচর চৌপাল অথুবা মতমদা হৌদোক্তুনা মসিদা সাইন্তিস্তশিংনা লেপ্পা লৈতনা লৌমীশিংগা ৱা খন্নগনি অমসুং ঈ-পাউ ফংহনগনি অমদি মখোয়গী খুদোংচাদবা ৱাফমশিংগী পাম্বৈ পীগনি হায়না শ্রী চৌহান্না মখা তাখি‍। মসিগী মথক্তা, লনাই অমসুং NGO না লুচিংবা এক্সতেন্সন সর্ভিসশিংনা লৌমীশিংগী মফমদা খুমাঙ চাওশিল্লবা তেক্নোলোজী পুরক্লি অমদি হৌজিক্তি লৌমীশিংনা মসিগী খুদোংচাবা লৌনরে‍।

লৌমীশিংনা লৈবাক লৈহাওবু খ্বায়দগী মরুওইনা য়েংশিল্লি, অমদি ঐখোয়না মখোয়বু মহৈ মশিং তম্বিদুনা, পুক্নিং থৌগৎপিদুনা অমদি মতমসিগী ওইবা সাইন্তিফিক ইনফোর্মেসনশিং ফংহন্দুনা মপাঙ্গল হাপ্পিবা তাই হায়না কেন্দ্রগী লৌউ-শিংউ মন্ত্রীনা হায়খি‍। মসিদা নহাশিংসু য়াওহন্বা তাই‍। লৌউ-শিংউ হায়বসি শেন্দোং লৈবা অমদি লেমজনিংঙাই ওইবা শিন্ফম্নি; মসিদা নহাশিংবুসু পুক্নিং থৌগৎপিবা মথৌ তাই‍। নুপী মহৈরোয় অমসুং রিছর্চরশিংনা লমদমসিগী অমদি মালেমগী লৈবাক লৈহাওগী ওইবা শিংনবশিংগী পাম্বৈ পুরক্কদবা ইনোভেসনশিং শেমগৎপদা মাঙজিল থাবা থৌদাং লৌগদবনি‍। লৈবাক লৈহাও চেন্থবা হায়বসি লৈবাকসিগী ওইবা ৱাফম অমখক নত্তে, মসি মালেমগী ওইবা ৱাফম্নি অমদি য়ুনাইতেদ নেসন্সকী সস্তেনেবল দিভেলপমেন্ত গোলশিংগী মনুংসু চল্লি‍। SDGশিং অসি ফংনবা হোৎনবা মরুওই‍। কন্ফরেন্স অসি লৈবাক কয়ানা সস্তেনেবল লেন্দ মেনেজমেন্তকী লমদা খুৎশম্ননা চৎমিন্ননবা, তেক্নোলোজীশিং তাথোক তাশিন তৌনবা অমদি পুন্না থবক পায়খৎমিন্ননবা তাঞ্জা অমনি‍। ঐনা শরুক য়াবিরিবা পুম্নমক্কীম ফমদা লৌমীশিংখক্তা নত্তনা মীওইবা খুন্নাই পুম্বা অমসুং শা-উচেক অমদি উপাল ৱাপাল পুম্বদা কান্নবা পীগদবা পাক শন্না পায়খৎপা য়াবা পাম্বৈশিং খন্নবিনবা ৱাফম থমজরি‍। ঐনা সাইন্তিস্ত, স্তেকহোল্দর, পোলিসী মেকর, ইন্দস্ত্রীগী মীহুৎশিং, NGO শিং অমদি মহৈরোয়শিংগী মফমদা লৈবাক্কী লৈহাও হান্নগী ফীভমদা হঞ্জিলহন্নবা খুৎশম্ননা চৎমিন্ননবা ৱাফমসু থমজরি‍। ভারত লৈঙাক্না তুং কোইগদবা অমসুং শেন্দোং লৈগদবা লৌউ-শিংউ, রেজিলিএন্ত ওইবা ইকোসিস্তেম অমসুং পুম্নমক্কী ফুদ সিক্যুরিতী লৈহনগদবা ঙাক্লৌ ওইগদবা থৌশিল পায়খৎনবা লেপ্লি‍। থৱায় পাম্বা পুম্নমক অমসুং তুংগী মীরোলগী তুং কোইগদবা তুংলমচৎ অমা লৈহন্নবা ঐখোয় পুন্না ৱাশকমিন্নসি, হায়বা ৱাফম থমদুনা শ্রী চৌহানগী ৱারোল লোইশিনখি‍।

প্রোফ: রলমেস চন্দ, NITI অয়োগকী মেম্র, দোক্তর ত্রিলোচন মোহাপত্রা, চেয়রপর্সন, প্রোতেক্সন ওফ পলআন্ত ভেরাইতিজ এন্দ ফার্মর্স রাইতস ওথোরিতী, অমদি DARE হান্নগী সেক্রেতরী অমদি হান্নগী DG ICAR, দোক্তর হিমান্সু পাথক, সেক্রেতরী DARE অমদি দাইরেক্তর জেনেরেল, ICAR & প্রেসিদেন্ত ISSS না থৌরমদুদা শরুক য়াখি‍।

*****